(ສປ ນວ) ເພື່ອເປັນການສົ່ງເສີມສາຍພົວພັນມິດຕະພາບອັນເປັນມູນເຊື້ອອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ສອງສະພາປະຊາຊົນຂັ້ນທ້ອງຖິ່ນ ໃນການຍົກສູງປະສິດທິຜົນການເຄື່ອນໄຫວວຽກງານ ແລະ ພາລະບົດບາດຂອງສະພາປະຊາຊົນຂັ້ນທ້ອງຖິ່ນໃຫ້ພົ້ນເດັ່ນຂຶ້ນ, ໃນໄລຍະວັນທີ 23 – 26 ເມສາ 2024 ຜ່ານມາ, ສະພາປະຊາຊົນ ນະຄອນຫຼວງວຽງຈັນ ນຳໂດຍ ສະຫາຍ ບຸນທາມ ພຸດທະວົງສາ, ກຳມະການພັກ ນະຄອນຫຼວງວຽງຈັນ, ຮອງປະທານ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ແລກປ່ຽນບົດຮຽນ ກັບສະພາປະຊາຊົນ ນະຄອນໂຮ່ຈິມິນ, ສສ. ຫວຽດ ນາມ ເພື່ອລົງນາມເຊັນ ບົດບັນທຶການຮ່ວມມື ລະຫວ່າງ ສອງສະພາປະຊາຊົນ ນະຄອນ ຂອງສອງປະເທດ ແລະ ພົບປະແລກປ່ຽນບົດຮຽນດ້ານວຽກງານການຕິດຕາມກວດກາ, ວຽກງານນິຕິກຳ ເປັນຕົ້ນ: ການຄຸ້ມຄອງການລົງທຶນພາຍໃນ ແລະ ຕ່າງປະເທດ ແລະ ການພິຈາລະນາຮັບຮອງເອົານິຕິກຳຂອງທ້ອງຖິ່ນ.

ໃນການຢ້ຽມຢາມຄັ້ງນີ້, ຄະນະຜູ້ແທນ ສະພາປະຊາຊົນ ນະຄອນຫຼວງວຽງຈັນ ໄດ້ຮັບການຕ້ອນຮັບໂດຍ ສະຫາຍ ນາງ ຫງວນ ທິ ເລ໋, ຮອງເລຂາພັກ, ປະທານສະພາປະຊາຊົນ ນະຄອນໂຮ່ຈິມິນ ພ້ອມດ້ວຍຄະນະ. ໃນນີ້, ຄະນະຜູ້ແທນທັງສອງຝ່າຍໄດ້ເຊັນ ແລະ ມອບຮັບບົດບັນທຶກຮ່ວມມື MOC ລະຫວ່າງ ສະພາປະຊາຊົນ ນະຄອນຫຼວງວຽງຈັນ ແລະ ສະພາປະຊາຊົນ ນະຄອນໂຮ່ຈິມິນ ໃນໄລຍະປີ 2024-2026 ລົງນາມໂດຍ ສະຫາຍ  ຮວິ່ງ ແທ່ງ ເຍິ່ນ, ກຳມະການພັກ, ຮອງປະທານ ສະພາປະຊາຊົນ ນະຄອນໂຮ່ຈິມິນ, ສສ. ຫວຽດນາມ ແລະ ສະຫາຍ ບຸນທາມ ພຸດທະວົງສາ, ກຳມະການພັກ, ຮອງປະທານ ສະພາປະຊາຊົນ ນະຄອນຫຼວງວຽງຈັນ, ສປປ ລາວ; ເຊິ່ງເປັນການລິເລີ່ມສ້າງສາຍພົວພັນ ລະຫວ່າງ ສອງສະພາປະຊາຊົນ ໃນຖານະທີ່ເປັນອົງການນິຕິບັນຍັດຂັ້ນທ້ອງຖິ່ນໃຫ້ແໜ້ນແຟ້ນຍິ່ງຂຶ້ນ, ພ້ອມດຽວກັນນີ້ ໃນເວທີພົບປະສອງຝ່າຍ ຄະນະຜູ້ແທນທັງສອງຝ່າຍ ໄດ້ລົງເລິກແລກປ່ຽນບົດຮຽນການປະຕິບັດພາລະບົດ ບາດດ້ານການຕິດຕາມກວດກາ ແລະ ດ້ານນິຕິກໍາ ເປັນຕົ້ນ: ການຕິດຕາມກວດກາການຄຸ້ມຄອງການລົງທຶນພາຍໃນ ແລະ ຕ່າງປະເທດ, ບົດຮຽນການຕິດຕາມກວດກາການສ້າງນິຕິກໍາ, ການພິຈາລະນາຮັບຮອງເອົານິຕິກຳຂອງທ້ອງຖິ່ນ, ເຊິ່ງທາງຝ່າຍເພື່ອນ ໄດ້ຍົກໃຫ້ເຫັນການປະຕິບັດວຽກງານຂອງສະພາປະຊາຊົນ ນະຄອນໂຮ່ຈິມິນ ໂດຍສ່ວນໃຫຍ່ໄດ້ເນັ້ນໃສ່ການປະຕິບັດກົດໝາຍທີ່ກ່ຽວຂ້ອງກັບຂົງເຂດວຽກງານດັ່ງກ່າວ ເຊິ່ງເປັນບົດຮຽນທີ່ດີໃຫ້ແກ່ ສະພາປະຊາຊົນ ນະຄອນຫຼວງວຽງຈັນ ໄດ້ນຳໄປຈັດຕັ້ງປະຕິບັດຜັນຂະຫຍາຍໃນຕໍ່ໜ້າ. ນອກຈາກນີ້, ທັງສອງຝ່າຍ ຍັງໄດ້ແລກປ່ຽນບົດຮຽນໃນຂົງເຂດວຽກງານອື່ນໆ ເປັນຕົ້ນ: ບົດຮຽນດ້ານເສດຖະກິດ, ດ້ານການແກ້ໄຂຄໍາຮ້ອງທຸກ ແລະ ດ້ານການສຶກສາ.

ໃນໂອກາດດັ່ງກ່າວ, ຄະນະຜູ້ແທນ ໄດ້ເຂົ້າຢ້ຽມຢາມ ສະຖານກົງສູນໃຫຍ່ແຫ່ງ ສປປ ລາວ ທີ່ນະຄອນໂຮ່ຈິມິນ ໂດຍໄດ້ຮັບການຕ້ອນຮັບຈາກ ທ່ານ ພອນສີ ບຸນມີໄຊ, ກົງສູນໃຫຍ່ແຫ່ງ ສປປ ລາວ ປະຈໍາ ນະຄອນໂຮ່ຈິມິນ, ສສ. ຫວຽດນາມ ພ້ອມດ້ວຍຄະນະ ແລະ ໄດ້ຢ້ຽມຊົມສະຖານທີ່ທ່ອງທ່ຽວທາງປະຫວັດສາດ ຂອງນະຄອນໂຮ່ຈິມິນ, ຢ້ຽມຊົມສະຖານທີ່ທ່ອງທ່ຽວຂອງແຂວງຫວຸງເຕົ່າ ໂດຍສະເພາະ ທະເລ ເຫັນໄດ້ວ່າ ເປັນສະຖານທີ່ ທີ່ມີຄວາມສະອາດງົດງາມ, ມີສິ່ງອໍານວຍຄວາມສະດວກດ້ານຕ່າງໆໃຫ້ແກ່ນັກທ່ອງທ່ຽວ ເຊິ່ງເປັນສະຖານທີ່ຫຼັກໃນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ.