ໃນຕອນບ່າຍຂອງວັນທີ 9 ກັນຍາ 2024 ທີ່ຜ່ານມານີ້, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ອວຍພອນ ຄະນະປະທານສະຫະພັນນັກຮົບເກົ່າແຂວງ, ເນື່ອງໃນວາລະໂອກາດ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 22 ປີ (09 ກັນຍາ 2002-09 ກັນຍາ 2024); ໂດຍການຕ້ອນຮັບຂອງທ່ານ ພັທ ສໍາລີ ໂພທິສານ ປະທານສະຫະພັນນັກຮົບເກົ່າແຂວງສາລະວັນ ທັງເປັນສະມາຊິກສະພາປະຊາຊົນແຂວງ ປະຈຳເມືອງຕຸ້ມລານ ພ້ອມດ້ວຍພະນັກງານ ພາຍໃນຫ້ອງການຕ້ອນຮັບຢ່າງອົບອຸ່ນ;

ທ່ານ ພັທ ສໍາລີ ໂພທິສານ ປະທານສະຫະພັນນັກຮົບເກົ່າແຂວງ ໄດ້ກ່າວສະແດງຄວາມຂອບໃຈ ເປັນຢ່າງສູງ ມາຍັງທ່ານຮອງເລຂາພັກແຂວງ ປະທານສະພາປະຊາຊົນແຂວງ ທີ່ໄດ້ເຄື່ອນໄຫວຢ້ຽມຢາມ ແລະ ອວຍພອນ ຄະນະປະທານສະຫະພັນນັກຮົບເກົ່າແຂວງ ໃນຄັ້ງນີ້, ໂອກາດວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 22 ປີ ເຊິ່ງເປັນວັນທີ່ມີຄວາມໝາຍສໍາຄັນຕໍ່ປະເທດຊາດ; ພ້ອມດຽວກັນ, ທ່ານຍັງໄດ້ເລົ່າຄືນ ການເຕີບໃຫຍ່ຂະຫຍາຍຕົວ ຕະຫຼອດໄລຍະຜ່ານມາ ເຊິ່ງມີມູນເຊື້ອອັນພິລະອາດຫານຂອງສະຫະພັນນັກຮົບເກົ່າແຫ່ງຊາດລາວ ໃນການເປັນກຳລັງປະຈັນບານໂດຍກົງຢູ່ໃນສະໜາມຮົບ ໃນພາລະກິດຕໍ່ສູ້ປົດປ່ອຍປະເທດຊາດ ພາລະກິດປົກປັກຮັກສາ, ສ້າງສາພັດທະນາປະເທດຊາດ ແລະ ລາຍງານສະພາບການເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຂອງສະຫະພັນນັກຮົບເກົ່າແຂວງ ມີຜົນສໍາເລັດອັນພົ້ນເດັ່ນຫຼາຍດ້ານທັງພາຍໃນ ແລະ ຕ່າງປະເທດ;

ຈາກນັ້ນ, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ ໄດ້ຕາງໜ້າຄະນະປະຈໍາສະພາປະຊາຊົນແຂວງ ໃນນາມກໍາມະການຂອງກໍາມາທິການວຽກງານປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຂໍສະແດງຄວາມຮູ້ບຸນຄຸນ ແລະ ກະຕັນຍູຕໍ່ບັນດາສະຫາຍສະມາຊິກສະຫະພັນນັກເຮົາເກົ່າ ທົ່ວປະເທດ ທີ່ໄດ້ເສຍສະຫຼະອຸທິດເພື່ອຊາດເພື່ອປະຊາຊົນ ພ້ອມອວຍພອນໄຊອັນປະເສີດແດ່ທ່ານປະທານສະຫະພັນນັກຮົບເກົ່າແຂວງ ຕະຫຼອດຮອດພະນັກງານທັງໝົດ ຈົ່ງມີສຸຂະພາບ ພາລານາໄມສົມບູນ ສືບຕໍ່ປະຕິບັດໜ້າທີ່ຂອງຕົນຕາມການມອບໝາຍຢ່າງມີຜົນສໍາເລັດ.

ພາບ-ຂ່າວ: ດີລໍາພົນ ພົມມະຈັນ