ຕອນບ່າຍ ວັນທີ 29 ກໍລະກົດ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດພິທິມອບ-ຮັບໃບຢັ້ງຢືນໜ່ວຍພັກ ປອດໃສ ເຂັ້ມແຂງ ໜັກແໜ້ນ ຂອງສະພາປະຊາຊົນແຂວງຜົ້ງສາລີ ປະຈໍາປີ 2021 ໂດຍການເປັນປະທານຂອງສະຫາຍ ທອງສີ ເສົາສຸລິພົມ ຮອງເລຂາພັກແຂວງ, ມີຄະນະໜ່ວຍພັກ ສພຂ, ຕາງໜ້າຈາກ ຄະນະໂຄສະນາອົບແຂວງ, ຄະນະຈັດຕັ້ງແຂວງ, ຄະນະກວດກາພັກແຂວງ, ສະມະຊິກພັກສົມບຸນ, ສໍາຮອງ ແລະ ພະນັກງານ-ລັດຖະກອນພາຍໃນ ສພຂ ເຂົ້າຮ່ວມ.
ໃນພິທີໄດ້ຮັບຟັງ ສະຫຍາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກ ສພຂ ຂຶ້ນຜ່ານບົດສະຫຼຸບການນໍາພາ ຂອງໜ່ວຍພັກ ສພຂ ປະຈໍາປີ 2021 ແລະ ທິດທາງແຜນການນໍາພາໜ່ວຍພັກປອດໃສ, ເຂັ້ມແຂງ ແລະ ໜັກ ແໜ້ນ ປະຈໍາປີ 2022; ຕາງໜ້າຈາກຄະນະຈັດຕັ້ງແຂວງ ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດ ມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021. ຈາກນັ້ນ, ໄດ້ຈັດພິທິມອບ-ຮັບໃບຢັ້ງຢືນໜ່ວຍພັກ ປອດໃສ ເຂັ້ມແຂງ ໜັກແໜ້ນ ຂອງສະພາປະຊາຊົນແຂວງຜົ້ງສາລີ ປະຈໍາປີ 2021 ຂຶ້ນຢ່າງສົມກຽດ, ຕາງໜ້າໃຫ້ຄະນະປະຈໍາພັກແຂວງ ຂຶ້ນມອບໂດຍສະຫາຍ ທອງສີ ເສົາສຸລິພົມ ແລະ ຕາງໜ້າໃຫ້ໜ່ວຍພັກ ສພຂ ຂຶ້ນຮັບໂດຍ ສະຫຍາຍ ນາງ ພອນສະຫວັນ ສັກຕິຄຸນ.
ໃນໂອກາດດຽວກັນນີ້ ສະຫາຍ ທອງສີ ເສົາສຸລິພົມ ໄດ້ໂອລົມຕໍ່ພິທີດັ່ງກ່າວ ເຊິ່ງກ່ອນ ສະຫາຍກໍໄດ້ ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ຜົນສຳເລັດ ທີ່ຄະນະໜ່ວຍພັກ ກໍ່ຄືສະມາຊິກພັກຍາດມາໄດ້ໃນຕະຫຼອດໄລຍະປີ 2021. ພ້ອມກັນນັ້ນ ສະຫາຍຍັງໄດ້ຮຽກຮ້ອງ ຕໍ່ຄະນະໜ່ວຍພັກ ແລະ ສະມາຊິກພັກ ພາຍໃນ ສພຂ ມີບາງຕອນສະຫາຍໄດ້ກ່າວວ່າ “ຕ້ອງໄດ້ເພີ່ມທະວີການກໍາແໜ້ນແນວທາງ, ນະໂຍບາຍ ຂອງພັກ-ລັດ, ມະຕິ, ຄໍາສັ່ງ, ນິຕິກຳຕ່າງໆຂອງຂັ້ນເທິງ ລວມທັງພາລະບົດບາດສິດໜ້າທີ່ຂອງສະພາປະຊາຊົນແຂວງ, ຄາດໝາຍສູ້ຊົນທີ່ຂັ້ນເທິງກໍ່ຄືຂັ້ນຂອງຕົນວາງອອກ, ໃນນີ້; ລວມທັງການສ້າງໜ່ວຍພັກປອດໃສ ເຂັ້ມແຂວງ ໜັກແໜ້ນ, ປະຕິບັດວຽກງານຕາມທິດ 3 ສ້າງ, ນະໂຍບາຍ 6 ທາງອອກ ແລະ ຄໍາຂວັນ 3 ສໍ ຂອງແຂວງ ແລະ ອື່ນໆ; ເສີມຂະຫຍາຍມູນເຊື້ອອັນດີໃນການ ນໍາພາ-ຊີ້ນຳວຽກງານຂອງສະພາປະຊາຊົນແຂວງຕາມບົດບາດ ເພື່ອໃຫ້ວຽກງານຂອງສະພາປະຊາຊົນແຂວງ ກໍ່ຄືບັນດາມະຕິຕ່າງໆ ທີ່ທາງສະພາປະຊາຊົນແຂວງຮັບຮອງໃຫ້ບັນລຸເປັນກ້າວໆ; ເພີ່ມທະວີການກໍາແໜ້ນ ແລະ ຈັດຕັ້ງປະຕິບັດແບບແຜນວິທີເຮັດວຽກຂອງການນໍາແຕ່ລະຂັ້ນ ຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງ; ໃນເງື່ອນໄຂຄວາມຮຽກຮ້ອງຕ້ອງການຂອງສະພາບການໃໝ່, ການນໍາແຕ່ລະຂັ້ນຕ້ອງໄດ້ພະຍາຍາມປະຕິບັດຄວາມເປັນແບບຢ່າງໃຫ້ດີ, ເປັນຕົ້ນແມ່ນການເປັນແບບຢ່າງໃນການປະຕິບັດໜ້າທີ່ການເມືອງ, ການວາງທັດສະນະມະຫາຊົນ, ຄຸນສົມບັດ, ສິນທໍາປະຕິວັດ, ການເຄື່ອນໄຫວພົວພັນສັງຄົມ, ການຝຶກຝົນຫຼ່ໍຫຼອມຕົນເອງ, ການສ້າງເສດຖະກິດຄອບຄົວ ແລະ ອື່ນໆ. (ຕາມທິດນໍາທີ່ວ່າ: ການນໍາພາທີ່ດີ ແມ່ນການເປັນແບບຢ່າງທີ່ດີ)”.
ຕອນທ້າຍຂອງພິທີ ສະຫາຍ ນາງ ພອນສະຫວັນ ສັກຕິຄຸນ ຂຶ້ນຮັບຄໍາໂອວາດ ພ້ອມທັງສະແດງຄວາມຂອບໃຈ ທີ່ຄະນະປະຈໍາພັກແຂວງ ແລະ ຄະນະປະຈໍາ ສພຂ ທີ່ໄດ້ໃກ້ສິດຕິດແທດ ແລະ ຊຸກຍຸ້ຊ່ວຍເຫຼືອ ຄະນະໜ່ວຍພັກ ສພຂ ຈົນມີຜົນສໍາເລັດຫຼາຍດ້ານໃນປະຈຸບັນ.
ມາໃນວັນດຽວກັນວາລະກ່ອນໜ້ານັ້ນ ຍັງໄດ້ມີພິທີປະກາດການຍົກຍ້າຍພະນັກງານ-ລັດຖະກອນ ຂອງ ສພຂ ໄປຢູ່ການຈັດຕັ້ງບ່ອນໃໝ່; ເຊິ່ງໃນພິທີໄດ້ຮັບຟັງ ສະຫາຍ ຄໍາຕຸ່ນ ວົງສາ ຮອງເລຂາການ ສພຂ ຂຶ້ນຜ່ານ ຂໍ້ຕົກລົງຂອງ ເຈົ້າແຂວງ ສະບັບເລກທີ 647/ຂຜລ, ລົງວັນທີ 27 ກໍລະກົດ 2022 ວ່າດ້ວຍການອະນຸມັດໃຫ້ພະນັກງານຍົກຍ້າຍໄປຢູ່ຕ່າງແຂວງ “ຍົກຍ້າຍທ່ານ ນາງ ວຽງຄໍາ ວໍລະຈິດ ຮອງເລຂາທິການ ສພຂ ຜົ້ງສາລີ ໄປປະຈໍາການຢູ່ສະຖາບັນການເມືອງ-ການປົກຄອງແຫ່ງຊາດ”.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ.