ໃນລະຫວ່າງ ວັນທີ 9-10 ຕຸລາ 2023, ສະພາປະຊາຊົນ ນະຄອນຫລວງວຽງຈັນ ໄດ້ຈັດກອງປະຊຸມຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍໃນຂົງ ເຂດປ້ອງກັນຊາດ-ປ້ອງກັນຄວາມສະຫງົບ 03 ສະບັບຄື: ກົດໝາຍວ່າດ້ວຍນາຍທະຫານກອງ ທັບປະຊາຊົນລາວ, ກົດໝາຍວ່າດ້ວຍການປ້ອງກັນຊາດ ແລະ ກົດໝາຍວ່າດ້ວຍກໍາລັງປ້ອງກັນຄວາມສະຫງົບປະຊາຊົນ ທີ່ຫ້ອງວ່າການນະຄອນຫຼວງ ໂດຍການເປັນປະທານຂອງ ທ່ານ ບຸນທາມ ພຸດທະວົງສາ ຮອງປະທານສະພາປະຊາຊົນ ນະຄອນຫຼວງ, ມີ ປະທານ, ຮອງປະທານ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນ ນະຄອນຫຼວງວຽງຈັນ, ບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນ ນະນະຄອນຫຼວງ, ຫົວໜ້າກອງບັນຊາການທະຫານ ນະຄອນຫຼວງ,​ ຫົວໜ້າກອງບັນຊາການ ປ​ກສ ນະຄອນຫຼວງ,​ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທັງນີ້, ເພື່ອເປັນຂໍ້ມູນໃຫ້ສະພາແຫ່ງຊາດໃນການຕິດຕາມກວດກາ ແລະ ພິຈາລະນາຮັບຮອງເອົາໃນຂັ້ນຕອນຕ່າງໆ, ໃນການ ຊຸກຍູ້ການປະເມີນຜົນການຈັດຕັ້ງປະຕິບັດກົດໝາຍຕາມກົດໝາຍວ່າດ້ວຍການສ້າງນິຕິກໍາ ເພື່ອໄປກ້າວໄປສູ່ການປັບປຸງໃຫ້ມີເນື້ອໃນຄົບຖ້ວນສົມບູນ, ສອດຄ່ອງກັບສະພາບການພັດທະນາທາງດ້ານເສດຖະກິດ-ສັງຄົມ ແລະ ການເຊື່ອມໂຍງກັບພາກພື້ນ ແລະ ສາກົນໃນໄລຍະໃໝ່, ຮັບປະກັນຫລັກວິຊາການ, ລັກສະນະວິທະຍາສາດ, ລັກສະນະຊາດ, ເປັນລະບົບ, ຄົບຊຸດ, ຮັດກຸມ, ກົມກຽວ ແລະ ສາມາດຈັດຕັ້ງປະຕິບັດໄດ້, ເພີ່ມທະວີຄວາມເອົາໃຈໃສ່ ເຂົ້າໃນການຄົ້ນຄວ້າປະກອບຄໍາຄິດຄໍາເຫັນຕໍ່ບັນດາເນື້ອໃນໃຫ້ເລິກເຊິ່ງ ແລະ ມີຈຸດສຸມ ເພື່ອສະຫລຸບສັງລວມລາຍງານໃຫ້ ສະພາແຫ່ງຊາດ ເພື່ອນໍາເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 6 ຊອງສະພາແຫ່ງຊາດ ຊຸດທີ IX.