ພິທີເປີດການຂຸດຄົ້ນແຮ່ທອງ ຂອງບໍລິສັດ ພູຄໍາມາຍນີ້ງ ຈໍາກັດ ໄດ້ຈັດຂຶ້ນໃນຕອນເຊົ້າວັນທີ 24 ທັນວາ 2024, ຢູ່ທີ່ເຂດຂຸດຄົ້ນແຮ່ທອງ ບ້ານນາງາມ, ເມືອງໄຊ, ແຂວງອຸດົມໄຊ ໂດຍການເຂົ້າຮ່ວມຂອງທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີຜູ້ອຳນວຍການບໍລິສັດ ພູຄໍາມາຍນີ້ງ ຈໍາກັດ ພ້ອມດ້ວຍຄະນະ, ຂະແໜງການທີ່ກ່ຽວຂ້ອງຂັ້ນແຂວງ ແລະ ເມືອງໄຊ ເຂົ້າຮ່ວມ.

ບໍລິສັດ ພູຄໍາມາຍນີ້ງ ຈໍາກັດ ເປັນບໍລິສັດລົງທຶນພາຍໃນ 100% ພາຍຫຼັງສໍາເລັດການຊອກຄົ້ນ-ສໍາຫຼວດ ແລະ ຮັບຮອງບົດວິພາກເສດຖະກິດເຕັກນິກຈາກກົມຄຸ້ມຄອງບໍ່ແຮ່ ກະຊວງພະລັງງານ ແລະ ບໍ່ແຮ່ແລ້ວ ບໍລິສັດໄດ້ເຊັນສັນຍາສໍາປະທານຂຸດຄົ້ນ ແລະ ປຸງແຕ່ງແຮ່ທອງ ກັບລັດຖະບານຄັ້ງວັນທີ 4 ສິງຫາ 2022 ຢູ່ເຂດພູຫຍ້າຄາ ບ້ານນາງາມ, ເມືອງໄຊ, ແຂວງອຸດົມໄຊ ມີເນື້ອທີ່ທັງໝົດ 200 ເຮັກຕາ ແລະ ມີອາຍຸໂຄງການ 13 ປີ, ໃນນັ້ນ ໄລຍະກໍ່ສ້າງ 2 ປີ, ໄລຍະຂຸດຄົ້ນ ແລະ ປຸງແຕ່ງ 10 ປີ, ໄລຍະຟື້ນຟູເນື້ອທີ່ ແລະ ການປິດບໍ່ແຮ່ 01 ປີ(ໂຄງການດັ່ງກ່າວມີອາຍຸການຮອດປີ 2035).

ພາຍຫຼັງເຊັນສັນຍາ, ບໍລິສັດໄດ້ເປີດກອງປະຊຸມເຜີຍແຜ່ສັນຍາສໍາປະທານຂຶ້ນທີ່ແຂວງອຸດົມໄຊ, ໂດຍມີບັນດາຜູ້ແທນ ຈາກບັນດາຂະແໜງການອ້ອມຂ້າງແຂວງ, ເມືອງ, ອົງການປົກຄອງບ້ານ ແລະ ບ້ານໃກ້ຄຽງເຂົ້າຮ່ວມ. ເພື່ອໃຫ້ຖືກຕ້ອງ ແລະ ສອດຄ່ອງກັບລະບຽບ, ຫຼັກການ ແລະ ກົດໝາຍ ທາງກົມຄຸ້ມຄອງບໍ່ແຮ່ ກະຊວງພະລັງງານ ແລະ ບໍ່ແຮ່ ໄດ້ສົມທົບກັບພະແນກພະລັງງານ ແລະ ບໍ່ແຮ່ ແຂວງອຸດົມໄຊ ລົງປັກຫຼັກໝາຍເຂດສໍາປະທານເພື່ອການຂຸດຄົ້ນຂອງບໍລິ ສັດ ຕາມລະບຽບການ.

ພາບ/ຂ່າວ: ສພຂ.