ຕອນບ່າຍຂອງວັນທີ 16 ມີນາ 2022 ທີ່ຫ້ອງປະຊຸມສະພາປະຊາຊົນແຂວງ ໄດ້ມີພິທີເຊັນບົດບັນທຶກການປະສານງານລະຫວ່າງ ຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ກັບ ອົງການກວດສອບ ປະຈໍາພາກເໜືອ ໂດຍການເປັນ ປະທານຮ່ວມ ຂອງທ່ານ ຊົມຊື່ນ ໄຊເກີຢາຈົງຕົວ ປະທານອົງການກວດສອບປະຈໍາພາກເໜືອ ແລະ ທ່ານ ສົມຈິດ ຫັບລະກອນ ຮອງປະທານຄະນະປະຈໍາສະພາປະຊາຊົນແຂວງ ມີທີມງານຈາກອົງການກວດສອບພາກເໜືອ, ຄະນະປະຈໍາສະພາປະຊາຊົນຊົນແຂວງ, ຮອງປະທານຄະນະກໍາມະການສະພາປະຊາຊົນແຂວງ, ຮອງເລຂາທິກການສະພາປະຊາຊົນແຂວງ ພ້ອມດ້ວຍພະນັກງານ-ລັດຖະກອນພາຍໃນຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງຜົ້ງສາລີ ເຂົ້າຮ່ວມ.

ພິທີຄັ້ງນີ້ ຈັດຂຶ້ນເພື່ອສ້າງເງື່ອນໄຂໃຫ້ແກ່ການພົວພັນປະສານ ລະຫວ່າງ ຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ກັບ ອົງການກວດສອບ ປະຈໍາພາກເໜືອ ໃນການຄົ້ນຄວ້າ, ປືກສາຫາລື, ແລກປ່ຽນຂໍ້ມູນຂ່າວສານ ໂດຍສະເພາະ ການສ້າງບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ ຂອງແຂວງຜົ້ງສາລີ, ບົດສະຫຼຸບການເຄື່ອນໄຫວວຽກງານຂອງອົງການກວດກວດສອບປະຈໍາພາກເໜືອ ແລະ ວຽກງານອື່ນໆ ໃຫ້ທັນກັບກໍານົດເວລາ. ຊິ່ງໃນພິທີ ທາງອົງການກວດສອບປະຈໍາເໜືອ ແລະ ສະພາປະຊາຊົນແຂວງ ກໍຄືຄະນະກໍາມະການເສດຖະກິດແຜນການ ແລະ ການເງິນ ໄດ້ແລກປ່ຽນບົດຮຽນການພົວພັນປະສານງານຕໍ່ຮ່າງບົດບັນທຶກດັ່ງກ່າວ ຢ່າງກົງໄປກົງມາ ທັງນີ້ກໍເພື່ອໃຫ້ບົດບັນທຶກມີຄວາມຮັດກຸມ, ສອດຄ່ອງກັບສະພາບການຈັດຕັ້ງປະຕິບັດວຽກງານໃນປະຈຸບັນ. ຈາກນັ້ນໄດ້ມີ ພິທີເຊັນບົດບັນທຶກການປະສານງານລະຫວ່າງ ທ່ານ ນາງ ຈັນມະນີ ດວງພາສຸກ ປະທານຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ແລະ ທ່ານ ຊົມຊື່ນ ໄຊເກີຢາຈົງຕົວ ປະທານ ອົງການກວດສອບ ປະຈໍາພາກເໜືອ ໂດຍການເປັນສັກຂີພິຍານຈາກ ຄະນະປະຈໍາສະພາປະຊາຊົນຊົນແຂວງ, ຮອງປະທານຄະນະກໍາມະການ ສະພາປະຊາຊົນແຂວງ, ຮອງເລຂາທິກການສະພາປະຊາຊົນແຂວງ ພ້ອມດ້ວຍພະດ້ວຍພະນັກງານ-ລັດຖະກອນພາຍໃນຄະນະກໍາມະການເສດຖະກິດ, ແຜນການ ແລະ ການເງິນ.

ກ່ອນໜ້ານັ້ນ ທ່ານ ຊົມຊື່ນ ໄຊເກີຢາຈົງຕົວ ປະທານອົງການກວດສອບປະຈໍາພາກເໜືອ ໄດ້ເຂົ້າພົບທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ ທີ່ຫ້ອງປະຊຸມຄະນະປະຈໍາສະພາປະຊາຊົນແຂວງ. ທັງນີ້ກໍເພື່ອແຈ້ງຈຸດປະສົງຂອງການມາເຄື່ອນໄຫວເຮັດວຽກຢູ່ແຂວງຜົ້ງສາລີ ຂອງອົງການກວດສອບປະຈໍາພາກເໜືອ ໂດຍສະເພາະການມາເຄື່ອນໄຫວກວດສອບການນໍາໃຊ້ງົບປະມານແຫ່ງລັດຂອງແຂວງຜົ້ງສາລີ ຕາມທີ່ໄດ້ຮັບຮອງໃນກອງປະຊຸມສະພາປະຊາຊົນແຂວງ ແລະ ເຊັນບັນທຶກການປະສານງານລະຫວ່າງ ຄະນະກໍາມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ ກັບ ອົງການກວດສອບ ປະຈໍາພາກເໜືອ. ຈາກນັ້ນ, ທ່ານ ທອງສີ ເສົາສຸລິພົມ ກໍໄດ້ມີທິດຊີ້ນໍາອົງການກວດປະຈໍາພາກເໜືອ ເປັນຕົ້ນ: ກໍານົດເວລາໃນການກວດສອບ, ການຊຸກຍູ້ໃຫ້ທຸກພາກສ່ວນມີຄວາມຮັບຮູ້ເຂົ້າໃຈໃນວຽກງານການກວດສອບ ແລະ ການພົວພັນປະສານງານລະຫວ່າງອົງການປະຈໍາພາກເໜືອ ກັບພາກສ່ວນທີ່ກ່ຽວຂ້ອງ ໂດຍສະເພາະກັບສະພາປະຊາຊົນແຂວງ ໃຫ້ມີຄວາມໂລ່ງລຽນ ເປັນຕົ້ນ ແມ່ນການລາຍງານຜົນການກວດສອບໃຫ້ກັບສະພາປະຊາຊົນແຂວງ ແລະ ອົງການຈັດຕັ້ງທີ່ກ່ຽວຂ້ອງ ຮັບຊາບໃນແຕ່ລະໄລຍະ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ