ວັນທິ 7 ພະຈິກ 2022 ທີ່ອົງການໄອຍາການແຂວງຄຳມ່ວນ ໄດ້ຈັດພິທິລົງນາມບົດບັນທຶກຮ່ວມ ວ່າດ້ວຍການກຳນົດກົນໄກປະສານງານກ່ຽວກັບການດຳເນີນຄະດີຕາມຂະບວນການຍຸຕິທໍາ, ລະຫວ່າງ ອົງການໄອຍະການປະຊາຊົນແຂວງ (ອຍກ) ກັບ ກອງບັນຊາການ ປກສ ແຂວງ, ພະແນກກະສິກຳ –  ປ່າໄມ້, ສານປະຊາຊົນ ແລະ ພະແນກ ຍຸຕິທຳ ແຂວງ, ໂດຍການເປັນກຽດເຂົ້າຮ່ວມຂອງ ທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງ ຄໍາມ່ວນ, ມີບັນດາຫົວໜ້າ – ຮອງຫົວໜ້າພະແນກການ ທັງ 4 ພາກສ່ວນດັ່ງກ່າວ, ຕະຫລອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໃນພິທີບັນດາທ່ານທີ່ເຂົ້າຮ່ວມ ແມ່ນໄດ້ຮັບຟັງການຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະປະສານງານຮ່ວມ ສະບັບເລກທີ 230, 244, 245 ແລະ 246 ລະຫວ່າງ ອຍກ  ແລະ ສານປະຊາຊົນ, ພະແນກຍຸຕິທຳ, ພະແນກກະສິກຳ – ປ່າໄມ້,  ປກສ ໂດຍໄດ້ກຳນົດພາລະບາດ ແລະ ສິດໜ້າທີ່, ລວມທັງມາດຕະການຕ່າງໆ ຕາມຂະບວນຍຸຕິທຳ, ພ້ອມນັ້ນຍັງໄດ້ຮັບຟັງການຜ່ານຮ່າງບົດບັນທຶກຮ່ວມລະຫວ່າງ ອຍກ ກັບ 4 ພາກສ່ວນ, ເພື່ອໃຫ້ບັນດາພະແນກການທີ່ກ່ຽວຂ້ອງໄດ້ປະກອບຄໍາຄິດຄໍາເຫັນ ແລະ ມີຄວາມເປັນເອກະພາບທາງດ້ານເນື້ອໃນ ບົນພື້ນຖານຖືກຕ້ອງຄອດຄ່ອງຕາມລະບຽບຫຼັກການ ແລະ ກົດໝາຍທີ່ກໍານົດໄວ້, ແນໃສ່ສະກັດກັ້ນປະກົດການຫຍໍ້ທໍ້ໃນສັງຄົມເຮັດໃຫ້ການດຳເນີນຄະດີຂອງແຕ່ລະພາກສ່ວນໄດ້ດໍາເນີນໄປຢ່າງຖືກຕ້ອງ, ໂປ່ງໃສ, ວ່ອງໄວ, ທັນຕາມກຳນົດເວລາ ແລະ ຍຸຕິທໍາ. ໂອກາດນີ້ ຫົວໜ້າ ອົງການໄອຍະການປະຊາຊົນ ແຂວງຄໍາມ່ວນ ແລະ ບັນດາຕາງໜ້າພະແນກການທັງ 4 ພາກສ່ວນ ກໍ່ໄດ້ລົງນາມບົດບັນທຶກຮ່ວມກັນ ເພື່ອເປັນບ່ອນອີງ ແລະ ພ້ອມກັນນໍາໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງ ໃຫ້ມີປະສິດທິຜົນສູງ.

ພິເສດໃນພິທີອັນມີຄວາມໝາຍສໍາຄັນດັ່ງກ່າວ, ແມ່ນໄດ້ຮັບຟັງການມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ຂອງ  ທ່ານ ບຸນມີ ພິມມະສອນ ປະທານສະພາປະຊາຊົນແຂວງ ຄໍາມ່ວນ ເຊິ່ງ ທ່ານເນັ້ນໜັກມາຍັງບັນດາຄະນະພັກ, ຄະນະນຳທັງ 4 ພາກສ່ວນ ຈົ່ງນໍາເອົາເນື້ອໃນບົດບັນທຶກຄັ້ງນີ້ ໄປຈັດຕັ້ງເຜີຍແຜ່, ເຊື່ອມຊຶມໃຫ້ຖັນແຖວພະນັກງານຕົນຮັບຮູ້, ເຂົ້າໃຈຢ່າງເລິກເຊິ່ງ, ປະສານສົມທົບກັບພາກສ່ວນທີ່ກ່ຽວຂ້ອງໃຫ້ມີຄວາມເອກະພາບກັນໃນການປະຕິບັດໜ້າທີ່ວຽກງານໃຫ້ໄດ້ຮັບຜົນສຳເລັດເປັນຢ່າງດີ, ເອົາໃຈໃສ່ປັບປຸງຂອດປະສານງານຮ່ວມໃຫ້ເປັນລະບົບ, ເພີ່ມທະວີໂຄສະນາເຜີຍແຜ່ລະບຽບກົດໝາຍໃຫ້ແກ່ຖັນແຖວພະນັກງານໃນຂົງເຂດທີ່ຕົນຮັບຜິດຊອບໃຫ້ທົ່ວເຖິງ, ໄປຄຽງຄູ່ກັບ ການບໍາລຸງກໍ່ສ້າງຍົກລະດັບພະນັກງານໂດຍສະເພາະເຈົ້າໜ້າທີ່ໆ ເຮັດວຽກຕົວຈິງໃຫ້ມີຄວາມຮູ້, ຄວາມສາມາດສູງ, ມີຄຸນທາດການເມືອງ, ຄຸນສົມບັດ, ຈັນຍາທຳ ແລະ ຄວາມໂປ່ງໃສຮັບໃຊ້ປະຊາຊົນຢ່າງແທ້ຈິງ.