(ສພຊ) ເພື່ອເປັນການຜັນຂະຫຍາຍມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຕິດຕາມກວດກາການຜັນຂະຫຍາຍມາດຕາຂອງກົດໝາຍ ທີ່ກຳນົດໃຫ້ອອກເປັນນິຕິກໍາໃຕ້ກົດໝາຍ ສະບັບເລກທີ 291/ຄປຈ, ລົງວັນທີ 8 ທັນວາ 2022 ແລະ ເພື່ອເປັນບ່ອນອີງໃຫ້ກໍາມາທິການຂອງສະພາແຫ່ງຊາດ ແລະ ບັນດາກະຊວງ, ອົງການລັດ ໃນການຈັດຕັ້ງປະຕິບັດວຽກງານການຜັນຂະຫຍາຍມາດຕາຂອງກົດໝາຍ ທີ່ກໍານົດໃຫ້ອອກເປັນນິຕິກໍາໃຕ້ກົດໝາຍ ໃຫ້ມີຄວາມເປັນເອກະພາບກັນ; ເພື່ອສັງລວມການເຄື່ອນໄຫວວຽກງານ ຂອງສະພາປະຊາຊົນສູງສຸດ ແລະ ສະພາແຫ່ງຊາດ ໃນແຕ່ລະຊຸດ ແລະ ເສີມຂະຫຍາຍມູນເຊື້ອ, ບົດຮຽນປະສົບການ ໃນການປະຕິບັດໜ້າທີ່ການເມືອງຂອງສະພາແຫ່ງຊາດ ເປັນອົງການຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ, ເປັນອົງການສູງສຸດແຫ່ງອຳນາດລັດ, ເປັນອົງການນິຕິບັນຍັດ, ຕົກລົງບັນຫາສໍາຄັນພື້ນຖານຂອງປະເທດຊາດ ແລະ ຕິດຕາມກວດກາການເຄົາລົບ, ປະຕິບັດລັດຖະທຳມະນູນ ແລະ ກົດໝາຍ ຂອງບັນດາອົງການລັດ ໃຫ້ນັບມື້ມີຜົນສຳເລັດ ແລະ ນຳຜົນປະໂຫຍດຕົວຈິງມາໃຫ້ປະຊາຊົນລາວບັນດາເຜົ່າ. ໃນລະຫວ່າງວັນທີ 6-9 ທັນວາ 2023 ທີ່ເມືອງວັງວຽງ ແຂວງວຽງຈັນ ກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ ກໍາມາທິການກົດໝາຍ ສະພາແຫ່ງຊາດ ໄດ້ສໍາເລັດກອງປະຊຸມວິຊາການຄົ້ນຄວ້າຮ່າງຄຳແນະນຳຂອງຄະນະປະຈຳສະພາແຫ່ງຊາດ ກ່ຽວກັບການຜັນຂະຫຍາຍມາດຕາຂອງກົດໝາຍ ແລະ ຂຽນເນື້ອໃນປະຫວັດສະພາແຫ່ງຊາດ ໂດຍການເປັນປະທານຂອງທ່ານ ພອນແກ້ວ ຕົ້ນວໍລະຈິດ ຫົວໜ້າກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ, ເຂົ້າຮ່ວມມີບັນດາທ່ານຮອງຫົວໜ້າກົມ, ຄະນະພະແນກ ແລະ ວິຊາການ ຂອງກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ ແລະ ກົມກ່ຽວຂ້ອງຈໍານວນໜຶ່ງ ພາຍໃນສະພາແຫ່ງຊາດ.
ເນື້ອໃນຂອງກອງປະຊຸມຄັ້ງນີ້ ປະກອບມີ: 1. ຄົ້ນຄວ້າສ້າງຮ່າງຄຳແນະນຳຂອງຄະນະປະຈຳສະພາແຫ່ງຊາດ ວ່າດ້ວຍການຜັນຂະຫຍາຍມາດຕາຂອງກົດໝາຍ ທີ່ກໍານົດໃຫ້ອອກເປັນນິຕິກຳໃຕ້ກົດໝາຍ; 2. ຂຽນ ແລະ ຮຽບຮຽງເນື້ອໃນເຂົ້າໃສ່ຮ່າງປຶ້ມ 50 ປີ ແຫ່ງການເຕີບໃຫຍ່ຂະຫຍາຍຕົວຂອງສະພາແຫ່ງຊາດ ແຫ່ງ ສປປ ລາວ.
ໂອກາດດັ່ງກ່າວ ທ່ານ ພອນແກ້ວ ຕົ້ນວໍລະຈິດ ໄດ້ມີຄໍາເຫັນກ່າວປິດກອງປະຊຸມວ່າ: ການສ້າງຄຳແນະນຳຂອງຄະນະປະຈຳສະພາແຫ່ງຊາດກ່ຽວກັບການຜັນຂະຫຍາຍມາດຕາຂອງກົດໝາຍນີ້ ຈະເປັນນິຕິກຳໜຶ່ງ ເພື່ອເປັນບ່ອນອີງໃຫ້ກຳມາທິການຂອງສະພາແຫ່ງຊາດ ໃນການຕິດຕາມກວດກາ ແລະ ຊຸກຍູ້ບັນດາກະຊວງ, ອົງການລັດ ໃນການຜັນຂະຫຍາຍມາດຕາຂອງກົດໝາຍທີ່ກໍານົດໃຫ້ຜັນຂະຫຍາຍອອກເປັນນິຕິກຳໃຕ້ກົດໝາຍ ທີ່ຢູ່ໃນຄວາມຮັບຜິດຊອບຂອງຕົນ; ການຂຽນ ແລະ ຮຽບຮຽງເນື້ອໃນປະຫວັດຂອງສະພາແຫ່ງຊາດ ແມ່ນເພື່ອເປັນການສັງລວມ, ເຜີຍແຜ່ ແລະ ເຊີດຊູຜົນງານອັນພົ້ນເດັ່ນຕະຫຼອດໄລຍະຜ່ານມາ ຂອງສະພາປະຊາຊົນສູງສຸດໃນເມື່ອກ່ອນ ກໍຄືສະພາແຫ່ງຊາດ ໃນປັດຈຸບັນ ໃນການປະຕິບັດສອງໜ້າທີ່ຍຸດທະສາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ ຕາມພາລະບົດບາດຂອງສະພາແຫ່ງຊາດ.
(ພາບ ແລະ ຂ່າວ: ນາງ ສຸມົນທາ ງາໄຊ)