ຕອນເຊົ້າວັນທີ 19 ພຶດສະພາ 2022 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດພິທີປະກາດການແຕ່ງຕັ້ງນາຍຕໍາຫຼວດ ໄປປະຈໍາການຢູ່ສະພາປະຊາຊົນແຂວງຜົ້ງສາລີ ໂດຍການເປັນປະທານ ຂອງທ່ານ ຫຸມເພັງ ຈອມວິສານ ຮອງປະທານຄະນະປະຈໍາສະພາປະຊາຊົນແຂວງ; ມີ ຮອງກອງບັນຊາການປ້ອງກັນຄວາມສະຫງົບແຂວງ, ຮອງຫົວໜ້າຫ້ອງການຄະນະກໍາມະການ ປກຊ-ປກສ, ປະທານ, ຮອງປະທານຄະນະກໍາມະການຂອງສະພາປະຊາຊົນແຂວງ, ຮອງເລຂາທິການສະພາປະຊາຊົນແຂວງ, ຫົວໜ້າຂະແໜງຈັດຕັ້ງ-ກວດກາ ແລະ ພະນັກງານ-ວິຊາການຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບເຂົ້າຮ່ວມ.
ໃນພິທີໄດ້ຮັບຟັງ ຮອງຫົວໜ້າຫ້ອງການ ປກຊ-ປກສ ຂຶ້ນຜ່ານຂໍ້ຕົກລົງ ຂອງປະທານຄະນະກໍາມະການ ປກຊ-ປກສ ແຂວງ ວ່າດ້ວຍແຕ່ງຕັ້ງນາຍຕໍາຫຼວດໄປປະຈໍາການຢູ່ ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊົນແຂວງ ສະບັບເລກທີ 53/ຄນ, ປຊ-ປສ, ລົງວັນທີ 25 ເມສາ 2022; ຮັບຟັງ ທ່ານ ນາງ ພິມພາ ມະຫະວົງທັດ ຫົວໜ້າຂະແໜງຈັດຕັ້ງ-ກວດກາ ຂຶ້ນຜ່ານມະຕິຂອງຄະນະປະຈໍາສະພາປະຊາຊົນແຂວງວ່າດ້ວຍການບັນຈຸ, ສັບຊ້ອນນາຍຕໍາຫຼວດ ເຂົ້າໃນຂະແໜງການຂອງສະພາປະຊາຊົນແຂວງ ສະບັບເລກທີ 236/ຄປຈຂ, ລົງວັນທີ 16 ພຶດສະພາ 2022 “ເຫັນດີບັນຈຸ, ສັບຊ້ອນ ທ່ານ ພັຕ ຄໍາອ່ອນ ໄຊວີດາວ ຫົວໜ້າພະແນກຄວບຄຸມຢ່າເສບຕິດ ຈາກກອງບັນຊາການປ້ອງກັນຄວາມສະຫງົບແຂວງ ເຂົ້າໃນ ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ (ຂະແໜງປ້ອງກັນຊາດ-ປ້ອງກັນຄວາມສະຫງົບ) ສະພາປະຊາຊົນແຂວງ” ແລະ ຮັບຟັງຕາງໜ້າຈາກ ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ຂຶ້ນຜ່ານ ຂໍ້ຕົກລົງ ວ່າດ້ວຍການແບ່ງໜ້າທີ່ຄວາມຮັບຜິດຊອບ ໃຫ້ນາຍຕໍາຫຼວດ ທີ່ມາສັງກັດຢູ່ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ ສະບັບເລກທີ 76/ຄຍປປ, ລົງວັນທີ 18 ພຶດສະພາ 2022.
ໃນພິທິ ທ່ານ ຫຸມເພັງ ຈອມວິສານໄດ້ໃຫ້ກຽດໂອ້ລົມຕໍ່ພິທີດັ່ງກ່າວຊິ່ງທ່ານກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບກະກຽມພິທີໃນຄັ້ງນີ້ ແລະ ກ່າວສະແດງຄວາມຍິນດີຕໍ່ ທ່ານ ພັຕ ຄຳອ່ອນ ໄຊວີດາວ ທີ່ໄດ້ຮັບການແຕ່ງຕັ້ງມາປະຈຳການຢູ່ສະພາປະຊາຊົນແຂວງ ພ້ອມກັນນັ້ນ, ທ່ານຍັງໄດ້ເນັ້ນບາງບັນຫາເປັນຕົ້ນ: ເພີ່ມທະວີການກໍາແໜ້ນແນວທາງ, ນະໂຍບາຍ ຂອງພັກ-ລັດ, ມະຕິ, ຄໍາສັ່ງ, ນິຕິກໍາຕ່າງໆ ຂອງຂັ້ນເທິງ ລວມທັງພາລະບົດບາດສິດໜ້າທີ່ຂອງສະພາປະຊາຊົນແຂວງ, ຄາດໝາຍສູ້ຊົນທີ່ຂັ້ນເທິງ ກໍ່ຄື ຂັ້ນຂອງຕົນວາງອອກ;ເອົາໃຈໃສ່ປັບປຸງແບບແຜນວິທີເຮັດວຽກຂອງແຕ່ລະຂັ້ນຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບສຽງໜ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງ; ເປັນແບບຢ່າງທີ່ດີ, ເປັນຕົ້ນແມ່ນການປະຕິບັດໜ້າທີ່ວຽກງານທີ່ການຈັດຕັ້ງມອບໝາຍ, ການວາງທັດສະນະມະຫາຊົນ, ຄຸນສົມບັດ, ສິນທໍາປະຕິວັດ, ການເຄື່ອນໄຫວພົວພັນສັງຄົມ, ການຝຶກຝົນຫຼ່ໍຫຼອມຕົນເອງ ແລະ ອື່ນໆ.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ