(ສພຊ) ຕອນເຊົ້າວັນທີ 16 ທັນວາ 2019 ທີ່ສະພາແຫ່ງຊາດ (ສພຊ) ໄດ້ມີພິທີພົບປະສອງຝ່າຍລາວ-ຍີ່ປຸ່ນ ເຊິ່ງຝ່າຍລາວນໍາໂດຍທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ແຫ່ງ ສປປລາວ ແລະ ຝ່າຍຍີ່ປຸ່ນນໍາໂດຍທ່ານ ໂອກາວະ ໂຕຊິໂອະ (OGAWA Toshio) ຮອງປະທານສະພາສູງຍີ່ປຸ່ນ ມີບັນດາຄະນະຜູ້ແທນທັງສອງຝ່າຍເຂົ້າຮ່ວມ.

ຈຸດປະສົງຂອງການພົບປະໃນຄັ້ງນີ້ ເພື່ອເປັນການສືບຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານຂອງສອງປະເທດ ລາວ-ຍີ່ປຸ່ນ ເວົ້າລວມ, ເວົ້າສະເພາະແມ່ນລະຫວ່າງສະພາແຫ່ງຊາດລາວ ແລະ ສະພາສູງຍີ່ປຸ່ນ ແລະ ເພື່ອພົບປະແລກປ່ຽນບົດຮຽນໃນການປະຕິບັດພາລະບົດບາດ, ສິດ ແລະ ໜ້າທີ່ໃນຂົງເຂດວຽກງານນິຕິບັນຍັດ ລະຫວ່າງສະພາແຫ່ງຊາດລາວ ກັບສະພາສູງຍີ່ປຸ່ນ.

ໂອກາດດັ່ງກ່າວ ທ່ານ ບຸນປອນ ບຸດຕະນະວົງ ໄດ້ກ່າວຕ້ອນຮັບອັນອົບອຸ່ນຕໍ່ຄະນະຂອງທ່ານ ໂອກາວະ ໂຕຊິໂອະ ພ້ອມທັງຕີລາຄາສູງທີ່ທ່ານຮອງປະທານສະພາສູງຍີ່ປຸ່ນ ພ້ອມດ້ວຍຄະນະ ໄດ້ເລືອກເອົາ ສປປລາວ ເປັນປະເທດທໍາອິດໃນການເຄື່ອນໄຫວຢ້ຽມຢາມຕ່າງປະເທດ ພາຍຫລັງທີ່ໄດ້ຮັບເລືອກຕັ້ງເປັນຮອງປະທານສະພາສູງຍີ່ປຸ່ນ ເປັນການນໍາເອົາໄມຕີຈິດມິດຕະພາບຈາກສະພາສູງ ກໍຄືປະຊາຊົນຍີ່ປຸ່ນ ມາສູ່ສະພາແຫ່ງຊາດລາວ ກໍຄືປະຊາຊົນລາວບັນດາເຜົ່າ  ການເດີນທາງມາຢ້ຽມຢາມ ສປປລາວ ໃນຄັ້ງນີ້ ເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ແລະ ແຈ້ງໃຫ້ຮູ້ກ່ຽວກັບສະພາບຂອງ ສປປລາວ ແລະ ສະພາແຫ່ງຊາດລາວ, ການພົວພັນຮ່ວມມືລາວ-ຍີ່ປຸ່ນ, ການພົວພັນລະຫວ່າງສະພາແຫ່ງຊາດລາວ ແລະ ລັດຖະສະພາຍີ່ປຸ່ນ ໂດຍສັງເຂບ.

ທ່ານ ໂອກາວະ ໂຕຊິໂອະ ກໍໄດ້ກ່າວສະແດງຄວາມຂອບໃຈຕໍ່ທ່ານ ຮອງປະທານສະພາແຫ່ງຊາດລາວ ທີ່ໄດ້ເສຍສະຫລະເວລາອັນມີຄຸນຄ່າຕ້ອນຮັບຄະນະຂອງຕົນ ເຊິ່ງມີຄວາມພາກພູມໃຈຫລາຍຕໍ່ການເດີນທາງມາຢ້ຽມຢາມ ສປປລາວ ໃນຄັ້ງນີ້ ປະເທດລາວມີຄວາມສວຍສົດງົດງາມ, ອາກາດດີຫລາຍ ພ້ອມທັງກ່າວວ່າຖ້າມີເວລາຫລາຍກວ່ານີ້ ຈະນໍາພາຄະນະທ່ອງທ່ຽວ ແລະ ແລກປ່ຽນສຶກສາວັດທະນະທໍາການດໍາລົງຊີວິດຂອງປະຊາຊົນລາວບັນດາເຜົ່າຢູ່ແຕ່ລະແຂວງ ຈາກນັ້ນ, ທັງສອງຝ່າຍກໍໄດ້ປຶກສາຫາລືແລກປ່ຽນບົດຮຽນຮ່ວມກັນທີ່ຕ່າງຝ່າຍໃຫ້ຄວາມສົນໃຈ ເປັນຕົ້ນແມ່ນບັນຫາທາງດ້ານການຮ່ວມມືລາວ-ຍີ່ປຸ່ນ, ການຊ່ວຍເຫລືອທາງດ້ານໂຄງການຕ່າງໆ, ການລົງທຶນຂອງນັກລົງທຶນຍີ່ປຸ່ນມາລົງທຶນຢູ່ ສປປລາວ, ການແລກປ່ຽນຄະນະຜູ້ແທນຢ້ຽມຢາມເຊິ່ງກັນ ແລະ ກັນຂອງສອງສະພາແຫ່ງຊາດລາວ-ຍີ່ປຸ່ນ.