(ສພຊ) ວັນທີ 23 ເມສາ 2018, ທີ່ສະພາແຫ່ງຊາດ ໄດ້ມີການພົບປະສອງຝ່າຍ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ກັບ ສາທາລະນະລັດ ສັງຄົມນິຍົມ ປະຊາທິປະໄຕ ສີລັງກາ (ສສປ.ສີລັງກາ); ຝ່າຍລາວນຳໂດຍພະນະທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປລາວ; ຝ່າຍສີລັງການຳໂດຍພະນະທ່ານ ກາຣູ ຈາຍາສຸລິຍາ ປະທານລັດຖະສະພາແຫ່ງ ສສປ.ສີລັງກາ ໃນໂອກາດທີ່ມາຢ້ຽມຢາມສັນຖະວະໄມຕີຢ່າງເປັນທາງການ ທີ່ ສປປລາວ ໃນລະຫວ່າງວັນທີ 21-24 ເມສາ 2018 ເພື່ອເປັນການກະກຽມໃຫ້ແກ່ການສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 53 ປີ (20 ກໍລະກົດ 1965-20 ກໍລະກົດ 2018).

ໃນການພົບປະຄັ້ງນີ້, ສອງຝ່າຍໄດ້ລາຍງານສະພາບການພັດທະນາເສດຖະກິດ-ສັງຄົມຂອງຕົນໃຫ້ກັນ ແລະ ກັນຊາບ; ພ້ອມນັ້ນ, ຍັງໄດ້ມີການສົນທະນາແລກປ່ຽນບັນຫາທີ່ທັງສອງຝ່າຍໃຫ້ຄວາມສົນໃຈ ເປັນຕົ້ນແມ່ນພື້ນຖານໂຄງລ່າງໃນການພັດທະນາແບບຍືນຍົງ, ການທ່ອງທ່ຽວ, ວັດທະນະທຳ ເພາະວ່າສອງປະເທດລາວ ແລະ ສີລັງກາ ມີຮີດຄອງປະເພນີ ແລະ ວັດທະນະທຳທີ່ຄ້າຍຄືກັນ.

ໂອກາດດຽວກັນ, ປະທານສະພາແຫ່ງຊາດລາວ ໄດ້ສະແດງຄວາມຍິນດີຕ້ອນຮັບ ແລະ ຕີລາ ຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອມາແຕ່ດົນນານລະຫວ່າງສອງປະ ເທດເວົ້າລວມ, ເວົ້າສະເພາະແມ່ນລະຫວ່າງສອງອົງການນິຕິບັນຍັດ ລາວ-ສີລັງກາ ທີ່ໄດ້ມີພື້ນຖານ ແລະ ມີຖ່ວງທ່າຂະຫຍາຍຕົວດີ ເປັນຕົ້ນແມ່ນສອງປະເທດໄດ້ສ້າງຕັ້ງສະມາຄົມມິດຕະພາບລາວ-ສີລັງ ກາ, ສີລັງກາ-ລາວ; ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງການນຳ ແລະ ເຈົ້າໜ້າທີ່ຂັ້ນສູງ ແລະ ຂະແໜງການຕ່າງໆ ເຊິ່ງເປັນກົນໄກທີ່ສຳຄັນໃນການຊຸກຍູ້ການພົວພັນຮ່ວມມືລະຫວ່າງສອງອົງການນິຕິບັນຍັດໃຫ້ເປັນຮູບປະທຳ ແລະ ມີປະສິດທິຜົນ; ພ້ອມທັງສະເໜີໃຫ້ສອງອົງການນິຕິ ບັນຍັດສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນຂອງຜູ້ແທນໃນລະດັບຕ່າງໆ, ແລກປ່ຽນຂໍ້ມູນ-ຂ່າວສານ ແລະ ບົດຮຽນໃນຂົງເຂດນິຕິບັນຍັດ ເຊິ່ງທັງສອງຝ່າຍມີຄວາມສົນໃຈ; ສະເໜີໃຫ້ພິຈາ ລະນາ ແລະ ໃຫ້ການສະໜັບສະໜູນທຶນເຝິກອົບຮົມພາສາອັງກິດໃຫ້ແກ່ວິຊາການຂອງສະພາແຫ່ງຊາດລາວ; ສະເໜີໃຫ້ສອງອົງການນິຕິບັນຍັດລາວ-ສີລັງກາ ຮ່ວມມືກັນເພື່ອຊຸກຍູ້ລັດຖະບານສອງປະ ເທດສືບຕໍ່ຈັດຕັ້ງປະຕິບັດບົດບັນທຶກການຮ່ວມມື ທີ່ໄດ້ເຊັນກັນໃນໄລຍະຜ່ານມາ ກໍຄືໃນຕໍ່ໜ້າໃຫ້ໄດ້ຮັບການຈັດຕັ້ງປະຕິບັດຢ່າງມີໝາກຜົນ; ໃຫ້ການສະໜັບສະໜູນເຊິ່ງກັນ ແລະ ກັນໃນເວທີລັດຖະສະ ພາສາກົນ ແລະ ພາກພື້ນ ໂດຍສະເພາະໃນຂອບສອງຝ່າຍ ແລະຫລາຍຝ່າຍ ເພື່ອນຳເອົາຜົນປະໂຫຍດມາສູ່ຜົນປະໂຫຍດຂອງປະຊາຊົນຂອງຕົນ ທັງເປັນການປະກອບສ່ວນສຳຄັນເຂົ້າໃນການເສີມສ້າງສັນ ຕິພາບ, ສະຖຽນລະພາບ, ມິດຕະພາບ ແລະ ການຮ່ວມມືແຫ່ງການພັດທະນາແບບຍືນຍົງໃນພາກພື້ນ ແລະ ສາກົນ.

ພ້ອມນັ້ນ, ປະທານລັດຖະສະພາສີລັງກາ ພ້ອມດ້ວຍຄະນະ ຍັງໄດ້ຢ້ຽມຢາມ ແລະ ພົບປະກັບທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປລາວ; ເຂົ້າຢ້ຽມຂໍ່ານັບທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປລາວ; ພ້ອມທັງພົບປະເຮັດວຽກກັບກະຊວງຖະແຫລງຂ່າວ, ວັດທະນະ ທຳ ແລະ ທ່ອງທ່ຽວ; ກະຊວງການຕ່າງປະເທດ; ກະຊວງແຜນການ ແລະ ການລົງທຶນ; ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ຢ້ຽມຊົມສະຖານທີ່ທາງປະຫວັດສາດ ແລະ ວັດທະນະທຳ ໃນນະຄອນຫລວງວຽງຈັນ.

(ນາງ ອາລິນ ສຸພິມມະປະດິດ)