(ສພຊ) – ວັນອາທິດທີ 29 ກັນຍາຜ່ານມາ, ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ນຳເອົາເຄື່ອງຊ່ວຍເຫຼືອທີ່ສະພາແຫ່ງຊາດ (ສພຊ) ລະດົມຂົນຂວາຍ ແລະ ຂໍການອຸປະຖຳຈາກພາກສ່ວນຕ່າງໆ ໄປມອບໃຫ້ແກ່ປະຊາຊົນຜູ້ທີ່ປະສົບໄພພິບັດນ້ຳຖ້ວມຢູ່ເມືອງຊຳເໜືອ ແຂວງຫົວພັນ ເພື່ອເປັນການແບ່ງເບົາ ແລະ ບັນເທົາທຸກ; ຕາງໜ້າ ສພຊ ກ່າວມອບໂດຍທ່ານ ນາງ ອຳໄພວອນ ລ້ອມບຸນແພງ ແລະ ກ່າວຮັບໂດຍທ່ານ ຄຳແພງ ໄຊສົມແພງ ເຈົ້າແຂວງໆຫົວພັນ ເຊິ່ງມີທ່ານ ຄຳແພງ ວິລະພັນ ປະທານກຳມາທິການກົດໝາຍ, ທ່ານ ນາງ ມະນີວັນ ເຍຍປາວເຮີ ຮອງປະທານກຳມາທິການວັດທະນະທຳ-ສັງຄົມ ຕາງໜ້າກອງທຶນຊ່ວຍເຫຼືອສັງຄົມຂອງສະພາແຫ່ງຊາດ, ທ່ານ ຄອນປະພັນ ເລືອງສີຈັນທອງ ປະທານສະພາປະຊາຊົນແຂວງຫົວພັນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພະຍານ.         

ເຄື່ອງຊ່ວຍເຫຼືອທີ່ນຳມາມອບຄັ້ງນີ້ ລວມມີເງິນສົດ 100 ລ້ານກີບ ທີ່ໄດ້ຮັບຈາກ: ຄະນະທີ່ປຶກສາສະຫະພັນກິ ລາໝາກແລ້, ຊຸດເຝິກອົບຮົມຄອບຄົວການນໍາ ຊຸດທີ 1 ແລະ ທີມງານສາຍບຸນ 50 ລ້ານກີບ; ຄອບຄົວທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ 30 ລ້ານກີບ; ຄະນະເລຂາທິການສະພາແຫ່ງຊາດ 7 ລ້ານກີບ; ຄອບຄົວທ່ານ ຄຳແພງ ວິລະພັນ 5 ລ້ານ; ບໍລິສັດ ຍອດນິຍົມການຄ້າ ຈໍາກັດຜູ້ດຽວ (ຈໍາໜ່າຍແອມີເດຍ Medea) 5 ລ້ານກີບ; ຄອບຄົວທ່ານ ນາງ ວັນນະລິນ ສຸລິວົງສັກ (ພະນັກງານກົມສື່ມວນຊົນ ສພຊ) 3 ລ້ານກີບ. ເຄື່ອງອຸປະໂພກ-ບໍລິໂພກ ທີ່ໄດ້ຮັບຈາກສະພາແຫ່ງຊາດ ປະກອບມີ: ສາດ 500 ຜືນ, ຜ້າຫົ່ມ 500 ຜືນ, ໝອນນອນ 500 ໜ່ວຍ, ມຸ້ງ 500 ດາງ ລວມມູນຄ່າ 167.5 ລ້ານກີບ; ເຄື່ອງຈາກກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ປະກອບມີ: ເຂົ້າໜ້ຽວ 800 ເປົາ (10 ໂຕນ), ເຂົ້າສຳເລັດຮູບ 20 ແກັດ, ຜ້າຫົ່ມ 10 ຜືນ, ສາດ 10 ຜືນ, ມຸ້ງ 10 ດາງ ລວມມູນຄ່າ 144,015,000 ກີບ; ເຄື່ອງຈາກກະຊວງແຮງງານ ແລະ ສະຫວັດດີການສັງຄົມ ປະກອບມີ: ຖົງຢັ່ງຊີບ 400 ຖົງ, ສະ ບູ 162 ກ້ອນ, ປາກະປອງ 1 ແກັດ (10 ແພັກ), ຢາຖູແຂ້ວ 144 ຫຼອດ (3 ແກັດ), ຢາສະຫົວ 1 ແກັດ, ເຄື່ອງນຸ່ງມືສອງຈຳນວນໜຶ່ງ ລວມມູນຄ່າ 78,890,000 ກີບ; ເຄື່ອງຈາກສະມາຄົມທຸລະກິດຢາ ແລະ ຜະລິດຕະພັນການແພດ ປະກອບມີ: ຢາປົວພະຍາດ 17 ແກັດ ລວມມູນຄ່າ 48.4 ລ້ານກີບ; ເຄື່ອງຈາກມູນນິທິພົງສະຫວັນ ປະກອບມີ: ເຂົ້າ ສານ 10 ກະສອບ, ໝີ່ 37 ກ່ອງ, ຖົງຢັ່ງຊີບ 30 ຖົງ, ປາກະປອງ 5 ກ່ອງ, ເຄື່ອງນຸ່ງມືສອງຈຳນວນໜຶ່ງ ມູນຄ່າ 20 ລ້ານກີບ; ເຄື່ອງຈາກ ຄຳຫຼ້າການຄ້າດອນໜູນ, ໂຮງແຮມ ລາວເທວ, ບໍລິສັດ ຄິງ ຂາອອກ-ຂາເຂົ້າ ບໍລິການສິນຄ້າຜ່ານແດນ ຈຳກັດ ແລະ ກູ້ໄພນະຄອນຫຼວງ 1624 ປະກອບມີ: ຜ້າຫົ່ມ 300 ຜືນ, ໝອນນອນ 200 ໜ່ວຍ, ສາດ 200 ຜືນ, ຖົງຢັ່ງຊີບ 120 ຖົງ ລວມມູນຄ່າ 47.69 ລ້ານກີບ. ເຊິ່ງມູນຄ່າລວມທັງໝົດໃນການຊ່ວຍຄັ້ງນີ້ 606,495,000 ກີບ (ຫົກຮ້ອຍຫົກລ້ານສີ່ຮ້ອຍເກົ້າສິບຫ້າພັນກີບ).

ຈາກນັ້ນ, ຄະນະຍັງໄດ້ເດີນທາງໄປເບິ່ງຕົວຈິງບ່ອນທີ່ຖືກນຳ້ຖ້ວມ ແລະ ມອບເຄື່ອງຊ່ວຍເຫຼືອໃຫ້ພໍ່ແມ່ປະ ຊາຊົນຜູ້ປະສົບໄພຢູ່ບ້ານນາລິວ ແລະ ບ້ານມີສຸກ ເມືອງຊຳເໜືອ ເຊິ່ງເປັນ 2 ບ້ານທີ່ຖືກຜົນກະທົບໜັກ.

(ກົງທະນູຄຳ ພິພັດເສລີ)