ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ນະຄອນຫຼວງວຽງຈັນ (ນວ) ຊຸດທີ II ໄດ້ປິດລົງໃນວັນທີ 4 ສິງຫາ 2023 ພາຍຫຼັງດຳເນີນມາແຕ່ວັນທີ 31 ກໍລະກົດ ນີ້ ທີ່ຫ້ອງວ່າການ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງວຽງຈັນ, ມີການນໍາພັກ-ລັດ ນະຄອນຫຼວງວຽງຈັນ, ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມ.

ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງ ໄດ້ກ່າວວ່າ: ກອງປະຊຸມຄັ້ງນີ້ ໄດ້ພິຈາລະນາ ແລະ ຮັບຮອງເອົາບັນຫາສໍາຄັນ ຂອງນະຄອນຫຼວງ ເປັນຕົ້ນ: ບົດລາຍງານຂອງທ່ານເຈົ້າຄອງ ນະຄອນຫຼວງ ກ່ຽວກັບການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ໄລຍະກາງສະໄໝຂອງແຜນການ 05 ປີ ຄັ້ງທີ IX (2021-2025) ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ ແລະ ທິດທາງ ແຜນການ 06 ເດືອນທ້າຍປີ 2023 ຂອງນະຄອນຫຼວງວຽງຈັນ; ບົດລາຍງານການຈັດຕັ້ງປະຕິບັດວຽກງານ ໄລຍະກາງສະໄໝ ຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ; ການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023 ຂອງສະພາປະຊາຊົນ ນະຄອນຫຼວງ,​ ຕິດພັນກັບແຜນການເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫຼວງ ວຽງຈັນ ຊຸດທີ II; ດໍາເນີນການປະເມີນໃຫ້ຄະແນນຄວາມໄວ້ວາງໃຈ ໄລຍະກາງສະໄໝ (2021-2025) ຕໍ່ການປະຕິບັດໜ້າທີ່ ຂອງບຸກຄະລາກອນດໍາລົງຕໍາແໜ່ງ ທີ່ສະພາປະຊາຊົນ ແລະ ຄະນະປະຈໍາສະພາປະຊາຊົນ ນະຄອນຫຼວງວຽງຈັນ ເລືອກຕັ້ງ ແລະ ຮັບຮອງເອົາການແຕ່ງຕັ້ງ; ບົດລາຍງານການລາຍງານການຈັດຕັ້ງປະຕິບັດວຽກງານ ໄລຍະກາງສະໄໝຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ; ການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ແຜນການ 6 ເດືອນ ທ້າຍປີ 2023 ຂອງອົງການໄອຍະການປະຊາຊົນ ແລະ ສານປະຊາຊົນ ນະຄອນຫຼວງ. ຮັບຟັງການລາຍງານຂອງອົງການ ປົກຄອງ ກ່ຽວກັບການປະເມີນຜົນການຈັດຕັ້ງປະຕິບັດບັນດານິຕິກໍາໃຕ້ກົດໝາຍທີ່ສະພາປະຊາຊົນ ນະຄອນຫຼວງ ໄດ້ຮັບ ຮອງເອົາຈໍານວນ 03 ສະບັບ ຄື: ຂໍ້ຕົກລົງ ວ່າດ້ວຍການຄວບ ຄຸມສຽງເນືອງນັນ ໃນນະຄອນຫຼວງ; ຂໍ້ຕົກລົງ ວ່າດ້ວຍການກໍານົດ ແລະ ຄຸ້ມຄອງທີ່ດິນກະສິກໍາ ແລະ ປ່າໄມ້ ຢູ່ນະຄອນຫຼວງ; ຂໍ້ຕົກລົງ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວ ເມືອງ ແລະ ຊານເມືອງ. ນອກຈາກນັ້ນ, ຍັງໄດ້ຮັບຟັງຄວາມຄືບໜ້າໃນການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນ ຫາຢາເສບຕິດ ໄລຍະທີ II ຕິດພັນກັບການແກ້ໄຂ ບັນຫາຢາເສບຕິດທີ່ເກີດຂຶ້ນໃໝ່ ເຊັ່ນ: ນໍ້າກະທ່ອມ, ປຸມເປົ້າອັດແກັດ ທີ່ມີສານໄນຕັດອ໋ອກໄຊ, ຢາສູບໄຟຟ້າ ແລະ ອື່ນໆ; ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຫຍຸ້ງ ຍາກທາງດ້ານເສດຖະກິດ-ການເງິນ 06 ເດືອນຕົ້ນປີ 2023 ແລະ ແຜນວຽກຈຸດສຸມ 06 ເດືອນທ້າຍປີ 2023 ຢູ່ນະຄອນ ຫຼວງວຽງຈັນ. ຮັບຟັງການລາຍງານບັນຫາສໍາຄັນຕ່າງໆ ເປັນຕົ້ນ: ການຕິດຕາມກວດກາການປະຕິບັດກົດໝາຍ ຂອງອົງການ ສືບສວນ-ສອບສວນ; ການຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ ແລະ ສະຖານທີ່ປະຕິບັດມາດຕະການບັງຄັບອື່ນໆຂອງສານ; ການຍົກສູງຄຸນນະພາບໃນການຕັດສິນຄະດີແພ່ງ ແລະ ຄະດີອາຍາ ເປັນຂັ້ນຕົ້ນຢູ່ສານປະຊາຊົນ ນະຄອນຫຼວງ; ສາເຫດຂອງການປະຕິບັດຄໍາຕັດສິນຊັກຊ້າ ແລະ ມາດຕະການ, ວິທີການແກ້ໄຂຂໍ້ຄົງຄ້າງ ຮອດທ້າຍປີ 2023 ຕິດພັນກັບການລາຍງານການທ້ອນໂຮມຊັບ, ວັດຖຸສິ່ງຂອງ ແລະ ຄ່າປັບໃໝ ຕາມຄໍາຕັດສິນຂອງສານ.

ນອກຈາກນັ້ນ, ກອງປະຊຸມຍັງໄດ້ຮັບຟັງການລາຍງານຊີ້ແຈງ ບັນຫາສໍາຄັນຕ່າງໆ ຂອງນະຄອນຫຼວງ ຈໍານວນ 08 ບັນຫາ ຄື: ການຈັດຕັ້ງປະຕິບັດໂຄງການສໍາປະທານ ແລະ ລາຍຮັບຈາກການສໍາປະທານທີ່ດິນ ຢູ່ນະຄອນຫຼວງ; ການແກ້ໄຂໜີ້ ສິນຢູ່ຂອງນະຄອນຫຼວງ; ການຄຸ້ມຄອງການຂຸດຄົ້ນແຮ່ທາດ ໃນນະຄອນຫຼວງ; ການຄຸ້ມຄອງທີ່ດິນທຸກປະເພດ, ການປ່ຽນ ແປງການນໍາໃຊ້ທີ່ດິນ ຫຼື ການຫັນປ່ຽນທີ່ດິນ ໃນນະຄອນຫຼວງ; ການຕິດຕາມກວດກາ ແລະ ການແກ້ໄຂບັນຫາການຈັດສັນ, ບຸກລຸກ ແລະ ບຽດຍຶດທີ່ດິນທີ່ບໍ່ສອດຄ່ອງກັບກົດໝາຍທີ່ດິນ ໃນນະຄອນຫຼວງ; ການຄຸ້ມຄອງຫົວໜ່ວຍທຸລະກິດ ແລະ ຜູ້ປະ ກອບການຂອງຄົນຕ່າງປະເທດ ໃນນະຄອນຫຼວງ; ການແກ້ໄຂບັນຫາໄຟໄໝ້ລາມປ່າ, ວິທີການ ແລະ ມາດຕະການ ໃນການ ຕ້ານແລ້ງ-ຕ້ານຖ້ວມ ຢູ່ນະຄອນຫຼວງ.

ທ່ານ ປະທານສະພາປະຊາຊົນ ນະຄອນຫຼວງວຽງຈັນ ກ່າວຕື່ມວ່າ: ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກນະຄອນຫຼວງວຽງຈັນ ເຂົ້າສູ່ວຽກງານຕົວຈິງ, ແມ່ນໝາກຜົນຂອງສະຕິປັນຍາ, ການຍົກສູງຄວາມຮັບຜິດຊອບທາງດ້ານການເມືອງ, ຄວາມເປັນເຈົ້າການຂອງບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນ ຫຼວງ ໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນພື້ນຖານຂອງນະຄອນຫຼວງ, ທັງເປັນການຕັດສິນໃຈຂອງອົງການປົກຄອງ, ບັນດາພະແນກການ, ອົງການທີ່ກ່ຽວຂ້ອງໃນການສືບຕໍ່ຈັດຕັ້ງປະຕິບັດແຜນການທີ່ແຕ່ລະອົງການໄດ້ຮັບ ຜິດຊອບໃຫ້ປະກົດຜົນເປັນຈິງ.