ຕອນເຊົ້າຂອງວັນທີ 2 ກຸມພາ 2024 ສະພາປະຊາຊົນແຂວງຄໍາມ່ວນ ໄດ້ຈັດພິທີປາຖະກະຖາວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ, ວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ ແລະ ວັນສ້າງຕັ້ງອົງການສະຫະພັນກຳມະການລາວ ຄົບຮອບ 68 ປີ, ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງ, ມີ ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ປະທານຄະນະກຳມະການ ຍຸຕິທຳ ແລະ ປກຊ-ປກສ ເຂົ້າຮ່ວມມີ: ຄະນະພັກ, ຫົວໜ້າ/ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງ ໄດ້ໃຫ້ກຽດຂຶ້ນປາ ຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ເຊິ່ງທ່ານໄດ້ຍົກໃືຫ້ເຫັນເຖິງ ປະຫວັດການກຳເນີດຂອງກອງທັບປະຊາຊົນລາວ, ສະພາບແວດລ້ອມກ່ອນການສ້າງຕັ້ງ, ຄວາມຈໍາເປັນພາວະວິໄສ, ຄວາມຫມາຍຄວາມສໍາຄັນ ຂອງການສ້າງຕັ້ງກອງທັບປະຊາຊົນລາວ ຜົນງານໄຊຊະນະ,ການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ແຕ່ລະໄລຍະ, ທາດແທ້ ແລະ ມູນເຊື້ອອັນສະຫງ່າອົງອາດ ຂອງກອງທັບປະຊາຊົນລາວ; ມູນເຊື້ອຄວາມຈົງຮັກພັກດີຕໍ່ພັກ, ຕໍ່ປະຊາ ຊົນ, ຕໍ່ອຸດົມການສັງຄົມນິຍົມ, ມູນເຊື້ອຕໍ່ສູ້ອັນພິລະອາດຫານ, ກ້າແກ່ນ,ຫນຽວແໜ້ນ ແລະ ມີໄຫວພິບ; ນໍ້າໃຈດຸຫມັ່ນຂະຫຍັນພຽນ, ຍຶດຫມັ້ນການພົວພັນ, ສາມັກຄີແບບກາຍອິນຊີອັນແໜ້ນແຟ້ນກັບປະຊາຊົນບັນດາເຜົ່າ, ການພົວພັນຮ່ວມມືພາຍໃນ ແລະ ສາກົນຢ່າງກົມກຽວບົນພຶ້ນຖານຕ່າງຝ່າຍຕ່າງມີຜົນປະໂຫຍດ ແລະ ການສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມຂອງກອງທັບປະຊາຊົນລາວ.
ໂອກາດທີ່ມີ ຄວາມຫມາຍສໍາຄັນນັ້ນ ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ໃຫ້ກຽດປາຖະກະຖາວັນເກີດຂອງປະທານ ຄໍາໄຕ ສີພັນດອນ ຄົບຮອບ 100 ປີ ທ່ານໄດ້ຍົກໃຫ້ເຫັນເຖິງຊີວິດເຍົາໄວ ແລະ ຈຸດເລີ່ມຕົ້ນ ການເຄື່ອນ ໄຫວປະຕິວັດຂອງ ປະທານ ຄໍາໄຕ ສີພັນດອນ ໃນການເຂົ້າຮ່ວມຂະບວນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາ, ຄວາມປີຊາສາມາດ, ຄວາມສະຫຼຽວສະຫຼາດຂອງປະທານ ຄໍາໄຕ ສີພັນດອນ ໃນການຊີ້ນໍາບັນຊາກອງທັບປະຊາຊົນລາວໃນການຕໍ່ສູ້ກູ້ຊາດບໍ່ຍອມຈໍານົນຈົນສາມາດຍາດໄດ້ໄຊຊະນະ ທີ່ສົມບູນ ແລະ ສະຖາປານາປະເທດ ສປປ ລາວ ຂື້ນໃນວັນທີ 2 ທັນວາ 1975. ຜົນງານ, ບົດບາດອັນສໍາຄັນໃນການຊີ້ນໍາ-ນໍາພາໃນໄລຍະພາລະກິດປົກປັກຮັກ ສາ ແລະ ສ້າງສາພັດປະເທດຊາດໃນແຕ່ລະໄລຍະຈົນເຖິງປັດຈຸບັນ; ວິຖີຊີວິດທີ່ດຸໝັ່ນພາກພຽນ, ແບບແຜນການເຮັດວຽກທີ່ຊັດເຈນ, ການອຸທິດຕົນເພື່ອຊາດ, ເພື່ອປະຊາຊົນ ແລະ ເປັນທີ່ເຄົາລົບຮັກຂອງປະຊາຊົນບັນດາເຜົ່າ. ພ້ອມນັ້ນ, ໃນພິທີຍັງໄດ້ຮັບຟັງ ວັນສ້າງຕັ້ງອົງການສະຫະກຳມະບານລາວ ຄົບຮອບ 68 ປີ ( ວັນທີ 1 ກຸມພາ 1956-ວັນທີ 1 ກຸມພາ 2024 ) ແລະ ມະຕິກອງປະຊຸມສາມັນຄົບຄະນະບໍລິຫານງານສະຫະພັນກຳມະບານແຂວງຄໍາມ່ວນ ຄັ້ງທີ 5 ສະໄໝທີ VII.
ໃນຕອນທ້າຍຂອງພິທີ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ໄດ້ໂອ້ລົມ ແລະ ໃຫ້ທິດຊີ້ນໍາ ມາຍັງ ຄະນະພັກ, ສະມາຊິກພັກ, ພະນັກງານ-ລັດຖະກອນ ຈົ່ງພ້ອມກັນຕັ້ງຫນ້າຮໍ່າຮຽນເອົາແບບຢ່າງຂອງ ປະທານ ຄໍາໄຕ ສີພັນດອນ ດັ່ງນີ້:
1. ຕັ້ງຫນ້າຄົ້ນຄວ້າສຶກສາຮໍ່າຮຽນເອົາຄຸນສົມບັດສິນທໍາປະຕິວັດ, ຄວາມຈົງຮັກພັກດີ, ຄວາມບໍລິສຸດພຸດຜ່ອງ, ຄວາມມະນະອົດທົນ, ອຸ່ນອ່ຽນທຸ່ນທ່ຽງ, ມີໄຫວພິບໃນການຈັດຕັ້ງປະຕິບັດຫນ້າທີ່ວຽກງານທີ່ຕົນຮັບຜິດຊອບເພື່ອອຸທິດຕົນໃຫ້ພາລະກິດປະຕິວັດ, ເພື່ອຊາດ ເພື່ອປະຊາຊົນ, ມີນໍ້າໃຈເອກະລາດເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.
2. ຕັ້ງຫນ້າເສີມຂະຫຍາຍຜົນງານ ແລະ ມູນເຊື້ອອັນດີງາມທີ່ພັກ-ລັດຍາດມາໄດ້ໃນໄລຍະຜ່ານມາໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.ພ້ອມກັນນັ້ນຕ້ອງຕັ້ງ ຫນ້າແກ້ໄຂບັນດາຈຸດອ່ອນ, ຂໍ້ຄົງຄ້າງ ແລະ ປະກົດການຫຍໍ້ທໍ້ຕ່າງໆໃນຖັນແຖວກົງຈັກການຈັດຕັ້ງ, ສະມາຊິກພັກ-ພະນັກງານ ໃຫ້ນັບມື້ນັບຫລຸດລົງສ້າງໃຫ້ພັກຂອງພວກເຮົາມີຄວາມປອດໃສ, ຫນັກແຫນ້ນ ແລະ ເຂັ້ມແຂງ ຄວາມເປັນແບບຢ່າງນໍາຫນ້າ, ຄວາມສາມັກຄີປຶກແຜ່ນ, ຈິດຫນຶ່ງໃຈດຽວຂອງພັກ.
3. ຄະນະພັກ ແລະ ສະມາຊິກພັກ, ພະນັກງານ-ລັດຖະກອນຕ້ອງຍົກສູງຄວາມຮັບຜິດຊອບການເມືອງ, ຍົກສູງນໍ້າໃຈຮັກຊາດອັນດູດດື່ມ, ຈິດໃຈເອກະລາດເປັນເຈົ້າຕົນເອງເພິ່ງຕົນເອງ, ສຸມທຸກກຳລັງແຮງສັງລວມຂອງທົ່ວທັງຊາດ, ກໍ່ຄືຂອງແຂວງຕັ້ງຫນ້າແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດການເງິນປັດຈຸບັນໃຫ້ຜ່ານພົ້ນໄປ ແລະ ສ້າງທ່ວງທ່າໃຫມ່ທີ່ຫນັກແໜ້ນ ເຂັ້ມແຂງເພື່ອກ້າວຂຶ້ນພັດທະນາປະເທດຕາມມະຕິກອງປະຊຸມໃຫຍ່ ຄັ້ງທີ XI, ມະຕິກອງປະຊຸມໃຫ່ຍ ຄັ້ງທີ X ຂອງອົງຄະນະພັກແຂວງຄໍາມ່ວນ ເຂົ້າສູ່ວຽກງານຕົວຈິງ.
4. ສືບຕໍ່ເອົາໃຈໃສ່ ຕໍ່ວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນຊັ້ນຄົນຕ່າງໆ ໃຫ້ມີຄວາມຮັບຮູ້ເຂົ້າໃຈແນວທາງ, ນະໂຍບາຍຂອງພັກກົດຫມາຍຂອງລັດ, ແລະ ວຽກງານຂອງສະພາປະຊາຊົນຂັ້ນແຂວງ, ມີສະຕິລະວັງຕົວຕໍ່ກົນອຸບາຍມ້າງເພທໍາລາຍຂອງພວກຄົນບໍ່ດີ ແລະ ອິດທິກຳລັງປໍລະປັກ; ຕັ້ງ ຫນ້າເປັນເຈົ້າການເຂົ້າຮ່ວມໃນຂະບວນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມສີວິໄລ, ຈະເລີນຮຸ່ງເຮືອງຂຶ້ນເລື້ອຍໆ.
5. ຄະນະພັກ ຕ້ອງຕັ້ງຫນ້າຄົ້ນຄວ້າຮໍ່າຮຽນເຊື່ອມຊຶມມະຕິ, ຄໍາສັ່ງ, ຄໍາແນະນໍາຂອງກົມການເມືອງ ແລະ ຄະນະເລຂາທິການສູນກາງພັກວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ເພື່ອຕັ້ງຫນ້າກະກຽມໃຫ້ດີ ແລະ ດຳເນີນໃຫ້ຖືກຕ້ອງ.
ໂດຍ: ເອື້ອ ມະໂນສິງ