( ສປ ນວ) ໃນຕອນເຊົ້າ, ວັນທີ 26 ກັນຍາ 2023, ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນ ນວ ໄດ້ເຄື່ອນໄຫວວຽກງານຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຢູ່ອົງການກວດກາລັດ ນວ ໂດຍການນໍາພາຂອງ ທ່ານ ບຸນທາມ ພຸດທະວົງສາ, ກຳມະການພັກ ນວ, ຮອງປະທານ ສະພາປະຊາຊົນ​ ນວ​, ມີ ທ່ານ ນາງ ສົມພຽນ ວົງໄຊ, ປະທານ ຄະນະກຳມະການຍຸຕິທຳ ແລະ ປກຊ-ປກສ, ທ່ານ ຄໍາຜອງ ແສງສະຫວ່າງ, ຮອງປະທານ ຄະນະກຳມະການຍຸຕິທຳ ແລະ ປກຊ-ປກສ ພ້ອມດ້ວຍ ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ສັງກັດຄະນະກຳມະການ, ໂດຍການຕ້ອນຮັບຂອງ ທ່ານ ຈັນສະຫວ່າງ ຫິມປະພັນ, ຮອງປະທານຄະນະກວດກາພັກ, ຮອງປະທານອົງການກວດກາລັດ ນວ ແລະ ມີບັນ ດາທ່ານຄະນະນຳຂອງອົງການກວດກາລັດຂັ້ນເມືອງ 09 ເມືອງ ນວ ແລະ ພະນັກງານຈຳນວນໜຶ່ງເຂົ້າຮ່ວມ.

ໃນການລົງເຮັດວຽກຄັ້ງນີ້, ໄດ້ຮັບຟັງການລາຍງານການເຄື່ອນໄຫວວຽກງານຂອງຄະນະກວດກາພັກ ແລະ ອົງການກວດກາລັດ ນວ, ເຊິ່ງໃນໄລຍະຜ່ານມາໄດ້ລົງຕິດຕາມ ແລະ ຊຸກຍູ້ວຽກງານກວດກາຢູ່ບັນດາເມືອງ, ກວດກາບັນດາໂຄງການລົງທຶນຂອງລັດ, ຕິດຕາມວຽກງານການຄຸ້ມຄອງນໍາໃຊ້ທີ່ດິນຂອງລັດ (ຕາມດຳລັດ 272/ລບ), ວຽກງານກວດກາຕາມຄໍາສັ່ງ, ຕິດຕາມຜົນການກວດສອບ, ການຈັດຕັ້ງປະຕິບັດຜົນການກວດກາ ແລະ ອື່ນໆ.

ໃນໂອກາດດັ່ງກ່າວ ທ່ານ ບຸນທາມ ພຸດທະວົງສາ ໄດ້ມີຄຳເຫັນຊຸກຍູ້ໃຫ້ແຕ່ລະພາກສ່ວນເອົາໃຈໃສ່ຕື່ມຕໍ່ການຈັດຕັ້ງປະຕິບັດໜ້າທີ່ວິຊາສະເພາະຂອງຕົນ ໂດຍສຸມໃສ່ເພີ່ມທະວີຍົກລະດັບໃຫ້ວິຊາການກວດກາແຕ່ລະຂັ້ນ ແລະ ໃຫ້ສືບຕໍ່ເອົາໃຈ ໃສ່ເຂົ້າຮ່ວມຕິດຕາມກວດກາແຕ່ຫົວທີບັນດາໂຄງການຕ່າງໆ ຂອງລັດ ແລະ ໃຫ້ເຂັ້ມງວດແກ້ໄຂຜົນຂອງການຕິດຕາມກວດ ກາຕາມລະບຽບກົດໝາຍ ແລະ ໃນຕອນທ້າຍ ກໍສະແດງຄວາມຍ້ອງຍໍຊົມເຊີຍຕໍ່ຄະນະນໍາຂອງແຕ່ລະຂົງເຂດວຽກງານທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຮັບຜິດຊອບສູງ, ເນັ້ນໃຫ້ແຕ່ລະພາກສ່ວນສືບຕໍ່ເອົາໃຈໃສ່ປະຕິບັດບັນດາຄາດໝາຍ ແລະ ທິດທາງໃນຕໍ່ໜ້າທີ່ກຳນົດໄວ້ໃນແຜນການເຄື່ອນໄຫວໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.