(ສພຊ) ໃນຕອນເຊົ້າວັນທີ 20 ກຸມພາຜ່ານມາ ທີ່ສະພາແຫ່ງຊາດ ນະຄອນຫລວງວຽງຈັນ, ໄດ້ມີພິທີພົບປະສອງຝ່າຍ ສປປລາວ-ສ.ເຊັກ ເຊິ່ງຝ່າຍລາວນຳໂດຍທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປລາວ, ຝ່າຍ ສ.ເຊັກ ນຳໂດຍທ່ານ ຣາເດັກ ວອນດຣາເຊັກ ປະທານສະພາຜູ້ແທນລາສະດອນແຫ່ງ ສາທາລະນະລັດເຊັກ; ໃນໂອກາດທີ່ເດີນທາງມາຢ້ຽມຢາມຢ່າງເປັນທາງການຢູ່ ສປປລາວ ລະຫວ່າງວັນທີ 19-22 ກຸມພາ 2020.

ໃນການພົບປະ, ທັງສອງຝ່າຍໄດ້ແຈ້ງສະພາບເສດຖະກິດ-ສັງຄົມ ແລະ ການເຄື່ອນໄຫວຂອງອົງການນິຕິບັນຍັດໃຫ້ກັນ ແລະ ກັນ ຊາບ ໂດຍສັງເຂບ; ທ່ານປະທານສະພາແຫ່ງຊາດລາວ ໄດ້ມີຄຳເຫັນວ່າ: ໃນການມາຢ້ຽມຢາມ ແລະ ເຮັດວຽກຂອງຄະນະຜູ້ແທນຂັ້ນສູງຂອງສະພາຜູ້ແທນລາສະດອນ ສ.ເຊັກ ໃນຄັ້ງນີ້ ແມ່ນມີຄວາມໝາຍສໍາຄັນຍິ່ງ, ຖືໄດ້ວ່າເປັນຄັ້ງປະຫວັດສາດຂອງການຢ້ຽມຢາມແລກປ່ຽນ ລະຫວ່າງສອງອົງການນິຕິບັນຍັດ ນັບແຕ່ທັງສອງປະເທດໄດ້ສ້າງຕັ້ງສາຍພົວພັນການທູດນໍາກັນ ໃນປີ 1962 ເປັນຕົ້ນມາ, ພ້ອມທັງເປັນການປະ ກອບສ່ວນສໍາຄັນເຂົ້າໃນການສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ລະຫວ່າງ ສປປລາວ ແລະ ສ. ເຊັກ ກໍຄືລະຫວ່າງສອງອົງການນິຕິບັນຍັດໃຫ້ມີການຂະຫຍາຍຕົວໃນທ່ວງທ່າໃໝ່; ພ້ອມນັ້ນ, ຈະເປັນໂອກາດທີ່ດີໃຫ້ແກ່ຜູ້ປະກອບການທັງສອງປະເທດ ລາວ ແລະ ເຊັກ ໄດ້ຮ່ວມກັນປຶກສາຫາລື, ຊອກຫາໂອກາດໃນການຮ່ວມມືກັນ ດຳເນີນທຸລະກິດຕາມທ່າແຮງ ແລະ ຄວາມຕ້ອງການຂອງແຕ່ລະຝ່າຍ ເພື່ອປະກອບສ່ວນເຂົ້າໃນການເພີ່ມທະວີການຮ່ວມມືທາງດ້ານເສດຖະກິດ-ການຄ້າ, ການລົງທຶນ, ການທ່ອງທ່ຽວ ໃຫ້ເປັນຮູບປະທຳເທື່ອລະກ້າວ; ໃນໄລຍະຜ່ານມາ, ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດລາວ-ເຊັກ ສືບຕໍ່ໄດ້ຮັບການເສີມຂະຫຍາຍ, ເຊິ່ງນອກຈາກການແລກປ່ຽນສານອວຍພອນເຊິ່ງກັນແລະກັນໃນໂອກາດສໍາຄັນ ຍັງໄດ້ມີການແລກປ່ຽນຢ້ຽມຢາມຂອງຄະນະຜູ້ແທນຂອງສອງປະເທດ; ລັດຖະບານ ສາທາລະນະລັດເຊັກ ຍັງໄດ້ໃຫ້ການສະໜັບສະໜູນເງິນກູ້ຜ່ອນຜັນ ຮ່ວມກັບຄູ່ຮ່ວມພັດທະນາອື່ນໆແກ່ລັດຖະບານລາວ ເພື່ອກໍ່ສ້າງໂຮງໝໍມິດຕະພາບທັນສະໄໝ ຢູ່ນະຄອນຫລວງວຽງຈັນ. ພ້ອມນັ້ນ, ສ.ເຊັກ ຍັງໄດ້ໃຫ້ການຊ່ວຍເຫລືອລາວຫລາຍດ້ານ ເປັນຕົ້ນການພັດທະນາຊັບພະຍາກອນມະນຸດ, ທຶນການສຶກສາແກ່ນັກສຶກສາລາວ ໃນລະດັບຕ່າງໆ. ນອກນັ້ນ, ທັງສອງປະເທດຍັງໄດ້ໃຫ້ການຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ຢູ່ໃນເວທີພາກພື້ນ ແລະ ສາກົນ.

ທ່ານປະທານສະພາແຫ່ງຊາດລາວ ຍັງມີຄຳເຫັນຕື່ມເພື່ອສືບຕໍ່ເພີ່ມທະວີການພົວພັນຮ່ວມມື ລະຫວ່າງສອງສະພາແຫ່ງຊາດ ລາວ-ເຊັກ ໃຫ້ມີການຂະຫຍາຍຕົວຫລາຍຂຶ້ນ ພ້ອມທັງສະເໜີທິດທາງການພົວພັນຮ່ວມມື ລະຫວ່າງສອງອົງການນິຕິບັນຍັດດັ່ງນີ້: ສືບຕໍ່ເພີ່ມທະວີການແລກປ່ຽນ ແລະ ການຮ່ວມມືລະຫວ່າງສອງສະພາແຫ່ງຊາດ ໃນວຽກງານດ້ານນິຕິບັນຍັດ ລວມທັງການແລກປ່ຽນຂໍ້ມູນ-ຂ່າວສານ ທີ່ແຕ່ລະຝ່າຍມີຄວາມສົນໃຈ ໂດຍຜ່ານການຢ້ຽມຢາມຂອງຄະນະຜູ້ແທນຂັ້ນສູງ, ຂັ້ນກໍາມາທິການ ຈົນເຖິງຂັ້ນວິຊາການນໍາກັນ; ສະເໜີໃຫ້ລັດຖະສະພາ ແຫ່ງ ສ. ເຊັກ ພິຈາລະນາສ້າງຕັ້ງຄະນະມິດຕະພາບລັດຖະສະພາ ສ.ເຊັກ-ລາວ ເພື່ອເປັນກົນໄກໃຫ້ແກ່ການຊຸກຍູ້ ແລະ ສົ່ງເສີມການພົວພັນຮ່ວມມືລະຫວ່າງສອງອົງການນິຕິບັນຍັດ ໃຫ້ມີປະສິດທິຜົນກວ່າເກົ່າ, ສໍາລັບສະພາແຫ່ງຊາດລາວ ແມ່ນໄດ້ມີຄະນະມິດຕະພາບລັດຖະສະພາ ລາວ-ເອີຣົບ ເຊິ່ງຮັບຜິດຊອບທັງ ສ.ເຊັກ ນໍາ. ສືບຕໍ່ແລກປ່ຽນປຶກສາຫາລື ແລະ ສະໜັບສະໜູນເຊິ່ງກັນ ແລະ ກັນ ທັງແບບສອງຝ່າຍ ແລະ ຫລາຍຝ່າຍ ໃນການເຄື່ອນໄຫວຢູ່ເວທີລັດຖະສະພາພາກພື້ນ ແລະ ສາກົນ ຕາມຄວາມເໝາະສົມ.

ໃນການມາຢ້ຽມຢາມ ແລະ ເຮັດວຽກຂອງທ່ານ ຣາເດັກ ວອນດຣາເຊັກ ພ້ອມດ້ວຍຄະນະຜູ້ແທນຂັ້ນສູງຂອງສະພາຜູ້ແທນລາສະດອນ ສ.ເຊັກ ໃນຄັ້ງນີ້, ທ່ານຍັງໄດ້ເຂົ້າຢ້ຽມຂໍ່ານັບ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປລາວ, ພົບປະກັບທ່ານ ທອງລຸນ ສີສຸລິດ ນາຍົກລັດຖະມົນຕີ, ພົບປະເຮັດວຽກກັບລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ລັດຖະມົນຕີກະຊວງພະລັງງານ ແລະ ບໍ່ແຮ່, ເຈົ້າແຂວງໆຫລວງພະບາງ ແລະ ຍັງເຂົ້າຮ່ວມກອງປະຊຸມສຳມະນາກ່ຽວກັບການດຳເນີນທຸລະກິດຢູ່ ສປປລາວ ທີ່ສະພາການຄ້າ ແລະ ອຸດສາຫະກຳແຫ່ງຊາດ, ນອກຈາກນີ້ ກໍຍັງໄດ້ທ່ຽວຊົມພື້ນຖານເສດຖະກິດ-ວັດທະນະທຳ-ສັງຄົມຢູ່ນະຄອນຫລວງວຽງຈັນ ແລະ ແຂວງຫລວງພະບາງ.