ຕອນແລງ ຂອງວັນທີ 24 ຕຸລາ 2023 ຜ່ານມານີ້ ສະຫະພັນແມ່ຍິງ ໜ່ວຍສະພາປະຊາຊົນແຂວງໄຊສົມບູນ ໄດ້ໄຂກອງປະຊຸມໃຫຍ່ຂຶ້ນທີ່ຫ້ອງປະຊຸມຂອງສານປະຊາຊົນແຂວງ ໂດຍພາຍໃຕ້ການເປັນປະທານຂອງ ສະຫາຍ ນ. ເພັດສະໝອນ ໄຊສົມບຸນ ປະທານແມ່ຍິງໜ່ວຍ, ຫົວໜ້າຂະແໜງວັດທະນະທໍາ-ສັງຄົມ ແລະ ບັນດາເຜົ່າ ແລະ ໃຫ້ກຽດເຂົ້າຮ່ວມຂອງ ສະຫາຍ ຄໍາພູທອນ ວົງພະຈັນ ເລຂາໜ່ວຍພັກ, ຮອງປະທານສະພາປະຊາຊົນແຂວງ, ສະຫາຍ ນ. ຄໍາສີ ສິດທິວໍລະດາ ກໍາມະການພັກແຂວງ, ປະທານຄະນະບໍລິຫານງານສະຫະພັນແມ່ຍິງແຂວງ ແລະມີບັນດາ ປະທານແມ່ຍິງໜ່ວຍ ພາຍໃນອົງການຕຸລາການ ຕະຫຼອດຮອດສະມາຊິກແມ່ຍິງສົມບູນ ຂອງສະພາປະຊາຊົນແຂວງໄຊສົມບູນເຂົ້າຮ່ວມຢ່າງພ້ອມພຽງ.

ທີ່ປະຊຸມ ໄດ້ຮັບຟັງການຜ່ານ ມະຕິຕົກລົງ ອະນຸມັດເປີດກອງປະຊຸມຂອງເລຂາໜ່ວຍພັກ ຈາກ ສະຫາຍ ນ. ຄູລໍ່ ໄຟຈົງ ຮອງປະທານແມ່ຍິງໜ່ວຍ, ຮອງຂະແໜງບໍລິຫານການເງິນ ແລະ ສະຫາຍ ນ. ເພັດສະໝອນ ໄຊສົມບຸນ ໄດ້ກ່າວເປີດກອງປະຊຸມ ພ້ອມທັງຜ່ານ ບົດລາຍງານການເມືອງທັງສອງພາກ, ເຊິ່ງສະແດງໃຫ້ເຫັນຜົນງານຫຼາຍດ້ານ ທີ່ແມ່ຍິງໜ່ວຍສະພາປະຊາຊົນແຂວງ ມີຄວາມຫາວຫັນ, ສາມາດຍາດຜົນສໍາເລັດທີ່ພົນເດັ່ນອັນຫຼາກຫຼາຍ ແລະ ຍັງມີສະມາຊິກ ບາງຈໍານວນ ສາມາດສ້າງລາຍຮັບເຮັດດ້ວຍອາຊີບເສີມ ເຂົ້າສູ່ຄອບຄົວດ້ວຍການປູກພືດ, ລ້ຽງສັດນ້ອຍ-ສັດໃຫຍ່ ແລະ ມີທຸລະກິດເປັນຂອງຕົນເອງ ແລະອື່ນໆ; ແລ້ວສະຫາຍ ນ. ຄໍາສີ ສິດທິວໍລະດາ ໄດ້ມອບໃບຍ້ອງຍໍ ຜົນງານ 5 ປີໃຫ້ແກ່ ສະຫະພັນແມ່ຍິງ ສະພາປະຊາຊົນແຂວງ ພ້ອມດ້ວຍສະມາຊິກທັງໝົດພາຍໃນໜ່ວຍ.

ໃນໂອກາດດັ່ງກ່າວ ທີ່ປະຊຸມໄດ້ຮັບຟັງ ການຜ່ານບົດສໍາຫຼວດການນໍາພາລວມ ຂອງຄະນະໜ່ວຍຊຸດເກົ່າ ແລ້ວໄດ້ຮັບຟັງ ຂໍ້ຕົກລົງຂອງເລຂາໜ່ວຍພັກ ວ່າດ້ວຍການແຕ່ງຕັ້ງນະນະຄວບຄຸມບັດ, ຜ່ານມາດຖານເງື່ອນໄຂ ແລະ ລາຍຊື່ບຸກຄະລາກອນຜູ້ສະໝັກເລືອກຕັ້ງ ຄະນະສະຫະພັນແມ່ຍິງໜ່ວຍ ຊຸດໃໝ່ ແລ້ວສະມາຊິກທຸກສະຫາຍໄດ້ດໍາເນີນປ່ອນບັດ. ກອງປະຊຸມ ຄັ້ງປະຖົມມະລືກຂອງສະຫະພັນແມ່ຍິງໜ່ວຍ ສະພາປະຊາຊົນແຂວງ ໄດ້ປ່ອນບັດເລືອກເອົາ 3 ສະຫາຍ ຄືດັ່ງນີ້: ສະຫາຍ ນ. ເພັດສະໝອນ ໄຊສົມບຸນ ເປັນປະທານສະຫະພັນແມ່ຍິງໜ່ວຍ; ສະຫາຍ ນ ຄອນສະຫວັນ ຈັນທະອຸດອນ ເປັນຮອງປະທານສະຫະພັນແມ່ຍິງໜ່ວຍ ແລະ ສະຫາຍ ນ ສະພານຄໍາ ແກ້ວວິໄລ ເປັນຮອງປະທານແມ່ຍິງ ແລະ ພ້ອມທັງເປັນປະທານກວດກາ. ນອກນັ້ນ, ທີ່ປະຊຸມໄດ້ຮັບຟັງທິດຊີ້ນໍາວຽກງານແມ່ຍິງ ເພື່ອສືບຕໍ່ປະຕິບັດພາລະກິດໃນຕໍ່ໜ້າ ຈາກສະຫາຍ ນ ຄໍາສີ ສິດທິວໍລະດາ ແລະ ຮັບຟັງຄໍາໂອ້ລົມຕໍ່ກອງປະຊຸມຂອງ ສະຫາຍ ຄໍາພູທອນ ວົງພະຈັນ ໂດຍສະຫາຍ ໄດ້ຍ້ອງຍໍຊົມເຊີຍທັງ ຄະນະຊຸດເກົ່າ ແລະຊຸດໃໝ່ ຈົ່ງຮັກສາມູນເຊື້ອອັນດີງາມ, ສືບຕໍ່ຮັກແພງ, ຊ່ວຍເຫຼືອເຊິ່ງກັນ ແລະກັນ ພ້ອມທັງຮັດແໜ້ນຄວາມສາມັກຄີທັງພາຍໃນ ແລະ ພາຍນອກ ໃຫ້ເປັນແມ່ຍິງສາມດີຂອງສະພາປະຊາຊົນແຂວງໄຊສົມບູນ ສືບໆໄປ.

( ນ.ອໍາໄພພອນ ແກ້ວວິໄລ )