ເວລາ 16:30-17:30 ໂມງ ຂອງວັນທີ 21 ສິງຫາ 2023 ນີ້, ຄະນະ ສສຊ-ສສຂ ເຊກອງ ນໍາໂດຍ ທ່ານ ດົງເພັດ ພະຍົນ ປະທານຄະນະສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 16, ປະທານສະພາປະຊາຊົນແຂວງ ເຊກອງ ພ້ອມດ້ວຍສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕ້ງທີ 16 ແຂວງ ເຊກອງ ແລະ ສະມາຊິກສະພາປະຊາຊົນແຂວງ ຊຸດທີ II ໄດ້ເຂົ້າວາງກະຕ່າດອກໄມ້, ຈູດທູບທຽນຢູ່ອະນຸສອນສະຖານທີ່ສໍາຄັນຫຼາຍແຫ່ງຂອງແຂວງ ເນື່ອງໃນໂອກາດກ່ອນຈະດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ເຊກອງ ຊຸດທີ II ທີ່ຈະໄດ້ໄຂຂຶ້ນໃນມື້ອື່ນນີ້.

          ການເຂົ້າວາງກະຕ່າດອກໄມ້ ແລະ ຈູດທູບທຽນທີ່ອະນຸສອນສະຖານສໍາຄັນຂອງແຂວງ ໃນຄັ້ງນີ້ ເປັນຕົ້ນແມ່ນ: ອະນຸສອນສະຖານ ປະທານ ໄກສອນ ພົມວິຫາານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ, ຮູບຫຼໍ່ທ່ານ ອົງແກ້ວ ວີລະບູລຸດຂອງຊາດ ແລະ ເສົາຫຼັກເມືອງ ມິ່ງຂັວນຊາວແຂວງ ເຊກອງ. ທັງນີ້, ກໍເພື່ອເປັນການລະນຶກ, ສະແດງຄວາມເຄົາລົບ ແລະ ຮູ້ບຸນຄຸນຕໍ່ບັນພະບູລຸດ, ອາດີດການນໍາພັກ-ລັດ ທີ່ໄດ້ເສຍສະຫຼະເລືອດເນື້ອ ເຮື່ອແຮງ ສະຕິປັນຍາຂອງຕົນ ເຂົ້າໃນພາລະກິດຕໍ່ສູ້ປົດປ່ອຍຊາດ ກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ທັງເພື່ອເປັນການປູກຈິດສໍານຶກໃຫ້ແກ່ພະນັກງານ-ສະມະຊິກພັກ ຮຽນຮູ້ເອົາແບບຢ່າງທັດສະນະຄຸນສົມບັດທີ່ດີຂອງອາດີດການນໍາພັກ-ລັດ, ເຊິ່ງຍາມໃດພວກເພິ່ນກໍ່ໄດ້ອຸທິດຕົນເພື່ອຜົນປະໂຫຍດລວມຂອງຊາດ, ເພື່ອຄວາມຮັ່ງມີເຂັ້ມແຂງຂອງປະເທດຊາດ ແລະ ຄວາມສົມບູນພູນສຸກຂອງປະຊາຊົນລາວບັນດາເຜົ່າ.

       ຕະຫຼອດໄລຍະຜ່ານມາການນໍາພັກ-ລັດແຕ່ລະລຸ້ນ ແຕ່ລະສະໄໝ ແມ່ນໄດ້ສືບຕໍ່ຢຶດໝັ້ນ ແລະ ເດີນຕາມແນວທາງການປ່ຽນແປງໃໝ່ຂອງພັກຢ່າງໜັກແໜ້ນ, ປະເທດຊາດໄດ້ຮັບການພັດທະນາ, ປະຊາຊົນມີຄວາມສາມັກຄີປອງດອງ, ສັງຄົມມີຄວາມສະຫງົບສຸກ ສີວິໄລ ແລະ ຍຸຕິທໍາ.

#ໂດຍ: ນາລີວັນ.