(ສພຊ) ຕອນບ່າຍວັນທີ 19 ທັນວາ 2022 ທີ່ຫ້ອງປະຊຸມໃຫຍ່ຂອງສະພາແຫ່ງຊາດ ນະຄອນຫຼວງວຽງຈັນ ໂດຍການເປັນປະທານກອງປະຊຸມຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ເຂົ້າຮ່ວມມີບັນດາທ່ານຄະນະປະທານກອງປະຊຸມ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ບັນດາທ່ານສະມາຊິກສະພາແຫ່ງຊາດ ຈາກ 18 ເຂດເລືອກຕັ້ງທົ່ວປະເທດ ພ້ອມດ້ວຍຄະນະຮັບຜິດຊອບຮ່າງກົດໝາຍ.
ທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ໄດ້ສະເໜີຮ່າງກົດໝາຍວ່າດ້ວຍທຸລະກໍາທາງເອເລັກໂຕຣນິກ (ສະບັບປັບປຸງ) ຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ເຊິ່ງທ່ານໄດ້ຍົກໃຫ້ເຫັນເຖິງ ເປົ້າໝາຍ, ເຫດຜົນ ແລະ ຄວາມຈໍາເປັນ ໃນການສ້າງກົດໝາຍວ່າດ້ວຍທຸລະກໍາທາງເອເລັກໂຕຣນິກ ວ່າ: ການປັບປຸງກົດໝາຍວ່າດ້ວຍທຸລະກຳທາງເອເລັກໂຕຣນິກ ມີເປົ້າໝາຍເພື່ອໃຫ້ກົດໝາຍສະບັບນີ້ ເປັນເຄື່ອງມືຊຸກຍູ້ໃຫ້ການຄຸ້ມຄອງລັດດ້ານວຽກງານທຸລະກຳທາງເອເລັກໂຕຣນິກ ມີປະສິດທິພາບ, ເຮັດໃຫ້ເນື້ອໃນຂອງກົດໝາຍ ມີຄວາມຈະແຈ້ງ, ລະອຽດ, ຮັດກຸມ, ສອດຄ່ອງກັບສະພາບຄວາມເປັນຈິງຂອງການພັດທະນາເສດຖະກິດ-ສັງຄົມໃນໄລຍະປັດຈຸບັນ, ສາມາດເຊື່ອມໂຍງກັບພາກພື້ນ ແລະ ສາກົນ.
ຜ່ານການຈັດຕັ້ງປະຕິບັດຕົວຈິງນັ້ນ ກົດໝາຍວ່າດ້ວຍທຸລະກຳທາງເອເລັກໂຕຣນິກ ກໍໄດ້ເປັນເຄື່ອງມືໃນການຊຸກຍູ້ ສົ່ງເສີມການນໍາໃຊ້, ການຫັນເປັນທັນສະໄໝ, ການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ. ແຕ່ເພື່ອໃຫ້ວຽກງານທຸລະກຳທາງເອເລັກໂຕຣນິກມີປະສິດທິພາບຂຶ້ນກວ່າເກົ່າ, ມີຄວາມສອດຄ່ອງ ແລະ ສາມາດເຊື່ອມໂຍງເສດຖະກິດພາກພື້ນ ແລະ ສາກົນໄດ້ຢ່າງພຽງພໍ ເຊັ່ນ: ສັນຍາຮ່ວມມືອາຊຽນ-ອົດສະຕາລີ-ນິວຊີແລນ (AANZFTA), ສັນຍາຮ່ວມມືເສດຖະກິດຮອບດ້ານລະດັບພາກພື້ນ (RCEP), ສັນຍາຮ່ວມມືການຄ້າທາງເອເລັກໂຕຣນິກອາຊຽນ ( ASEAN ECA), ອົງການການຄ້າໂລກ (WTO) ແລະ ກົດໝາຍຕົ້ນແບບຂອງສະຫະປະຊາຊາດ (UNCITRAL Model Law). ອີກບັນຫາໜຶ່ງທີ່ສຳຄັນກໍຄື ກົດໝາຍວ່າດ້ວຍລາຍເຊັນເອເລັກໂຕຣນິກ ໄດ້ຜ່ານການຮັບຮອງຈາກສະພາ ແລະ ປະກາດນໍາໃຊ້ ໃນປີ 2019 ເຊິ່ງກົດໝາຍສະບັບນີ້ ມີການກໍານົດບາງເນື້ອໃນຊໍ້າຊ້ອນ ແລະ ບໍ່ສອດຄ່ອງກັບກົດໝາຍທຸລະກຳທາງເອເລັກໂຕຣນິກ ເຮັດໃຫ້ເກີດຄວາມສັບສົນໃນການຄຸ້ມຄອງ ນຳໃຊ້ ລາຍເຊັນເອເລັກໂຕຣນິກ ໃນໄລຍະຜ່ານມາ.
ຕໍ່ກັບບັນດາສາເຫດທີ່ກ່າວມາຂ້າງເທິງນັ້ນ ຄະນະຮັບຜິດຊອບປັບປຸງກົດໝາຍ ໄດ້ຄົ້ນຄວ້າມາປະເມີນ ເຫັນວ່າມີເຫດຜົນ ແລະ ຄວາມຈໍາເປັນທີ່ຈະຕ້ອງໄດ້ປັບປຸງເນື້ອໃນຂອງກົດໝາຍສະບັບນີ້ຄືນ ເພື່ອໃຫ້ມີຄວາມສອດຄ່ອງ, ຈະແຈ້ງ, ລະອຽດ, ຮັດກຸມ, ສາມາດຈັດຕັ້ງປະຕິບັດໃຫ້ມີປະສິດທິພາບກວ່າເກົ່າ ແລະ ສອດຄ່ອງກັບສະພາບການພັດທະນາເສດຖະກິດ-ສັງຄົມໃນໄລຍະປັດຈຸບັນ ພ້ອມທັງສອດຄ່ອງກັບພາກພື້ນ ແລະ ສາກົນ.
ການປັບປຸງກົດໝາຍສະບັບນີ້ ແມ່ນມີຄວາມຈໍາເປັນຢ່າງຍິ່ງ ເພື່ອຕອບສະໜອງຄວາມຮຽກຮ້ອງຕ້ອງການ ແລະ ສ້າງເຄື່ອງມືທີ່ສຳຄັນໃນການຄຸ້ມຄອງ ທັງຊຸກຍູ້ສົ່ງເສີມວຽກງານທຸລະກຳທາງເອເລັກໂຕຣນິກ ຢູ່ ສປປລາວ ໃຫ້ແທດເໝາະກັບຍຸກການພັດທະນາເສດຖະກິດ-ສັງຄົມໃນປັດຈຸບັນ ແລະ ໃນຕໍ່ໜ້າ ແບບຍືນຍົງ ແລະ ສ້າງຄວາມອາດສາມາດການເຊື່ອມໂຍງກັບພາກພື້ນ ແລະ ສາກົນ ທີ່ເປັນທ່າອ່ຽງລວມຂອງໂລກປັດຈຸບັນ ແລະ ອະນາຄົດ.
ຫຼັງຈາກນັ້ນ, ປະທານກອງປະຊຸມ ໄດ້ມີຄໍາເຈາະຈີ້ມ ແລະ ໃຫ້ທິດຊີ້ນໍາໃນການຄົ້ນຄວ້າປະກອບຄໍາເຫັນ ໃສ່ຮ່າງກົດໝາຍສະບັບດັ່ງກ່າວ. ຈາກນັ້ນ, ບັນດາທ່ານ ສະມາຊິກສະພາແຫ່ງຊາດ ໄດ້ສຸມໃສ່ຄົ້ນຄວ້າປະກອບຄໍາຄິດຄໍາເຫັນຢ່າງມີເຫດມີຜົນ ແລະ ກົງໄປກົງມາ. ພາຍຫຼັງບັນດາທ່ານ ສະມາຊິກສະພາແຫ່ງຊາດ ມີຄໍາເຫັນແລ້ວ ຄະນະຮັບຜິດຊອບປັບປຸງຮ່າງກົດໝາຍສະບັບດັ່ງກ່າວ ໄດ້ໃຫ້ຄວາມກະຈ່າງແຈ້ງ ຕໍ່ບັນຫາທີ່ ສະມາຊິກສະພາແຫ່ງຊາດ ໃຫ້ຄວາມສົນໃຈ. ຈາກນັ້ນ, ປະທານກອງປະຊຸມ ກໍໄດ້ສະຫຼຸບສັງລວມຄໍາເຫັນຂອງກອງປະຊຸມ.