ໃນລະຫວ່າງວັນທີ 23-24 ພຶດສະພາ 2024 ທີ່ຜ່ານມານີ້ ສະພາປະຊາຊົນແຂວງສາລະວັນ ໄດ້ຈັດກອງປະຊຸມຝຶກອົບຮົມວຽກງານຄຸ້ມຄອງ, ປົກປ້ອງ ແລະ ແກ້ໄຂວຽກງານສາສະໜາ ໃຫ້ແກ່ສະມາຊິກສະພາປະຊາຊົນແຂວງ, ພະນັກງານ-ວິຊາການ ແລະ ພາກສ່ວນທີ່ກ່ຽວຂ້ອງ ຢູ່ທີ່ສະໂມສອນເມືອງສະໝ້ວຍ ແຂວງສາລະວັນ; ໂດຍການເປັນປະທານຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ, ເຂົ້າຮ່ວມມີທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງ, ມີພຣະອາຈານ ແສງມະນີ  ສຸວິໄລຄໍາ ຄະນະປະຈໍາ ອພສ ແຂວງ, ຫົວໜ້າຫ້ອງການອົງການພຸດທະສາສະໜາສໍາພັນລາວປະຈໍາແຂວງສາລະວັນ, ມີທ່ານປະທານ-ຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ມີນັກວິທະຍາກອນພາຍໃນສະພາປະຊາຊົນແຂວງ, ບັນດາທ່ານນັກສໍາມະນາກອນ ທີ່ເປັນສະມາຊິກສະພາປະຊາຊົນແຂວງ, ບັນດາທ່ານຕ່າງໜ້າພະແນກການທີ່ກ່ຽວຂ້ອງ, ຄະນະນໍາຂອງອົງການປົກຄອງເມືອງ, ພະນັກງານກອງກໍ່ສ້າງຮາກຖານຂັ້ນເມືອງ ແລະ ບັນດາທ່ານຫົວໜ້າຫ້ອງການອ້ອມຂ້າງເມືອງ;

ທັງນີ້, ເພື່ອເປັນການສ້າງຄວາມຮັບຮູ້ ແລະ ເຂົ້າໃຈເຖິງນະໂຍບາຍຂອງລັດ ຕໍ່ວຽກງານສາສະໜາຕ່າງໆ, ໂດຍສະເພາະການຄຸ້ມຄອງການເຄື່ອນໄຫວຂອງອົງການຈັດຕັ້ງພຸດທະສາສະໜາສໍາພັນລາວ, ອົງການຈັດຕັ້ງສາສະໜາຄິດສະຕຽນພາຍໃນແຂວງ; ຍົກສູງຄວາມສາມາດກ່ຽວກັບວິທີແກ້ໄຂປະກົດການຫຍໍ້ທໍ້ຂອງສາສະໜາ ຢູ່ຂັ້ນຮາກຖານ ແລະ ພ້ອມກັນປຶກສາຫາລືແກ້ໄຂບັນຫາທີ່ຍັງຄ້າງຄາ ເພື່ອຊອກວິທີທາງອອກໃຫ້ ຖືກຕ້ອງສອດຄ່ອງກັບລັດຖະທໍາມະນູນ, ກົດໝາຍ, ນິຕິກໍາທີ່ກ່ຽວຂ້ອງຂອງສູນກາງ ແລະ ຖ້ອງຖິນ; ທັງຍົກສູງຂີດຄວາມສາມາດທາງດ້ານວຽກງານຊົນເຜົ່າ  ນະໂຍບາຍຂອງລັດຕໍ່ວຽກງານຊົນເຜົ່າ, ການພັດທະນາເສດຖະກິດ-ສັງຄົມ ຂອງຊົນເຜົ່າຕ່າງໆ ຊຶງຕິດພັນກັບການເຊື່ອຖືຮີດຄອງປະເພນີ, ການເຊື່ອຖືສາສະໜາຕ່າງໆ, ທັງຮັບຮູ້ເຖິງພາລະບົດບາດ, ສິດ ແລະ ໜ້າທີ່ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ;

ຫົວຂໍ້ທີ່ຝຶກອົບຮົມໃນຄັ້ງນີ້ ປະກອບມີ 10 ຫົວຂໍ້ ຄື: ດໍາລັດ 315/ລບ, ລົງວັນທີ 16 ສິງຫາ 2016 ກ່ຽວກັບການຄຸ້ມຄອງ, ປົກປ້ອງການເຄື່ອນໄຫວວຽກງານສາສະໜາຢູ່ ສປປ ລາວ; ດໍາລັດວ່າດ້ວຍ ວຽກງານຊົນເຜົ່າ ສະບັບເລກທີ 207/ລບ, ລົງວັນທີ 20 ມີນາ 2020; ທັມມະນູນສົງລາວ (ພຣະພຸດທະສັງກາດ 2561); ທັມມະນູນວ່າດ້ວຍການຈັດຕັ້ງ ແລະ ການເຄື່ອນໄຫວສາສະໜາຄຼິດສະຕຽນ ຂອງສູນລວມຄຼິດຕະຈັກຂ່າວປະເສີດ ສປປ ລາວ ເລກທີ 137/ຄຂລ, ລົງວັນທີ 19 ທັນວາ 2019; ມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ, ສະບັບເລກທີ 100/ຄຈສຂ, ລົງວັນທີ 01 ກັນຍາ 2021; ພາລະບົດບາດຂອງຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ; ມະຕິຂອງຄະນະປະຈໍາສະພາປະຊາຊົນແຂວງ ກົນໄກປະສານງານລະຫວ່າງຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ ກັບ ບັນດາພະແນກການ-ອົງການທຽບເທົ່າ ອ້ອມຂ້າງແຂວງ, ສະບັບເລກທີ 19/ຄຈສຂ.ສວ, ລົງວັນທີ 25 ມັງກອນ 2024; ບົດລາຍງານ ວຽກງານການຄຸ້ມຄອງ, ປົກປ້ອງ ແລະ ແກ້ໄຂວຽກງານສະສາໜາ ຂອງເມືອງຕະໂອ້ຍ; ບົດລາຍງານ ວຽກງານການຄຸ້ມຄອງ, ປົກປ້ອງ ແລະ ແກ້ໄຂວຽກງານສະສາໜາ ຂອງເມືອງສະໝ້ວຍ; ບົດລາຍງານ ວຽກງານການຄຸ້ມຄອງ, ປົກປ້ອງ ແລະ ແກ້ໄຂວຽກງານສະສາໜາ ຂອງເມືອງຕຸ້ມລານ.

ເຊິ່ງໃນທີ່ປະຊຸມຜູ້ແທນທີ່ເຂົ້າຮ່ວມໄດ້ພັດປ່ຽນກັນປະກອບຄໍາຄິດຄໍາເຫັນ ແລະ ສົນທະນາແລກປ່ຽນບົດຮຽນກັນ ເຮັດໃຫ້ແຜນການຈັດກອງປະຊຸມຝຶກອົບຮົມ ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

ສະໜັບສະໜູນງົບປະມານໂດຍ: ໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS)

ພາບ-ຂ່າວ: ມິດດາວັນ ແສງບົວລະພາ