ໃນຕອນເຊົ້າຂອງວັນທີ 6 ມີນາ 2023 ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ II ຢູ່ໂຮງຮຽນການເມືອງ-ການປົກຄອງ ນະຄອນຫຼວງວຽງຈັນ ນຳໂດຍ ທ່ານ ນາງ ລຳພອຍ ສີອັກຄະຈັນ ຮອງປະທານສະພາປະຊາຊົນ ນວ, ສະມາຊິກສະພາປະຊາຊົນ ນວ ຊຸດທີ II, ມີ ທ່ານ ປອ ນາງ ວາລີ ເວດສະພົງ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ຄະນະບໍລິຫານງານສະມາຄົມມິດຕະພາບລາວ-ຫວຽດນາມຂັ້ນສູນກາງ, ທ່ານ ນາງ ສົມພຽນ ວົງໄຊ ສະມາຊິກສະພາປະຊາຊົນ ຊຸດທີ IX ປະຈຳເຂດເລືອກຕັ້ງທີ 1 ນວ, ປະທານຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນ ນວ, ມີບັນດາພະແນກການອ້ອມຂ້າງ ນວ ທັງໝົດ 09 ພາກສ່ວນ ເຂົ້າຮ່ວມ ຈຳນວນ 116 ທ່ານ, ຍິງ 48 ທ່ານ.

ໃນການລົງເຄື່ອນໄຫວພົບປະຄັ້ງນີ້, ທ່ານ ພວນສະຫວັດ ອອນລັດບຸນມີ ຮອງຫົວໜ້າໂຮງຮຽນການເມືອງ-ການປົກຄອງ ນວ ໄດ້ລາຍງານສະພາບລວມໂດຍຫຍໍ້ການຈັດຕັ້ງປະຕິບັດວຽກງານຂອງໂຮງຮຽນການເມືອງ-ການປົກຄອງ ນວ ແລະ ໃນໂອກາດດັ່ງກ່າວ, ບັນດາທ່ານ ສສຊ ແລະ ສສນວ ໃຫ້ຜູ້ເຂົ້າຮ່ວມໄດ້ແລກປ່ຽນຄຳຄິດຄຳເຫັນ, ສະເໜີບັນຫາ ຕໍ່ສະມາຊິສະພາ ເພື່ອນໍາໄປຊຸກຍູ້ໃຫ້ພາກສ່ວນກ່ຽວຂ້ອງຄົ້ນຄວ້າຫາວິທີການແກ້ໄຂ ເຊິ່ງບັນຫາສ່ວນໃຫຍ່ແມ່ນສະເໜີໃຫ້ເອົາໃຈໃສ່ແກ້ໄຂບັນຫາການສໍ້ລາດບັງຫຼວງ ຢ່າງເຂັ້ມງວດ, ໃຫ້ມີການປະຕິຮູບດ້ານການຜະລິດກະສິກຳຢ່າງແຂງແຮງ, ມີການພັດທະນາບູລະນະຕາມສອງຟາກທາງ ເສັ້ນທາງ 450 ປີ. ນອກນັ້ນ, ຍັງມີບັນຫາໄຟເຍືອງທາງຕາມເສັ້ນທາງ ນວ ບາງຈຸດທີ່ຍັງນຳໃຊ້ບໍ່ໄດ້, ບັນຫາການສັນຈອນຕິດຂັດ ແລະ ບັນຫາລູກຫຼານຮຽນຈົບມາແລ້ວບໍ່ມີວຽກເຮັດງານທຳ ເຫຼົ່ານີ້ເປັນຕົ້ນ.