ໃນຕອນເຊົ້າຂອງ ວັນທີ 10 ພຶດສະພາ 2023, ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ, ທ່ານ ນາງ ເກດມະນີ ບັນດາສັກ, ປະທານ ຄະນະກຳມະການວັດທະນະກຳ-ສັງຄົມ ແລະ ບັນດາເຜົ່າ ແລະ ທ່ານ ນາງ ຄຳແຫວນ ສິງບັນດິດ ຮອງປະທານຄະນະກຳມະການ ວັດທະນະກຳ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານຕິດຕາມກວດກາ ຢູ່ພະແນກສຶກສາທິການ ແລະ ກິລາ ນສ. ໃຫ້ກຽດຕາງໜ້າຕ້ອນຮັບໂດຍ ທ່ານ ນາງ ລີປ່າເອ້ຍ ບົວປາວ, ຮອງຫົວໜ້າພະແນກ ສຶກສາທິການ ແລະ ກິລາ ນວ ແລະ ມີບັນດາທ່ານ ຫົວໜ້າຫ້ອງການ ສຶກສາທິການ ແລະ ກິລາ 9 ເມືອງ ໃນນະຄອນຫຼວງວຽງຈັນ ແລະ ວິຊາການ ຈຳນວນໜຶ່ງ ເຂົ້າຮ່ວມໃນກອງປະຊຸມດັ່ງກ່າວ.

ການລົງເຄື່ອນໄຫວເຮັດວຽກໃນຄັ້ງນີ້ ເປັນການລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ ປະຈຳປີ 2023 ແລະ ເກັບກຳສະພາບຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ. ໂດຍອີງຕາມວາລະກອງປະຊຸມ ທ່ານ ຫົວໜ້າພະແນກ ແລະ ຫົວໜ້າຫ້ອງການ 9 ເມືອງ ທົ່ວນະຄອນຫຼວງ ໄດ້ຂຶ້ນລາຍງານຫຍໍ້ ກ່ຽວກັບສະພາບລວມການຈັດຕັ້ງປະຕິບັດວຽກງານໄລຍະຜ່ານມາ ແລະ ທິດທາງແຜນການໃນຕໍ່ໜ້າ ພ້ອມທັງລາຍງານກ່ຽວກັບຜົນສຳເລັດ, ຂໍ້ຄົງຄ້າງ, ບັນຫາ ແລະ ສາເຫດທີ່ຍັງບໍ່ບັນລຸຄາດໝາຍບາງດ້ານຂອງແຕ່ລະເມືອງ.

ໃນໂອກາດດັ່ງກ່າວ, ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ ກໍໄດ້ມີຄຳເຫັນຊີ້ນຳຕໍ່ກອງປະຊຸມ ພ້ອມທັງມີຄຳເຫັນແລກປ່ຽນ ແລະ ຮັບເອົາບາງບັນຫາ, ຂໍ້ຫຍຸ້ງຍາກ ທີ່ຄະນະຮັບຜິດຊອບໃນຂົງເຂດວຽກງານຕ່າງໆ ຂອງພະແນກ ແລະ ຫ້ອງການເມືອງ ພົບພໍ້ ເພື່ອນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ໃນຕອນທ້າຍກອງປະຊຸມ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພະແນກ, ບັນດາຫ້ອງການຂອງເມືອງ ແລະ ທຸກຂະ ແໜງການກ່ຽວຂ້ອງ ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍ ແລະ ທິດທາງໃນຕໍ່ໜ້າທີ່ກຳນົດໄວ້ໃຫ້ບັນລຸຄາດໝາຍ ແລະ ສຳເລັດຕາມແຜນການທີ່ວາງໄວ້ ຢ່າງມີປະສິດທິພາບ ແລະ ປະສິດທິຜົນ.