ໃນວັນທີ 19-22 ສິງຫາ 2024 ນີ້ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແລະ ສະມາຊິກສະພາປະຊາຊົນແຂວງຈໍາປາສັກ ເຄື່ອນໄຫວພົບປະຢ້ຽມຢາມປິຊາຊົນຢູ່ຫຼາຍບ້ານ ຂອງເຂດເລືອກຕັ້ງເມືອງປາກຊ່ອງ ນໍາໂດຍ ທ່ານ ປອ. ສົມໄຊ ສີຫາຈັກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ຄະນະປະຈໍາສະພາປະຊາຊົນແຂວງຈໍາປາສັກ ທັງເປັນປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສົມທົບກັບ ທ່ານ ນາງ ບອນຄໍາ ເວີຍໂພຄໍາ ຮອງເລຂາພັກເມືອງ, ປະທານອົງການກວດກາລັດເມືອງ ທັງເປັນສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກຊ່ອງ ແລະ ທ່ານ ບຸນລິດ ເທບບຸນສູງ ຮອງເຈົ້າເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກຊ່ອງ ລົງເຄື່ອນໄຫວຈຸດບ້ານພູໝາກກໍ່, ບ້ານວັດຫຼວງ, ບ້ານໜອງຕວງ, ບ້ານຫ້ວຍກອງ+ໜອງອີອີໂອຍ, ບ້ານລິເຈືອງ, ບ້ານຫ້ວຍສາດ, ບ້ານໂນນຈັນ ແລະ ສໍານັກງານປົກຄອງເມືອງປາກຊ່ອງ.

ໃນໂອກາດລົງພົບປະຢ້ຽມຢາມພໍ່ແມ່ປະຊາຊົນໃນຄັ້ງນີ້ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາເອົາບັນດາເນື້ອໃນສໍາຄັນ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 07 ຂອງສະພາແຫ່ງຊາດຊຸດທີ 9 ແລະ ສະພາປະຊາຊົນແຂວງຈໍາປາສັກ ລວມທັງແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຜີຍແຜ່ໃຫ້ອໍານາດການປົກຄອງ ແລະ ພໍ່ແມ່ປະຊາຊົນມີຄວາມຮັບຮູ້, ເຊື່ອມຊຶມຢ່າງເລິກເຊິ່ງ ຕິດພັນກັບການເກັບກໍາຄໍາຄິດເຫັນ, ຄໍາສະເໜີຂອງຜູ້ມີສິດເລືອກຕັ້ງໃນເຂດດັ່ງກ່າວ ເພື່ອນໍາໄປຊຸກຍູ້ອົງການປົກຄອງ ກໍ່ຄືຂະແໜງການທີ່ກ່ຽວຂ້ອງຂັ້ນຕ່າງໆແກ້ໄຂ.