ວັນທີ 1 ກໍລະກົດ 2023 ທ່ານ ນາງ ລຳພອຍ ສີອັກຄະຈັນ ຄະນະປະຈຳພັກ ນວ, ຮອງປະທານສະພາປະຊາຊົນ ນວ ໄດ້ເຂົ້າຮ່ວມເປັນ ຄະນະປະທານ ພິທີເປີດຂະບວນການອະນາໄມທຳລາຍແຫຼ່ງເພາະພັນໜອນນໍ້າຍຸງລາຍ ຮ່ວມກັບ ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ແລະ ທ່ານ ພົງສະຫວັນ ສິລະພັນ ເຈົ້າເມືອງເມືອງສັງທອງ, ມີຄະນະພະແນກສາທາລະນະສຸກນະຄອນຫຼວງ, ກົມ, ສູນ, ຄະນະສາທາເມືອງສັງທອງ, ໂຮງໝໍເມືອງ, ມີແພດໝໍ, ພະຍາບານ, ພໍ່ແມ່ປະຊາຊົນ ລວມທັງສາມອົງການຈັດຕັ້ງຂອງເມືອງ ແລະ ນ້ອງໆນັກຮຽນກໍ່ໄດ້ເຂົ້າຮ່ວມ.

ໃນພິທີດັ່ງກ່າວ ຄະນະປະທານໄດ້ຊີ້ນຳໃຫ້ທຸກພາກສ່ວນ ຕ້ອງຊ່ວຍກັນເປັນເຈົ້າການໃນການຊີ້ນຳນຳພາ ແລະ ໃຫ້ການຮ່ວມມືໃນການສະກັດກັ້ນ ແລະ ຕ້ານພະຍາດໄຂ້ຍຸງລາຍ ໂດຍການນໍາໃຊ້ ມາດຕະການທີ່ສຳຄັນ ຫັນເອົາການມີສ່ວນຮ່ວມ ແລະ ເປັນເຈົ້າການຂອງບຸກຄົນ, ຄອບຄົວ ໃນການປະຕິບັດຫຼັກການ 05 ປ ຂອງກະຊວງສາທາລະນະສຸກວາງອອກ. ໃນຕອນທ້າຍຂອງພິທີ ບັນດາທ່ານ ຄະນະນຳ ແລະ ຜູ້ເຂົ້າຮ່ວມ ໄດ້ເດີນຂະບວນກວດກາບ້ານເຮືອນປະ ຊາຊົນ ເພື່ອແນະນຳການທຳລາຍແຫຼ່ງເພາະພັນໜອນນໍ້າຍຸງລາຍ ແລະ ເດີນທາງໄປຢ້ຽມຢາມແພດ, ໝໍ ແລະ ຜູ້ປ່ວຍໄຂ້ເລືອດອອກ ທີ່ໂຮງໝໍນ້ອຍເມືອງສັງທອງ ນະຄອນຫຼວງວຽງຈັນ.