ວັນທີ 20 ເມສາ 2023 ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ຈັດພິທີມອບ – ຮັບໃບຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ໂດຍການເປັນກຽດເຂົ້າຮ່ວມຂອງສະຫາຍ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ມີບັນດາສະຫາຍທີ່ຕາງໜ້າຈາກຄະນະໂຄສະນາອົບຮົມແຂວງ, ຄະນະຈັດຕັ້ງແຂວງ, ຄະນະກວດກາພັກ – ລັດແຂວງ, ຄະນະພັກ ແລະ ຕະຫຼອດຮອດສະມາຊິກພັກພາຍໃນໜ່ວຍສະພາປະຊາຊົນແຂວງຄໍາມ່ວນເຂົ້າຮ່ວມ.

ໃນພິທີສະຫາຍ ນາງ ສາທິດ ຈັນສີ ຮອງເລຂາໜ່ວຍສະພາປະຊາຊົນແຂວງຄໍາມ່ວນ ຂຶ້ນຜ່ານບົດສະຫຼຸບການກໍ່ ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2022 ແລະ ທິດທາງແຜນການປະຈໍາປີ 2023. ຈາກນັ້ນຕາງໜ້າຈາກຄະນະຈັດຕັ້ງແຂວງກໍ່ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງຄໍາມ່ວນ ສະບັບເລກທີ 08/ຄປຈ.ຄມ, ລົງວັນທີ 6 ກຸມພາ 2023 ວ່າດ້ວຍການຮັບຮອງເອົາໜ່ວຍພັກສະພາປະຊາຊົນແຂວງຄໍາມ່ວນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ໃຫ້ແກ່ໜ່ວຍສະພາປະຊາຊົນແຂວງຄຳມ່ວນ  ພ້ອມນັ້ນກໍໄດ້ມອບໃບ ຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2022 ໃຫ້ແກ່ໜ່ວຍພັກສະພາປະຊາຊົນແຂວງຄໍາມ່ວນ, ເຊີ່ງໃຫ້ກຽດມອບໂດຍ ສະຫາຍ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ. ຮັບໂດຍ ສະຫາຍ ນາງ ສາທິດ ຈັນສີ ຮອງເລຂາໜ່ວຍພັກສະພາປະຊາຊົນແຂວງຄໍາມ່ວນ.

ໃນຕອນທ້າຍຂອງພິທີ ສະຫາຍ ບຸນມີ ພິມມະສອນ  ກໍ່ມີຄໍາເຫັນໄດ້ໂອ້ລົມ, ພ້ອມທັ້ງໃຫ້ທິດຊີ້ນຳຕໍ່ກອງປະຊຸມ  ກ່ອນອື່ນ ສະຫາຍ ໄດ້ສະແດງຄວາມຍ້ອງຍໍ, ຊົມເຊີຍຕໍ່ຜົນງານທີ່ ຍາດມາໄດ້ໃນໄລຍະຜ່ານມາ ແລະ ໄດ້ເນັ້ນໜັກໃຫ້ຄະນະໜ່ວຍພັກ, ຕ້ອງສືບຕໍ່ສຶກສາອົບຮົມການເມືອງ-ນໍາພາ ແນວຄິດໃຫ້ສະມາຊິກພັກ, ພະນັກງານພາຍໃນຢ່າງຕໍ່ເນື່ອງລຽນຕິດ, ນຳເອົາແນວທາງນະໂຍບາຍຂອງພັກ, ກົດໝາຍຂອງລັດ ເພື່ອໃຫ້ສະມາຊິກພັກ ແລະ ພະນັກງານມີຄວາມອຸ່ນອ່ຽນທຸນທຽງ ແລະ ເຊື່ອໝັ້ນຕໍ່ແນວທາງນະໂຍບາຍຂອງພັກ ພ້ອມນັ້ນ, ສະຫາຍຍັງໄດ້ເນັ້ນໜັກບາງບັນຫາຄື:

1. ສືບຕໍ່ເສີມຂະຫຍາຍມູນເຊື້ອຂອງໜ່ວຍພັກປອດໃສ ເຂັ້ມແຂງ ໜັກແໜ້ນໃຫ້ຍືນຍົງ.
2. ສືບຕໍ່ແກ້ໄຂຈຸດອ່ອນ, ຂໍ້ຄົງຄ້າງໃຫ້ດີຂຶ້ນເທື່ອລະກ້າວ.
3. ສືບຕໍ່ປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ຄຽງຄູ່ກັບການປະຕິບັດໜ້າທີ່ວຽກງານວິຊາສະເພາະ ໃຫ້ຖືເອົາເນື້ອໃນຂໍ້ແຂ່ງຂັນເຂົ້າໃນແຜນການກໍ່ສ້າງໜ່ວຍພັກ.
4. ຕັ້ງໜ້າຍົກລະດັບຄວາມຮູ້, ຄວາມສາມາດໃຫ້ສູງຂຶ້ນໃຫ້ກາຍເປັນຜູ້ຊ່ຽວຊານ ເພື່ອພັດທະນາຕົນເອງ ແລະ ການຈັດຕັ້ງ, ຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ ຄຸນສົມບັດສິນທໍາປະຕິວັດ, ວຽກງານວິຊາສະເພາະ ແລະ ວຽກງານອື່ນໆທີ່ປິ່ນອ້ອມ.
5. ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ ເພື່ອເປັນກຳລັງແຮງໃນການຈັດຕັ້ງປະຕິບັດໜ້າທີ່ວຽກງານຫັນໄປສູ່ຄຸນນະພາບໃໝ່.
6. ໃນສະພາບເສດຖະກິດທີ່ມີຄວາມຫຍຸ້ງຍາກ ໃນປັດຈຸບັນໃຫ້ພະນັກງານລັດຖະກອນ ພະຍາຍາມຄົ້ນຄວ້າຫາວິທີແກ້ໄຂຊີວິດການເປັນຢູ່ຂອງຕົນຕາມເງື່ອນໄຂ ແລະ ຄວາມສາມາດຕົວຈິງຖືກຕ້ອງຕາມລະບຽບກົດໝາຍ.

ໂດຍ: ເອື້ອ ມະໂນສິງ.