ຕອນແລງ ວັນທີ 7 ທັນວາ 2023 ຜ່ານມານີ້ພະແນກສຶກສາທິການ ແລະ ກິລາ ແຂວງຫົວພັນ ໄດ້ຈັດພິທີ ເຊັນສັນຍາໂຄງການກໍ່ສ້າງອາຄານຮຽນ, ຫໍພັກຄູ – ນັກຮຽນ, ເຮືອນຄົວ, ຫ້ອງນ້ຳ ແລະ ຮົ້ວໂຮງຮຽນມັດທະຍົມສົມບູນ ບ້ານເມືອງລ້ອງ ເມືອງສົບເບົາ ແຂວງຫົວພັນ ລະຫວ່າງ ພະແນກສຶກສາທິການ ແລະ ກິລາ ແຂວງຫົວພັນ ກັບ ບໍລິສັດ ຄູນຄຳກໍ່ສ້າງ ແລະ ສ້ອມແປງເຄຫາສະຖານ ຂົວທາງຊົນລະປະທານ ຈຳກັດຜູ້ດຽວ

            ໂດຍການເຂົ້າຮ່ວມ ຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ ຮອງເລຂາພັກແຂວງ ປະທານ ສະພາປະຊາຊົນ ແຂວງຫົວພັນ, ມີທ່ານມົນທອງ ລຽນຕິຄຸນ ກຳມະການພັກແຂວງ ຫົວໜ້າ ພະແນກສຶກສາທິການ ແລະ ກິລາແຂວງ, ທ່ານ ໄຊຍະແສງ ຊົງຢົງຢາ ເຈົ້າເມືອງ ເມືອງສົບເບົາ, ປະທານບໍລິສັດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ໂຄງການກໍ່ສ້າງດັ່ງກ່າວນແມ່ນໄດ້ມາຈາກແຫຼ່ງ ທຶນຊ່ວຍເຫຼືອ ຂອງກອງທຶນຈີນ ເພື່ອສັນຕິພາບ ແລະ ການພັດທະນາ ຈາກ ລັດຖະບານ ສປ ຈີນ ລວມມູນຄ່າ ການກໍ່ສ້າງທັງໝົດ 373.000 US ( ສາມແສນເຈັດສິບສາມພັນໂດລາ) ໂດຍແມ່ນ ບໍລິສັດ ຄູນຄໍາກໍ່ສ້າງ ແລະ ສ້ອມແປງເຄຫາສະຖານ ຂົວທາງຊົນລະປະທານ ຈຳກັດຜູ້ດຽວ ເປັນຜູ້ຮັບເໝົາໃນການກໍ່ສ້າງ ມີ 7 ໜ້າວຽກຫຼັກດັ່ງນີ້:1. ວຽກກໍ່ສ້າງອາຄານຮຽນ 1 ຫຼັງ ມີ 7 ຫ້ອງຮຽນ, 1 ຫ້ອງຄອມຜິວເຕີ; 2.ວຽກກໍ່ສ້າງອາຄານຫໍພັກຄູ 1ຫຼັງ; 3.ວຽກກໍ່ສ້າງອາຄານຫໍພັກນັກຮຽນ 1ຫຼັງ; 4. ວຽກກໍ່ສ້າງເຮືອນຄົວ 1ຫຼັງ; 5 ວຽກກໍ່ສ້າງຫ້ອງນຳ້ 2ຫຼັງ; 6 ວຽກສະໜອງນ້ຳ ແລະ ຂົມອາຈົມ; 7.ວຽກຮົ້ວອ້ອມ, ປະຕູ, ປ້ອງຢ້ຽມ, ປ້າຍຊື່ໂຮງຮຽນ, ເທເດີ່ນ ຈະໃຊ້ເວລາໃນການກໍ່ສ້າງທັງໝົດ 12 ເດືອນຈຶ່ງຈະສຳເລັດ

ຕອນທ້າຍພິທີ ທ່ານ ນາງ ອຳໄພວອນ ລ້ອມບຸນແພງ ຍັງໄດ້ຮຽກຮ້ອງໃຫ້ ເຈົ້າຂອງໂຄງການ ແລະ ຜູ້ຮັບເໝົາກໍ່ສ້າງໂຄງການດັ່ງກ່າວພ້ອມກັນເອົາໃຈໃສ່ຊຸຸກຍູ່ຕິດຕາມໃນການກໍ່ສ້າງໃຫ້ຖືກຕ້ອງຕາມຫຼັກວິຊາການ, ຖືກຕາມເຕັກນິກໃຫ້ໄດ້ມາດຕະຖານ ຕາມເຕັກນິກໃນການອອກແບບ ຮັບປະກັນຄຸນນະພາບ ເພື່ອນໃຫ້ລູກຫຼານໃນເຂດດັ່ງກ່າວມີໂຮງຮຽນງາມ ແລະ ທັນສະໄໝ ແລະ ສາມາດໃຊ້ໄດ້ຍາວນານ.

ພາບ ແລະ ຂ່າວ: ສພຂ ຫົວພັນ