ໃນຕອນບ່າຍ, ວັນທີ 23 ສິງຫາ ນີ້ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ (ສສຊ) ແລະ ສະມາຊິກສະພາປະຊາຊົນນະຄອນຫຼວງ (ສສ ນວ) ໄດ້ລົງພົບປະຜູ້ມີສິດເລືອກຕັ້ງ ເມືອງຫາດຊາຍຟອງ ນວ ນໍາພາໂດຍ: ທ່ານ ສາລະພິດ ສູນວໍລະວົງ, ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ, ຫົວໜ້າພະແນກແຮງງານ ແລະ ສະຫວັດດີການສັງຄົມ ນວ ແລະ ມີ ທ່ານ ລຳເພັດ ຄຳຄໍ້ຮົມພັນ, ສະມາຊິກສະພາປະຊາຊົນ ນວ ຊຸດທີ II, ຮອງຫົວໜ້າ ຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ, ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງຫາດຊາຍຟອງ, ທ່ານ ນາງ ສ້ອຍສຸດາ ອິນເມືອງໄຊ, ສະມາຊິກສະພາປະຊາຊົນ ນວ ຊຸດທີ II, ຄະນະບໍລິຫານງານສະຫະພັນແມ່ຍິງ ນະຄອນຫຼວງວຽງຈັນ ຊຸດທີ 1, ຜູ້ອຳນວຍການບໍລິສັດ ສວນວັດທະນະທຳຊຽງຄວນ ຈຳກັດຜູ້ດຽວ, ຄະນະບໍລິຫານງານແນວລາວສ້າງຊາດ, ປະທານ ສະພາການຄ້າອຸດສາຫະກຳເມືອງ ຢູ່ທີ່ ວັດບ້ານປ່າຫວ້າ.

ຈຸດປະສົງໃນການລົງເຄື່ອນໄຫວພົບປະຄັ້ງນີ້ ແມ່ນເພື່ອພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາ ມັນ ເທື່ອທີ 5 ສະພາແຫ່ງຊາດ ຊຸດທີ IX ແລະ ສະພາປະຊາຊົນ ນວ ຊຸດທີ II ແລະ ເພື່ອຮັບຟັງຄໍາຄິດຄໍາເຫັນ, ຄໍາສະເໜີຂອງພໍ່ແມ່ປະຊາຊົນ ກໍຄືຜູ້ມີສິດເລືອກຕັ້ງ; ບັນດາທ່ານ ສສຊ ແລະ ສສນວ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມໂດຍເນັ້ນໃສ່ການຈັດຕັ້ງປະຕິບັດວຽກງານແຕ່ລະດ້ານ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງລັດຖະ ບານ, ອົງການປົກຄອງ ນວ, ຂົງເຂດຕຸລາການ, ຂອງສະພາແຫ່ງຊາດ ແລະ ສະພາປະຊາຊົນ ນວ ແລະ ໃນໂອກາດດັ່ງກ່າວ, ບັນດາທ່ານ ສສຊ ແລະ ສສນວ ກໍໄດ້ຮັບຟັງການລາຍງານສະພາບການຈັດຕັ້ງປະຕິບັດຂອງແຕ່ລະບ້ານ, ແລກປ່ຽນຄຳຄິດຄຳເຫັນກັບພໍ່ແມ່ປະຊາຊົນ, ຮັບຟັງບັນຫາທີ່ຂັດຂ້ອງໝອງໃຈຕ່າງໆ ໃນການດຳລົງຊີວິດຂອງພໍ່ແມ່ປະຊາຊົນ ພ້ອມທັງຮັບເອົາການສະເໜີແຕ່ລະບັນຫາ ເພື່ອນຳໄປສະເໜີຕໍ່ພາກສ່ວນກ່ຽວຂ້ອງຕິດຕາມກວດກາ ແລະ ພິຈາລະນາຫາທິດທາງແກ້ໄຂ ເຊິ່ງບັນຫາທີ່ປະຊາຊົນໄດ້ສະເໜີສ່ວນໃຫຍ່ ແມ່ນໃຫ້ແກ້ໄຂບັນຫາອັນຕາເງິນເຟີ້, ສິນຄ້າລາຄາແພງ; ແກ້ໄຂບັນຫາຜົນກະທົບທາງຄວນມົນລະຜິດຈາກໂຮງງານເຫຼັກສຽງຄວນ ແລະ ບັນຫາອື່ນໆອີກຈຳນວນໜຶ່ງ.