(ສພຊ) ໃນວັນທີ 31 ມິຖຸນາ 2023 ທີ່ສະພາແຫ່ງຊາດ ນະຄອນຫຼວງວຽງຈັນ ໄດ້ມີພິທີມອບຫຼຽນລາງວັນດີເດັ່ນໃນການອອກກົດໝາຍ ແລະ ການຈັດຕັ້ງປະຕິບັດ ກົດໝາຍວ່າດ້ວຍການຄວບຄຸມຢາສູບ ຈາກອົງການອະນາໄມໂລກ ໃຫ້ແກ່ກຳມາທິການວັດທະນະທຳ-ສັງຄົມ ຂອງສະພາແຫ່ງຊາດ ໂດຍຕາງໜ້າອົງການອະນາໄມໂລກປະຈຳ ສປປລາວ ແມ່ນທ່ານ ນາງ ດຣ. ໂລ ຢິງ ຣູ ແຈັກກະລິນ ມອບໃຫ້ທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ, ເຂົ້າຮ່ວມເປັນສັກຂີພິຍານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການວັດທະນະທຳ-ສັງຄົມ ພ້ອມດ້ວຍປະທານ-ຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ສະມາຊິກສະພາແຫ່ງຊາດທີ່ເປັນກຳມະການຂອງກຳມາທິການວັດທະນະທຳ-ສັງຄົມ ປະຈຳຢູ່ 18 ເຂດເລືອກຕັ້ງ, ຕາງໜ້າກະຊວງສາທາລະນະສຸກ ແລະ ພະນັກງານຈຳນວນໜຶ່ງ.

ໃນໂອກາດນີ້, ທ່ານ ນາງ ທຸມມາລີ ວົງພະຈັນ ໄດ້ມີຄໍາເຫັນບາງຕອນສໍາຄັນວ່າ: ສະພາແຫ່ງຊາດ ໄດ້ເອົາໃຈໃສ່ ແລະ ໃຫ້ຄວາມສຳຄັນໃນການຄວບຄຸມຢາສູບ ເຊິ່ງໄດ້ໃຫ້ສັດຕະຍາບັນຕໍ່ສົນທິສັນຍາສາກົນວ່າດ້ວຍການຄວບຄຸມຢາສູບ ໃນປີ 2006. ມາເຖິງເດືອນພະຈິກ 2009 ສະພາແຫ່ງຊາດ ໄດ້ພິຈາລະນາຮັບຮອງເອົາກົດໝາຍວ່າດ້ວຍການຄວບຄຸມຢາສູບ ແລະ ປີ 2021 ໄດ້ຮັບຮອງເອົາກົດໝາຍວ່າດ້ວຍການຄວບຄຸມຢາສູບສະບັບປັບປຸງຢູ່ໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ເຊິ່ງໄດ້ກຳນົດຕື່ມ: ຫ້າມຜະລິດ, ນຳເຂົ້າ, ສົ່ງອອກ, ຈຳໜ່າຍ, ຊື້-ຂາຍ ແລະ ບໍລິໂພກ ຢາສູບໄຟຟ້າ ທີ່ບັນຈຸ ແລະ ບໍ່ບັນຈຸສານນິໂກຕິນ (Electric nicotine and non-nicotine delivery systems ENDS/ENNDS) ເພື່ອເປັນເຄື່ອງມືທາງດ້ານນິຕິກຳໃນການຈັດຕັ້ງປະຕິບັດວຽກງານຄວບຄຸມຢາສູບ ເພື່ອປົກປ້ອງສຸຂະພາບປະຊາຊົນ, ສັງຄົມ, ສິ່ງແວດລ້ອມ ແລະ ຜົນສະທ້ອນທາງດ້ານເສດຖະກິດຈາກການບໍລິໂພກ ແລະ ການຮັບຄວັນຢາສູບໃນ ສປປລາວ. ສະພາແຫ່ງຊາດ ໂດຍສະເພາະກຳມາທິການວັດທະນະທຳ-ສັງຄົມ ໄດ້ເອົາໃຈໃສ່ປະຕິບັດພາລະບົດບາດດ້ານນິຕິບັນຍັດ, ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ ແລະ ຕິດຕາມກວດກາ ຕໍ່ການຄວບຄຸມຢາສູບຢູ່ ສປປລາວ ຢ່າງເປັນລະບົບຕໍ່ເນື່ອງ. ສະນັ້ນ, ຕາງໜ້າໃຫ້ກຳມາທິການວັດທະນະທຳ-ສັງຄົມ ແລະ ສະພາແຫ່ງຊາດ ຂໍຢືນຢັນວ່າ ຈະສືບຕໍ່ປະຕິບັດໜ້າທີ່ຂອງຕົນຕາມ 3 ພາລະບົດບາດຕໍ່ການຄວບຄຸມຢາສູບ ຢູ່ ສປປລາວ ຮ່ວມກັບລັດຖະບານ ແລະ ອົງການອະນາໄມໂລກໃຫ້ມີປະສິດທິພາບ ແລະ ປະສິດທິຜົນຢ່າງບໍ່ຢຸດຢັ້ງ.