ເພື່ອເປັນການສົ່ງເສີມ, ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ດ້ານວັດທະນະທຳ, ປະຫວັດສາດ ແລະ ທຳມະຊາດ ຢູ່ແຂວງອຸດົມໄຊ ໃນປີ 2024 ໃຫ້ຫຼາຍຂຶ້ນ; ເພື່ອເປັນການສົ່ງເສີມ, ປົກປັກຮັກສາ, ອະນຸລັກຮັກສາວັດທະນະທຳ, ຮີດຄອງປະເພນີອັນດີງາມຂອງປະຊາຊົນບັນດາເຜົ່າ 12 ເຜົ່າໃນທົ່ວແຂວງ; ພ້ອມທັງເປັນການເຕົ້າໂຮມຄວາມສາມັກຄີປອງດອງບັນດາເຜົ່າພາຍໃນແຂວງ ໃຫ້ມີຄວາມແໜ້ນແຟ້ນຍິ່ງຂຶ້ນ ແລະ ເພື່ອເປັນການສ້າງຂະບວນການຂ່ຳນັບຮັບຕ້ອນ, ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ວັນສໍາຄັນຕ່າງໆ.
ໃນຕອນເຊົ້າວັນທີ 18 ມັງກອນ 2024, ຢູ່ທີ່ສະຫນາມກິລາແຂວງ ພິທີເປີດງານບຸນປະເພນີບັນດາເຜົ່າ ເພື່ອສົ່ງເສີມປີທ່ອງທ່ຽວລາວ 2024 ຢູ່ທີ່ແຂວງອຸດົມໄຊ ໄດ້ຈັດຂຶ້ນຢ່າງເປັນທາງການ; ເປັນກຽດເຂົ້າຮ່ວມໂດຍທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຜູ້ຊີ້ນໍາແຂວງອຸດົມໄຊ; ທ່ານ ຈະເລີນ ເຢຍປ່າວເຮີ ກຳມະການສູນກາງພັກ, ຮອງປະທານສະພາແຫ່ງຊາດ, ທ່ານ ບຸນຄົງ ຫຼ້າຈຽມພອນ ກຳມະການສໍາຮອງສູນກາງພັກ, ເຈົ້າແຂວງອຸດົມໄຊ; ບັນດາທ່ານຮອງເລຂາພັກແຂວງ, ຮອງເຈົ້າແຂວງ 5 ແຂວງອ້ອມຂ້າງຄື: ແຂວງຜົ້ງສາລີ, ຫຼວງນໍ້າທາ, ບໍ່ແກ້ວ, ໄຊຍະບູລີ ແລະ ຫຼວງພະບາງ; ມີການນໍາພັກ-ລັດແຂວງ, ອາດີດການນໍາພັກ-ລັດແຂວງ, ບັນດາອົງການຈັດຕັ້ງ, ຜູ້ອາວຸໂສ-ບຳນານ, ພະນັກງານ-ລັດຖະກອນ, ທະຫານ, ຕຳຫຼວດ, ນັກທຸລະກິດ, ສະມາຄົມຊາວຫວຽດນາມ, ສະມາຄົມຊາວຈີນ, ພໍ່ຄ້າຊາວຂາຍ, ຂະບວນມ່ວນຊົນບັນດາເຜົ່າ ຈຳນວນ 12 ເຜົ່າໃນຂອງແຂວງອຸດົມໄຊ ແລະ ບັນດາອົງການປົກຄອງບ້ານ, ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າຮ່ວມຢ່າງພ້ອມພຽງ.
ພິທີ, ພາຍຫຼັງຮັບຊົມລາຍການສະແດງສິລະປະວັນນະຄະດີ, ທ່ານ ສົມຈິດ ປັນຍາສັກ ຮອງເຈົ້າແຂວງ, ປະທານການຈັດງານ ໄດ້ລາຍງານການກະກຽມຄວາມພ້ອມຂອງການຈັດງານ ແລະ ໂອກາດດັ່ງກ່າວທ່ານ ບຸນຄົງ ຫລ້າຈຽມພອນ ກຳມະການສໍາຮອງສູນກາງພັກ, ເຈົ້າແຂວງອຸດົມໄຊ ໄດ້ກ່າວເປີດງານ ແລະ ໃນຕອນທ້າຍພິທີ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຜູ້ຊີ້ນໍາແຂວງອຸດົມໄຊ, ພ້ອມດ້ວຍການນຳພັກ-ລັດຂັ້ນສູນກາງ, ຂັ້ນແຂວງ ຮ່ວມກັນຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປີດງານຢ່າງເປັນທາງການ.
ພາຍໃນງານ, ທ່ານສາມມາດທ່ຽວຊົມ ແລະ ຊື້ສິນຄ້າເພື່ອເປັນຂອງຟາກຂອງຕ້ອນໄດ້ ເຊິ່ງປະກອບມີຫລາກຫລາຍກິດຈະກຳທີ່ຕິດພັນວິຖີຊີວິດຂອງຊົນເຜົ່າຄື: ເຜົ່າກຶມມຸ, ເຜົ່າມົ້ງ, ເຜົ່າຫໍ້ ແລະ ເຜົ່າໄຕ; ມີການວາງສະແດງສິນຄ້າຜະລິດຕະພັນກະສິກຳ ແລະ ຫັດຖະກຳ, ອາຫານການກິນ ຂອງບັນດາເມືອງ 7 ເມືອງ ແລະ ບ້ານພາຍໃນເທດສະບານ; ການສະແດງງົວງາມ-ຊົນງົວ, ງານສະແດງສິນລະປະ-ວັນນະຄະດີ, ປະກວດນາງສາວປີທ່ອງທ່ຽວແຂວງອຸດົມໄຊ ປີ 2024, ເດີນແບບເຄື່ອງຊົນເຜົ່າ ແລະ ງານຄອນເສີດ, ງານຕະຫຼາດນັດ ແລະ ກິດຈະກຳອື່ນໆ ງານຄັ້ງນີ້ຈັດຂຶ້ນຈົນເຖິ່ງວັນທີ 20 ມັງກອນ 2024 ຈຶ່ງສໍາເລັດ.
ຂ່າວ: ສະພາປະຊາຊົນແຂວງ.