(ສພຊ) ໂດຍປະຕິບັດຕາມຄຳສັ່ງແນະນຳຂອງຄະນະເລຂາທິການສູນກາງພັກ ສະບັບເລກທີ 151/ຄລສພ, ລົງວັນທີ 09 ກໍລະກົດ 2021 ແລະ ຄຳແນະນຳຂອງຄະນະປະຈຳສະພາແຫ່ງຊາດ ສະບັບເລກທີ 08/ຄປຈ, ລົງວັນທີ 14 ກໍລະກົດ 2021 ກ່ຽວກັບການສະເຫລີມສະຫລອງວັນລັດຖະທຳມະນູນແຫ່ງຊາດ ຄົບຮອບ 30 ປີ ແລະ ອີງຕາມການຊີ້ນຳຂອງທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ທັງເປັນຫົວໜ້າຄະນະຮັບຜິດຊອບສະເຫລີມສະ ຫລອງວັນລັດຖະທຳມະນູນແຫ່ງຊາດ ຄົບຮອບ 30 ປີ; ໃນວັນທີ 8 ສິງຫາ 2021 ທີ່ຫໍພິພິທະພັນ ໄກສອນ ພົມວິຫານ ໄດ້ມີພິທີເປີດງານວາງສະແດງຮູບພາບເນື່ອງໃນໂອກາດສະເຫລີມສະຫລອງວັນລັດຖະທຳມະນູນແຫ່ງຊາດ ຄົບຮອບ 30 ປີ (15 ສິງຫາ 1991-15 ສິງຫາ 2021) ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ; ມີບັນດາທ່ານຮອງປະທານສະພາແຫ່ງຊາດ, ລັດຖະມົນຕີ, ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ຕາງໜ້າອົງການຈັດຕັ້ງມະຫາຊົນ, ປະທານ-ຮອງປະທານກຳມາທິການ, ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ 18 ເຂດ ແລະ ແຂກຖືກເຊີນເຂົ້າຮ່ວມ.
ໃນພິທີ, ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ໄດ້ລາຍງານໃຫ້ຮູ້ວ່າ: ພິທີຄັ້ງນີ້ເປັນກິດຈະກຳໜຶ່ງໃນການສະເຫລີມສະຫລອງວັນລັດຖະທຳມະນູນແຫ່ງຊາດ ຄົບຮອບ 30 ປີ ທັງສະແດງໃຫ້ເຫັນຜົນງານ ແລະ ການເຄື່ອນໄຫວຂອງລັດເຮົາ ໃນການສ້າງ, ປັບປຸງ ແລະ ປະຕິບັດລັດຖະທຳມະນູນ ແຫ່ງ ສປປລາວ ສະບັບທຳອິດ ພາຍໃຕ້ການນຳພາຂອງພັກປະຊາຊົນປະຕິວັດລາວ; ຈາກນັ້ນ, ທ່ານ ໄຊສົມພອນ ພົມວິຫານ ໄດ້ຂຶ້ນຕັດແຖມຜ້າເພື່ອເປັນການເປີດພິທີຢ່າງເປັນທາງການ ແລະ ໄດ້ຢ້ຽມຊົມການວາງສະແດງຮູບພາບ ຕື່ມອີກ.
ການວາງສະແດງຮູບພາບໃນຄັ້ງນີ້ ປະກອບດ້ວຍຮູບພາບຈຳນວນໜຶ່ງໃນພາລະ ກິດຕໍ່ສູ້ປົດປ່ອຍຊາດ, ການສ້າງຕັ້ງ ສປປລາວ, ຮູບພາບການຈັດຕັ້ງ ແລະ ການເຄື່ອນ ໄຫວຂອງສະພາແຫ່ງຊາດ, ປະທານປະເທດ, ລັດຖະບານ, ສານປະຊາຊົນ, ອົງການໄອຍະການປະຊາຊົນ ແລະ ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການກວດສອບ, ອົງການກວດກາແຫ່ງລັດ ໂດຍສະເພາະການສ້າງ, ປັບປຸງ ແລະ ປະຕິບັດລັດຖະທຳມະນູນ ແລະ ກົດໝາຍ ໃນຕະຫລອດໄລຍະ 30 ປີ ທີ່ຜ່ານມາ ເຊິ່ງານວາງສະແດງຮູບພາບດັ່ງກ່າວ ຈະດຳເນີນໄປຈົນເຖິງວັນທີ 30 ສິງຫາ 2021.

ແຫຼ່ງຂ່າວທີ່ມາ: ສະພາແຫ່ງຊາດ