ຕອນເຊົ້າວັນທີ 18 ຕຸລາ 2022 ທີ່ຫ້ອງປະຊຸມສະພາປະຊາຊົນແຂວງ ການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໂດຍການເປັນປະທານ ຂອງທ່ານ ສົມຈິດ ຫັບລະກອນ ຮອງປະທານສະພາປະຊາຊົນແຂວງ; ມີບັນດາທ່ານ ຫົວໜ້າ, ຮອງຫົວໜ້າພະແນກການອອ້ມຂ້າງແຂວງ, ສະພັນນັກຮົບເກົ່າແຂວງ, ແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ ພ້ອມດ້ວຍພະນັກງານ-ລັດຖະກອນພາຍໃນສະພາປະຊາຊົນແຂວງເຂົ້າຮ່ວມ.

          ໃນການຈັດຕັ້ງເຜີຍແຜ່ຄັ້ງນີ້ ປະກອບມີມະຕິຂອງສະພາແຫ່ງຊາດ 21 ມະຕິ ແລະ ມະຕິຂອງສະພາປະຊາຊົນແຂວງ 10 ມະຕິ; ເຊິ່ງທ່ານກໍໄດ້ຍົກໃຫ້ເຫັນເຖິງເນື້ອໃນຈິດໃຈຂອງ 2 ກອງປະຊຸມດັ່ງກ່າວ ເປັນຕົ້ນ: ວຽກງານສະເໜີຍົກຍ້າຍ ແລະ ແຕ່ງຕັ້ງບຸກຄະລາກອນ ຂອງລັດຖະບານ, ການຈັດຕັ້ງປະຕິບັດວຽກງານຂອງລັດຖະບານ, ຂອງອົງການປົກຄອງແຂວງ; ວຽກຂອງການສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍຂອງແຂວງ; ວຽກງານຂົງເຂດສະພາແຫ່ງຊາດ ແລະ ສະພາປະຊາຊົນຂວງ ທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II.

ຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ມີສະເໜີຈໍານວນໜຶ່ງທີ່ຕິດພັນກັບການພັດທະນາເສດຖະກິດ-ສັງຄົມຂອງແຂວງ ແລະ ການບໍລິຫານລັດ; ທັງນີ້ກໍ ເພື່ອເປັນບ່ອນອີງໃຫ້ແກ່ ສສຊ ປະຂໍາເຂດເລືອກຕັ້ງ, ສສຂ ແລະ ບັນດາອົງການບໍລິຫານລັດ ແກ້ໄຂຕາມພາລາບົດບາດ, ສິດ ແລະ ໜ້າທີ່ຂອງຕົນ. ແນ່ໃສ່ຮັບປະກັນໃຫ້ແກ່ການປັບປຸງອໍານາດລັດຂັ້ນທ້ອງຖິ່ນມີຄວາມເຂັ້ມແຂງ.