ໃນຕອນເຊົ້າ, ວັນທີ 27 ກັນຍາ 2023, ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ໄດ້ເຄື່ອນໄຫວຊຸກຍູ້ການເປີດສົກຮຽນໃໝ່ ສົກປີ 2023-2024 ຢູ່ທີ່ໂຮງຮຽນ ມ.ປາຍ ຈັນທະບູລີ, ໂດຍການນໍາພາຂອງ ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ, ມີ ທ່ານ ນາງ ເກດມະນີ ບັນດາສັກ, ປະທານ ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ໂດຍການຕ້ອນຮັບຂອງ ທ່ານ ລຳພັນ ອຸ່ນມະໂນ, ຫົວໜ້າຂະແໜງ ຈັດຕັ້ງ ພະແນກການສຶກສາທິການ ແລະ ກິລາ ນວ, ມີ ຫົວໜ້າຫ້ອງການສຶກສາທິການ ແລະ ກິລາ ເມືອງຈັນທະບູລີ, ຜູ້ອຳ ນວຍການ ມ.ປ ຈັນທະບູລີ ແລະ ຄູອາຈານ ຈຳນວນໜຶ່ງເຂົ້າຮ່ວມ.
ທ່ານ ແກ້ວເວດນະຄອນ ຈິນດາວົງສາ, ຜູ້ອຳນວຍການໂຮງຮຽນ ມ.ປ ຈັນທະບູລີ ລາຍງານໃຫ້ຊາບວ່າ: ໃນສົກປີ 2022-2023 ໂຮງຮຽນ ມ.ປ ຈັນທະບູລີ ມີຄູອາຈານທັງໝົດ 29 ຄົນ, ຍິງ 17 ຄົນ, ມີນັກຮຽນທັງໝົດ 293 ນ້ອງ, ຍິງ 145 ນ້ອງ, ເຊິ່ງໄລຍະຜ່ານມາ ບັນດາຄູອາຈານ ໄດ້ເອົາໃຈໃສ່ຂຶ້ນຫ້ອງສິດສອນຢ່າງເປັນປົກກະຕິ ຕາມໂຄງການຫຼັກສູດທີ່ທາງ ສວສ ກໍຄື ກະຊວງສຶກສາທິການ ແລະ ກິລາ ວາງອອກໃຫ້ຄົບ 5 ຫຼັກມູນການສຶກສາ, ເຊິ່ງມີຜົນງານໃນຫຼາຍດ້ານ ເປັນຕົ້ນ: ໄດ້ຈັດຕັ້ງບຳລຸງນັກຮຽນພອນສະຫວັນ ແລະ ສົ່ງເຂົ້າຮ່ວມສອບເສັງຂັ້ນເມືອງ ແລະ ຂັ້ນພະແນກ ໄດ້ອັນດັບ 3 ຂັ້ນພະແນກສຶກສາ; ໄດ້ຮັບລາງວັນທີ 2 ຈຳນວນ 02 ລັງວັນ ແລະ ທີ 3 ຈຳນວນ 5 ລາງວັນ ໃນຂະບວນການແຂ່ງຂັນກິລາ, ສີລະນະຊັ້ນມັດທະຍົມສຶກສາ ທົ່ວເມືອງຈັນທະບູລີ; ຜົນການສອບເສັງ ມ.7 ນັກຮຽນເກັ່ງຮອບດ້ານ (ແຕ່ລະວິຊາບໍ່ຫຼຸດ 7) ສົກຮຽນ 2022-2023 ມີ 5 ນ້ອງ, ຍິງ 4 ນ້ອງ. ນອກຈາກນັ້ນ, ໄລຍະຜ່ານມາ ບັນດາຄູອາຈານ, ນ້ອງນັກຮຽນ ຍັງໄດ້ເຂົ້າຮ່ວມຮັບຟັງການເຜີຍແຜ່ເອກະສານຕ່າງໆ ເປັນຕົ້ນ: ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການຕ້ານຢາເສບຕິດ ພ້ອມທັງຮັບຟັງການເຜີຍແຜ່ປູກຈິດສຳນຶກ ກ່ຽວກັບການຂັບຂີ່ປອດໄພຈາກພາກສ່ວນກ່ຽວຂ້ອງ; ຮັບຟັງ ແລະ ເຊື່ອມຊຶມເອກະສານ ວ່າດ້ວຍການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ, ຂໍ້ຕົກລົງວ່າດ້ວຍຈັນຍາບັນ, ຂໍ້ຫ້າມ ແລະ ການລົງວິໃນຕໍ່ບຸກະລາກອນຂະແໜງການສຶກສາ; ຄຳແນະນຳການປະເມີນຄູ ແລະ ຜູ້ບໍລິຫານ ເລກທີ 1213 ດຳລັດວ່າດ້ວຍລັດຖະກອນຄູ ເລກທີ 202; ຮັບຟັງການແນະແນວຈາກໂຮງຮຽນວິຊາຊີບເຕັກນິກປາກປາສັກ, ວິຊາຊີບວຽງຈັນ-ຮ່າໂນ້ຍ, ວິທະຍາໄລຄູດົງຄຳຊ້າງ, ການຊ່າງລາວ-ເຢຍລະມັນ, ການເງິນ ດົງຄໍາສ້າງ, ການທ່ອງທ່ຽວລາວນິດ, ມະຫາວິທະຍາໄລ Yeungjin, ສ. ເກົາຫລີ. ນອກຈາກນີ້, ຄູອາຈານ ແລະ ນ້ອງນັກຮຽນ ຍັງໄດ້ເຂົ້າຮ່ວມກິດຈະກຳຕ່າງໆ ເປັນຕົ້ນ: ການສົ່ງເສີມການອ່ານ, ຂະບວນການຕ້ອນຮັບວັນບຸນສຳຄັນຕ່າງໆ, ຂະບວນການສີລະປະ ແລະ ຂະບວນການອອກແຮງງານ. ຄຽງຄູ່ກັບໝາກຜົນທີ່ໄດ້ຮັບນັ້ນ, ກໍມີຫຼາຍບັນຫາທີ່ເປັນຂໍ້ຄົງຄ້າງ ແລະ ສະເໜີຕໍ່ຄະນະລົງເຮັດວຽກ ເພື່ອຂໍທິດຊີ້ນຳ ແລະ ນຳບັນຫາດັ່ງກ່າວ ໄປສະເໜີຕໍ່ພາກສ່ວນກ່ຽວຂ້ອງຄົ້ນຄວ້າພິຈາລະນາ. 
ໃນໂອກາດດັ່ງກ່າວ ທ່ານ ນາງ ເກດມະນີ ບັນດາສັກ ກໍໄດ້ມີຄຳເຫັນແລກປ່ຽນ ໃນບາງບັນຫາທີ່ເຫັນວ່າ ຍັງເປັນຂໍ້ຄົງຄ້າງທີ່ບັນດາໂຮງຮຽນລັດພົບພໍ້ ເປັນຕົ້ນ ບັນຫາຄູສອນບໍ່ພຽງພໍ, ລະບົບຄຸນນະພາບໃນການສິດສອນຂອງໂຮງຮຽນ, ນະໂຍບາຍຕໍ່ຄູອາຈານ ແລະ ຄອບຄົວນັກຮຽນທີ່ບໍ່ມີເງື່ອນໄຂ ແລະ ອື່ນໆ.
ໃນຕອນທ້າຍ, ທ່ານ ນາງ ລຳພອຍ ສີອັກຄະຈັນ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະອຳນວຍການ, ບັນດາຄູອາຈານ ທີ່ໄດ້ມີຄວາມພ້ອມໃນການກະກຽມເປີດສົກຮຽນໃໝ່ໃນຄັ້ງນີ້, ພ້ອມທັງຈະຮັບເອົາການສະເໜີ ເພື່ອນໍາໄປແລກປ່ຽນ ແລະ ສະເໜີຕໍ່ພາກສ່ວນກ່ຽວຂ້ອງ. ນອກຈາກນີ້, ກໍໄດ້ເນັ້ນໃຫ້ທາງຄະນະອໍານວຍການໂຮງຮຽນສືບຕໍ່ປະສານສົມທົບກັບພາກສ່ວນກ່ຽວຂ້ອງຄົ້ນຄວ້າ, ປຶກສາຫາລືຫາວິທີແກ້ໄຂບັນຫາທີ່ຍັງເປັນຂໍ້ຄົງຄ້າງ ເພື່ອເຮັດໃຫ້ການຈັດຕັ້ງປະຕິບັດວຽກງານສຳເລັດຕາມບັນດາຄາດໝາຍທີ່ໄດ້ວາງໄວ້.