ໃນວັນທີ 17 ຕຸລາ 2024 ນີ້ ຢູ່ທີ່ໂຮງຮຽນ ມສ ບຸນຖິ່ນ, ເມືອງຄຳ, ແຂວງຊຽງຂວາງ ໄດ້ຈັດພິທີມອບ-ຮັບໂຄງການກໍ່ສ້າງອາຄານຫໍພັກຄູ-ນັກຮຽນ, ຫ້ອງນ້ຳ, ແລະ ເຮືອນຄົວກິນ ແລະ ເຟີນິເຈີຄົບຊຸດໃຫ້ແກ່ໂຮງຮຽນ ມສ ບຸນຖິ່ນ ເປັນກຽດເຂົ້າຮ່ວມຂອງທ່ານ ບຸນໂຮມ ເທດທານີ ປະທານສະພາປະຊາຊົນແຂວງ ແລະ ທ່ານ ສີວິໄລ ແສງຈະເລີນ ຮອງເຈົ້າແຂວງໆຊຽງຂວາງ ມີບັນດາທ່ານຮອງປະທານສະພາປະຊາຊົນແຂວງ, ຕາງໜ້າຂະແໜງການທີ່ກ່ຽວຂ້ອງຂອງແຂວງ ແລະ ເມືອງ, ພະນັກ ງານ, ຄູ-ອາຈານ, ຜູ້ຮັບເໝົາກໍ່ສ້າງ ແລະ ອົງການປົກບ້ານໃກ້ຄຽງເຂົ້າຮ່ວມ.

ອາຄານດັ່ງກ່າວໄດ້ຮັບທຶນການຊ່ວຍເຫຼືອຫຼ້າຈາກກອງທຶນ ສປ ຈີນ ເພື່ອສັນຕິພາບ ແລະ ການພັດທະນາ ໂດຍຜ່ານສະພາແຫ່ງຊາດ ແລະ ສະພາປະຊາຊົນແຂວງ, ໂດຍແມ່ນພະແນກສຶກສາທິການ ແລະ ກິລາແຂວງເປັນເຈົ້າຂອງໂຄງການ ແລະ ບໍລິສັດ ໂພທິໄຊ ກໍ່ສ້າງ ເປັນຜູ້ຮັບເໝົາກໍ່ສ້າງ ຊື່ງໂຄງການດັ່ງກ່າວໄດ້ເລີ່ມຕົ້ນລົງມືກໍ່ສ້າງໃນວັນທີ 2 ມັງກອນ 2023 ສຳເລັດ 100% ວັນທີ 17 ຕຸລາ 2024 ຖ້າທຽບຕາມສັນຍາແມ່ນສໍາເລັດກ່ອນສັນຍາ 2 ເດືອນກວ່າ;

ໂຄງການດັ່ງກ່າວປະກອບມີ: ຫໍພັກຄູ-ນັກຮຽນ ເປັນອາຄານສອງຊັ້ນ, ເປັນໂຄງສ້າງຄອນກີດ ມີຄວາມຍາວ 45 ເເມັດ, ມີຄວາມກ້ວາງ 8 ແມັດ, ປະກອບມີ 8 ຫ້ອງນອນ, ມີຫ້ອງນ້ຳຕິດ ແລະ ມີເຟີນີເຈີປະກອບຄົບຊຸດ; ເຮືອນຄົວເປັນອາຄານຊັນດຽວ ເປັນໂຄງສ້າງຄອນກີດ ມີຄວາມຍາວ 22 ເເມັດ ແລະ ມີຄວາມກວ້າງ 6 ເເມັດ ລວມມູນຄ່າທັງໝົດຂອງການກໍ່ສ້າງ 370,000 ໂດລາ.

ໃນພິທີທ່ານ ບຸນໂຮມ ເທດທານີ ໄດ້ມີຄຳເຫັນໂອ້ລົມ ຂໍສະແດງຄວາມຊົມເຊີຍ ບັນດາທ່ານ ຄະນະຮັບຜິດຊອບໄດ້ເອົາໃຈໃສ່ຢ່າງໃກ້ສິດ ແລະ ໃຫ້ຄວາມຮ່ວມມື, ອຳນວຍຄວາມສະດວກໃນການຈັດຕັ້ງປະຕິບັດໂຄງການ, ພິເສດແມ່ນບໍລິສັດຮັບເໝົາກໍ່ສ້າງໄດ້ມີຄວາມຮັບຜິດຊອບສູງເຮັດໃຫ້ໂຄງການ ຈັດຕັ້ງປະຕິບັດໜ້າວຽກຕ່າງໆ ດຳເນີນງານຕາມແຜນຂອງໂຄງການເປັນປົກກະຕີ  ແລະ ໄດ້ສໍາເລັດຕາມກຳນົດໄຫເວລາ. ເຊື່ອໝັ້ນວ່າອໍານາດການປົກຄອງ, ພໍ່ແມ່ປະຊາຊົນ, ຄູອາຈານ ແລະ ນັກຮຽນທຸກຄົນຈະພ້ອມກັນປົກປັກຮັກສາ ແລະ ບຸລະນະສ້ອມແປງໃຫ້ບັນດາຕຶກ ອາຄານທີ່ໄດ້ສ້າງຂື້ນນີ້ໃຫ້ສາມາດນໍາໃຊ້ໄດ້ຢ່າງຍາວນານ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ