(ສພຊ) – ວັນອັງຄານທີ 07 ພຶດສະພາ 2024 ທີ່ສະພາແຫ່ງຊາດ ໄດ້ມີພິທີມອບ-ຮັບໜ້າທີ່ລະຫວ່າງທ່ານ ຮສ. ປອ. ລິນຄຳ ດວງສະຫວັນ ເລຂາທິການສະພາແຫ່ງຊາດ ຜູ້ເກົ່າ ແລະ ທ່ານ ນາງ ອຳໄພວອນ ລ້ອມບຸນແພງ ເລຂາ ທິການສະພາແຫ່ງຊາດ ຜູ້ໃໝ່ ໂດຍການເຂົ້າຮ່ວມເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານຄະນະປະຈໍາ ຜູ້ຊີ້ນຳວຽກງານຄະນະເລຂາທິການສະພາແຫ່ງຊາດ,ເຂົ້າຮ່ວມມີບັນດາທ່ານຄະ ນະປະຈໍາ, ຮອງປະທານກໍາມາທິການ, ຮອງເລຂາທິການ ແລະ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ; ບັນ ດາທ່ານຮອງຫົວໜ້າຫ້ອງວ່າການສູນກາງພັກ ແລະ ຜູ້ຕາງໜ້າຂອງຄະນະຈັດຕັ້ງສູນກາງພັກ, ຮອງຫົວໜ້າຫ້ອງວ່າການສຳນັກງານປະທານປະເທດ ແລະ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ພ້ອມດ້ວຍຄະນະກົມ, ສູນ ແລະ ຫ້ອງການ ທີ່ຂຶ້ນກັບສະພາແຫ່ງຊາດ.

ໃນພິທີ, ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ (ຜູ້ເກົ່າ) ໄດ້ລາຍງານໂດຍສັງເຂບການປະຕິບັດໜ້າທີ່ຂອງຕົນໃນໄລຍະຜ່ານມາ ແລະ ຄາດຄະເນທິດທາງແຜນການຮອດປີ 2025; ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ (ຜູ້ໃໝ່) ໄດ້ກ່າວຮັບໜ້າທີ່ແລະ ໃຫ້ຄຳໝັ້ນໝາຍຈະຈັດຕັ້ງປະຕິບັດໜ້າທີ່ຢ່າງຕັ້ງໜ້າ ແລະ ດ້ວຍຄວາມຮັບຜິດຊອບສູງ. ຫຼັງຈາກນັ້ນ, ກໍໄດ້ມີພິທີລົງນາມເອກະສານມອບ-ຮັບໜ້າທີ່ລະຫວ່າງເລຂາທິການສະພາແຫ່ງຊາດ ຜູ້ເກົ່າ ກັບ ຜູ້ໃໝ່ ໂດຍການຮ່ວມເປັນສັກຂີພະຍານຈາກທ່ານຮອງປະທານສະພາແຫ່ງຊາດ, ບັນດາທ່ານໃນຄະນະປະຈຳ, ການນຳຂອງ 3 ຫ້ອງວ່າການຂັ້ນສູນກາງ ແລະ ຄະນະຈັດຕັ້ງສູນກາງພັກ.

ໃນຕອນທ້າຍພິທີ, ທ່ານ ນາງ ສູນທອນ ໄຊຍະຈັກ ໄດ້ມີບາງຄໍາເຫັນ ໂດຍໄດ້ຊົມເຊີຍຜົນສຳເລັດຂອງທ່ານເລ ຂາທິການສະພາແຫ່ງຊາດຜູ້ເກົ່າ ແລະແນະນຳທ່ານເລຂາທິການສະພາແຫ່ງຊາດຜູ້ໃໝ່ ຮີບຮ້ອນວາງແຜນການເພື່ອສືບ ຕໍ່ນໍາພາ-ຊີ້ນໍາການເຄື່ອນໄຫວວຽກງານໃຫ້ດໍາເນີນໄປເປັນປົກກະຕິ, ດໍາເນີນກອງປະຊຸມພາຍໃນຄະນະເລຂາທິການສະ ພາແຫ່ງຊາດ, ຮຽກຮ້ອງໃຫ້ບັນດາຄະນະນຳຂອງກົມ ກໍຄືພະນັກງານ-ລັດຖະກອນໃນຄະນະເລຂາທິການສະພາແຫ່ງຊາດ ຈົ່ງໄດ້ເພີ່ມທະວີີຄວາມສາມັກຄີເປັນຈິດໜຶ່ງໃຈດຽວພ້ອມກັບເລຂາທິການສະພາແຫ່ງຊາດຜູ້ໃໝ່ ບຸກບືນສູ້ຊົນຈັດຕັ້ງປະຕິບັດໜ້າທີ່ວຽກງານທີ່ຢູ່ໃນຂອບເຂດຄວາມຮັບຜິດຊອບຂອງຕົນ ໃຫ້ມີຜົນສໍາເລັດອັນໃໝ່, ມີຄຸນນະພາບ ແລະ ວ່ອງໄວທັນເວລາ; ເອົາໃຈໃສ່ເປັນໃຈກາງປະສານສົມທົບ ແລະ ຕິດຕາມຊຸກຍູ້ບັນດາກໍາມາທິການ ແລະ ພາກສ່ວນກ່ຽວຂ້ອງຕ່າງໆ ກະກຽມດ້ານເນື້ອໃນໃຫ້ແກ່ການດໍາເນີນກອງປະຊຸມສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດ; ເອົາໃຈໃສ່ສືບຕໍ່ການບໍາລຸງຍົກລະດັບວິຊາການດ້ານຕ່າງໆ ໃຫ້ແກ່ພະນັກງານ-ລັດຖະກອນຂອງຄະນະເລຂາ ທິການສະພາແຫ່ງຊາດ ຢ່າງເປັນປົກກະຕິຕໍ່ເນື່ອງ ເພື່ອເຮັດໃຫ້ການປະຕິບັດໜ້າທີ່ວຽກງານຂອງຄະນະເລຂາທິການສະພາແຫ່ງຊາດ ມີປະສິດທິຜົນ, ຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່.

(ຂ່າວ-ພາບ: ນາງ ອາລິນ ສຸພິມມະປະດິດ)