ໃນຕອນເຊົ້າຂອງວັນທີ 21 ມິຖຸນາ 2024 ທີ່ສຳນັກງານສະພາປະຊາຊົນແຂວງຄໍາມ່ວນ ໄດ້ຈັດພິທີມອບບັດສະມາຊິກພັກ ຊຸດທີ II ຂອງໜ່ວຍພັກ ສະພາປະຊາຊົນແຂວງຄໍາມ່ວນ ໂດຍການໃຫ້ກຽດເຂົ້າຮ່ວມເປັນຄະນະປະທານຂອງສະຫາຍ  ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ສະຫາຍ ຄໍາສຸກ ວັນທະວົງສາ ເລຂາໜ່ວຍພັກ ສະພາປະຊາຊົນແຂວງຄໍາມ່ວນ, ມີຕາງໜ້າຈາກຄະນະຈັດຕັ້ງແຂວງ, ຄະນະໜ່ວຍພັກ ແລະ ສະມາຊິກພັກເຂົ້າຮ່ວມທັງໝົດ 31 ສະຫາຍ, ຍິງ 16 ສະຫາຍ.

ພິທີດັ່ງກ່າວ ສະຫາຍ ຄໍາສຸກ ວັນທະວົງສາ ເລຂາໜ່ວຍພັກ ສະພາປະຊາຊົນແຂວງຄໍາມ່ວນ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງຄໍາມ່ວນ ສະບັບເລກທີ 500/ຄປຈ, ລົງວັນທີ 15 ທັນວາ 2023 ວ່າດ້ວຍການຮັບຮອງເອົາລາຍຊື່ສະມາຊິກພັກສົມບູນຂອງພັກປະຊາຊົນປະຕິວັດລາວ ຜູ້ທີ່ຈະໄດ້ຮັບການອອກບັດ ຊຸດທີ XXXII ຂອງແຂວງຄໍາມ່ວນ, ໃນການມອບບັດຄັ້ງນີ້ແມ່ນເປັນຊຸດທີ II ຂອງໜ່ວຍພັກສະພາປະຊາຊົນແຂວງຄໍາມ່ວນ ເຊິ່ງປະກອບມີ 16 ສະຫາຍ,

ໃຫ້ກຽດມອບບັດດັ່ງກ່າວໂດຍ ສະຫາຍ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ; ພ້ອມນັ້ນ, ໃນຕອນທ້າຍຂອງພິທີ ສະຫາຍ ບົວພັນ ແສງຈັນ ຍັງໄດ້ໂອ້ລົມ ແລະ ໃຫ້ທິດຊີ້ນຳຕໍ່ຄະນະໜ່ວຍພັກ ແລະ ໂດຍສະເພາະບັນດາສະມາຊິກພັກທີ່ໄດ້ຮັບບັດໃນຊຸດໃໝ່ນີ້ເພື່ອຍົກສູງຄວາມ ເຂົ້າ ໃຈກ່ຽວກັບບັດສະມາຊິກພັກສົມບູນ ແລະ ການນຳໃຊ້ ເຊິ່ງບັດສະມາຊິກພັກແມ່ນເອກະສານທີ່ຢັ້ງຢືນ ເຖິງຖານະນາມຂອງສະມາຊິກພັກປະຊາຊົນ ປະຕິວັດລາວ ທີ່ສະມາຊິກພັກທຸກສະຫາຍຕ້ອງໄດ້ຮັບ ເພື່ອໃຊ້ແທນໃບຍົກຍ້າຍຮ່ວມຊີ ວິດພັກຊົ່ວຄາວໃນກໍລະນີທີ່ການຈັດຕັ້ງມອບໝາຍໃຫ້ໄປປະຕິບັດໜ້າທີ່ຂອງວຽກງານໃດໜຶ່ງໃນກຳນົດເວລາ 06 ເດືອນ ແລະ ນຳໃຊ້ລົງມະຕິຮັບຮອງວຽກງານຂອງພັກໃນກອງປະຊຸມໃຫຍ່ຂອງພັກຂັ້ນຕ່າງໆ ແລະ ໃນໂອກາດດັ່ງກ່າວ ສະຫາຍຍັງໄດ້ເນັ້ນເຖິງສະມາຊິກພັກທຸກສະຫາຍພ້ອມກັນກໍ່ສ້າງ, ປັບປຸງທາງດ້ານຄຸນທາດການເມືອງ, ຄຸນສົມບັດສິນທຳປະຕິ ວັດ, ສ້າງຕົນເອງເປັນແບບຢ່າງ ເພື່ອສ້າງໜ່ວຍພັກຂອງຕົນໃຫ້ປອດໃສ, ເຂັ້ມແຂງ ແລະ ໜັກແໜ້ນ.

ໂດຍ: ເອື້ອ ມະໂນສິງ