(ສພຊ) – ເພື່ອເຮັດໃຫ້ວຽກງານຕິດຕາມກວດກາການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນຫຼວງ ໄດ້ຮັບການຈັດຕັ້ງປະຕິບັດໃຫ້ມີຄວາມເປັນເອກະພາບກັນໃນຂອບເຂດທົ່ວປະເທດ; ລະຫວ່າງວັນທີ 30 ມີນາ – 02 ເມສາ 2024 ທີ່ເມືອງວັງວຽງ ແຂວງວຽງຈັນ, ກໍາມາທິການກົດໝາຍ ໄດ້ຈັດກອງປະຊຸມລະດົມແນວຄິດໃສ່ຮ່າງນິຕິກໍາຂອງຄະນະປະຈໍາສະພາແຫ່ງຊາດ (ຄປຈສພຊ) ແລະ ຮ່າງປຶ້ມຄູ່ມືກ່ຽວກັບການຕິດຕາມກວດກາການປະເມີນຜົນການຈັດຕັ້ງປະຕິບັດນິຕິກໍາໃຕ້ກົດໝາຍ (ຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນຫຼວງ) ພາຍໃຕ້ການເປັນປະທານຂອງທ່ານ ອໍາໄພ ຈິດມານົນ ຮອງປະທານກໍາມາທິການກົດໝາຍ ໂດຍມີບັນດາທ່ານປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ເລຂາທິການສະພາປະຊາຊົນແຂວງຫຼວງພະບາງ ແລະ ແຂວງຄໍາມ່ວນ ພ້ອມດ້ວຍບັນດາທ່ານຫົວໜ້າກົມ, ຮອງຫົວໜ້າກົມ, ຄະນະພະແນກ ແລະ ລັດຖະກອນວິຊາການ ຈໍານວນໜຶ່ງຂອງສະພາແຫ່ງຊາດ ເຂົ້າຮ່ວມ.

ບັນດາຜູ້ເຂົ້າຮ່ວມໄດ້ພ້ອມກັນປະກອບຄໍາເຫັນ ແລະ ແລກປ່ຽນບົດຮຽນໃນການປະຕິບັດຕົວຈິງຂອງທ້ອງຖິ່ນ ເພື່ອເຮັດໃຫ້ຮ່າງນິຕິກໍາຂອງ ຄປຈສພຊ ແລະ ຮ່າງປຶ້ມຄູມືດັ່ງກ່າວ ສາມາດນໍາໄປຈັດຕັ້ງປະຕິບັດໃຫ້ມີຄວາມຊັດເຈນ ແລະ ເປັນເອກະພາບຕໍ່ກັບວຽກງານດັ່ງກ່າວ; ກອງປະຊຸມຄັ້ງນີ້ ໄດ້ຮັບການສະໜັບສະໜູນທາງດ້ານງົບປະມານຈາກມູນນິທິ ເວສທ໌ມິນສ໌ເທີ ເພື່ອປະຊາທິປະໄຕ (Westminster Foundation for Democracy – WFD).

(ຂ່າວ ແລະ ພາບ: ກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ )