ສະພາປະຊາຊົນແຂວງຄໍາມ່ວນ ໄດ້ຈັດພິທີປາຖະກາຖາ ວັນຄ້າຍວັນເກີດປະທານ ສຸພານຸວົງ ຄົບຮອບ 114 ປີ (13/07/1909-13/07/2023 ) ຂຶ້ນໃນຕອນເຊົ້າຂອງວັນທີ 4 ສິງຫາ 2023 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໂດຍເປັນກຽດປາຖະກາຖາຂອງທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມພິທີມີ ຮອງປະທານສະພາປະຊາຊົນແຂວງ ພ້ອມດ້ວຍບັນດາທ່ານ ຄະນະປະຈໍາສະພາປະຊາຊົນແຂວງຄໍາມ່ວນ, ຄະນະກໍາມະການ-ຄະນະເລຂາທິການສະພາປະຊາຊົນຂັ້ນແຂວງ, ຫົວໜ້າຂະແໜງ/ຮອງຫົວໜ້າຂະແໜງ ແລະ ຕະຫຼອດຮອດພະນັກງານ-ລັດຖະກອນພາຍໃນສະພາປະຊາຊົນແຂວງຄໍາມ່ວນ ເຂົ້າຮ່ວມຮັບຟັງ.

ໃນພິທີປາຖະກາຖາຄັ້ງນີ້ ເພື່ອລະນຶກເຖິງຄຸນງາມຄວາມດີຄຸນສົມບັດສິນທໍາປະຕິວັດ ແລະ ບົດຮຽນອັນປະເສີດເລີດລໍ້າ, ເພື່ອເສີມຂະຫຍາຍມູນເຊື້ອຄວາມອົງອາດກ້າຫານ, ຄວາມເປັນແບບຢ່າງທາງດ້ານຈິດໃຈ ແລະ ພຶດຕິກໍາຕົວຈິງຂອງເພິ່ນ. ທ່ານປະທານ ສຸພານຸວົງ ແມ່ນນັກຮັກຊາດ-ນັກປະຕິວັດຜູ້ກ້າແກ່ນ ປີຊາສາມາດ ແລະ ເປັນຜູ້ນໍາທີ່ດີເດັ່ນ-ວິລະບູລຸດຂອງຊາດລາວ ທ່ານເປັນເຊື້ອເຈົ້າ ແຕ່ໄດ້ເສຍສະຫຼະທຸກສິ່ງທຸກຢ່າງທາງດ້ານຄວາມສຸກ ແລະ ຜົນປະໂຫຍດສ່ວນຕົວ ເພື່ອພາລະກິດລວມຂອງຊາດ ຂອງປະຊາຊົນລາວ, ຄຸນລັກສະນະທີ່ພົ້ນເດັ່ນຂອງເພີ່ນແມ່ນເປັນຜູ້ນໍາທີ່ມີຄວາມປີຊາສາມາດ-ອົງອາດກ້າແກ່ນ ມີຄວາມສຸຂຸມຮອບຄອບ ແລະ ໜັກແໜ້ນໃນທຸກສະຖານະການ; ເພິ່ນທັງແມ່ນນັກຍຸດທະສາດ-ນັກຍຸດໂທບາຍທີ່ເຫັນໄກ, ຄ່ອງແຄ້ວ, ວ່ອງໄວ ແລະ ມີຄວາມປະດິດສ້າງສູງ, ແມ່ນຜູ້ນຳທີ່ມີແບບແຜນຊີ້ນຳ-ບັນຊາແທດກັບຕົວຈິງຍາມໃດກໍມີຄວາມຈົງຮັກພັກດີບໍລິສຸດຜຸດຜ່ອງຕໍ່ພັກ ຕໍ່ປະເທດຊາດ ແລະ ຕໍ່ປະຊາຊົນມີຄວາມເປັນຫ່ວງເປັນໄຍ, ເປັນນັກການເມືອງທີ່ເກັ່ງກ້າ ແລະ ດໍາລົງຊີວິດແບບລຽບງ່າຍ.

ທ່ານ ບຸນມີ ພິມມະສອນ ໄດ້ຫວນຄືນປະຫວັດ ແລະ ຜົນງານທີ່ພົ້ນເດັ່ນຂອງທ່ານ ປະທານ ສຸພານຸວົງ ໂດຍຫຍໍ້ວ່າ: ທ່ານປະທານ ສຸພານຸວົງ ໄດ້ເຂົ້າສຶກສາຊັ້ນປະຖົມຢູ່ ຫຼວງພະບາງ, ຊັ້ນມັດທະຍົມຢູ່ ນະຄອນຫຼວງຮ່າໂນ້ຍ ສສ ຫວຽດນາມ ແລະ ສຶກສາຕໍ່ລະດັບປະລິນຍາຕີ ສາຂາວິສະວະກຳກໍ່ສ້າງ ແລະ ຂົວທາງ ຢູ່ນະຄອນຫຼວງປາຣີ ປະເທດຝຣັ່ງ, ໄດ້ເຂົ້າຮ່ວມຂະບວນການຕໍ່ສູ້ຢ່າງພິລະອາດຫານ ຕ້ານຈັກກະພັດລ່າເມືອງຂຶ້ນ ແບບເກົ່າ ແລະ ແບບໃໝ່. ປະທານ ສຸພານຸວົງ ເປັນເຊື້ອເຈົ້າ ເປັນເຊື້ອກະສັດ ເປັນຜູ້ນຳທີ່ມີ ຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍໄດ້ຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖື ໝູ່ຄະນະ, ເອື້ອເຟື້ອຮັກແພງ ມິດສະຫາຍຢ່າງຈິງໃຈ, ມີທັດສະນະຫຼັກໝັ້ນອັນໜັກແໜ້ນ ແລະ ນ້ຳໃຈເສຍສະຫຼະອັນສູງສົ່ງ ເພື່ອຊາດ ເພື່ອປະຊາຊົນ, ເປັນໜຶ່ງໃນບັນດາຜູ້ນຳທີ່ດີເດັ່ນ ແລະ ເຄົາລົບຮັກຂອງປະຊາຊົນລາວເຜົ່າຕ່າງໆ, ທ່ານໄດ້ອຸທິດໝົດຈິດໝົດໃຈ, ຄວາມສາມາດ ແລະ ຫົວຄິດປະດິດສ້າງຂອງຕົນໃຫ້ແກ່ພາລະກິດປົກປັກຮັກສາ ແລະ ສ້າງສາປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກ ຂອງປະຊາຊົນລາວບັນດາເຜົ່າ.

ໂດຍ: ເອື້ອ ມະໂນສິງ