(ສພຊ) ພາຍຫຼັງດໍາເນີນມາເປັນເວລາ 2 ວັນ ມາໃນວັນທີ 8 ພະຈິກ 2022 ທີ່ນະຄອນຫລວງວຽງຈັນ ກອງປະຊຸມຄົບຄະນະກໍາມາທິການວັດທະນະທໍາ-ສັງຄົມ ປະຈໍາປີ 2022 ໄດ້ອັດລົງດ້ວຍຜົນສໍາເລັດອັນຈົບງາມ ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທຳ-ສັງຄົມ ສະພາແຫ່ງຊາດ, ເຂົ້າຮ່ວມມີທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການດັ່ງກ່າວ; ມີບັນດາທ່ານລັດຖະມົນຕີທີ່ກ່ຽວຂ້ອງ, ບັນດາທ່ານຮອງປະທານກຳມາທິການພາຍໃນສະພາແຫ່ງຊາດ, ບັນດາທ່ານສະມາຊິກສາພາແຫ່ງຊາດ ທີ່ເປັນກໍາມະການຂອງກຳມາທິການດັ່ງກ່າວ ຈາກ 18 ເຂດເລືອກຕັ້ງທົ່ວປະເທດ ພ້ອມດ້ວຍແຂກຖືກເຊີນ.
ກອງປະຊຸມໄດ້ຮັບຟັງ ບົດສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວ ປີ 2023 ຂອງກຳມາທິການ; ບົດສັງລວມສະພາບການຈັດຕັ້ງປະຕິບັດບັນດາຄາດໝາຍ ປະຈຳປີ 2022 ແລະ ແຜນຄາດຄະເນ ປະຈຳປີ 2023 ໃນຂົງເຂດວັດທະນະທຳ-ສັງຄົມ; ຮັບຟັງການປະກອບຄຳເຫັນຂອງບັນດາພາກສ່ວນຕ່າງໆຂັ້ນສູນກາງ ເປັນຕົ້ນ: ກະຊວງສາທາລະນະສຸກ, ກະຊວງສຶກສາທິການ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ອົງການກາແດງແຫ່ງຊາດ; ບົດລາຍງານຜົນການຕິດຕາມກວດກາ ກ່ຽວກັບການສ້າງວິຊາຊີບ, ການພັດທະນາສີມືແຮງງານ, ການສ້າງວຽກເຮັດງານທຳຂອງປະຊາຊົນ ເພື່ອແກ້ໄຂບັນຫາການວ່າງງານ; ຮ່າງຄຳຊັກຖາມໃນຂົງເຂດວັດທະນະທຳ-ສັງຄົມ ຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX; ຮ່າງຄໍາຊັກຖາມຫົວຂໍ້ຕິດຕາມສະເພາະກ່ຽວກັບການສ້າງວິຊາຊີບ, ການພັດທະນາສີມືແຮງງານ, ການສ້າງວຽກເຮັດງານທຳຂອງປະຊາຊົນ ເພື່ອແກ້ໄຂບັນຫາການວ່າງງານ; ເຜີຍແຜ່ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງຄະນະສະມາຊິກສະພາແຫ່ງຊາດ ເພດຍິງ ຊຸດທີ IX. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາ.
ໂອກາດດັ່ງກ່າວ, ທ່ານ ຄໍາໃບ ດໍາລັດ ໄດ້ມີຄຳເຫັນໂອ້ລົມຕໍ່ກອງປະຊຸມວ່າ: ຕາງໜ້າຄະນະປະຈໍາສະພາແຫ່ງຊາດ ຂໍສະແດງຄວາມຊົມເຊີຍ ແລະ ຕີລາຄາສູງ ຕໍ່ກໍາມາທິການວັດທະນະທໍາ-ສັງຄົມ ກໍຄືບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການ ທີ່ໄດ້ມີຄວາມເອົາໃຈໃສ່, ມີຄວາມພະຍາຍາມສູງ ໃນການນໍາພາການເຄື່ອນໄຫວປະຕິບັດວຽກງານໃນໄລຍະ 1 ປີຜ່ານມາ (ປີ 2022), ພ້ອມນັ້ນ ທ່ານຮອງປະທານສະພາແຫ່ງຊາດ ຍັງໄດ້ເນັ້ນໃຫ້ບັນດາຜູ້ເຂົ້າຮ່ວມກອງປະຊຸມເອົາໃຈໃສ່ທົບທວນຄືນ, ກໍາແໜ້ນທີ່ຕັ້ງ, ພາລະບົດບາດ, ສິດ ແລະ ໜ້າທີ່ຂອງກໍາມາທິການວັດທະນະທໍາ-ສັງຄົມ ຕາມມະຕິຂອງຄະນະປະຈໍາສະພາແຫ່ງຊາດ ເລກທີ 167/ຄປຈ, ລົງວັນທີ 05/07/2021; ກໍາແໜ້ນແຜນວຽກຈຸດສຸມຂອງສະພາແຫ່ງຊາດ ເປັນຕົ້ນ: ວຽກງານການສ້າງ ແລະ ປັບປຸງກົດໝາຍ; ຕ້ອງກໍາແໜ້ນແຜນການເຄື່ອນໄຫວຂອງສະພາແຫ່ງຊາດ 2023-2025 ໂດຍຕິດພັນກັບຂົງເຂດວັດທະນະທໍາ-ສັງຄົມ ນັບທັງແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ IX ຂອງລັດຖະບານ ເປັນຕົ້ນແມ່ນການຕິດຕາມກວດກາ, ຊຸກຍູ້ການຈັດຕັ້ງປະຕິບັດບັນດາຕົວຊີ້ວັດ (ຄາດໝາຍ) ຂອງຂະແໜງການວັດທະນະທໍາ-ສັງຄົມ; ສືບຕໍ່ເອົາໃຈໃສ່ຕິດຕາມກວດກາວຽກງານຂົງເຂດວັດທະນະທໍາ-ສັງຄົມ: ເປັນຕົ້ນຂະແໜງການສຶກສາ ເຊິ່ງປັດຈຸບັນເຫັນວ່າມີຜົນກະທົບດ້ານສັງຄົມຢູ່ບໍ່ໜ້ອຍ ເປັນຕົ້ນ: ອັດຕາການເຂົ້າຮຽນໃນຊັ້ນຕ່າງໆ, ສະພາບການຮຽນ-ການສອນ ຢູ່ເຂດຊົນນະບົດ-ເຂດຫ່າງໄກສອກຫຼີກ; ຂົງເຂດແຮງງານ ແລະ ສະຫວັດດີການສັງຄົມ: ການຕິດຕາມ ການປັບປຸງຄຸນນະພາບຂອງແຮງງານ (ຄວາມເຂັ້ມແຂງຂອງແຮງງານ), ການສ້າງວຽກເຮັດງານທໍາ, ການແຕກໂຕນກັນ ລະຫວ່າງ ສັງຄົມຊົນນະບົດ ແລະ ສັງຄົມຕົວເມືອງ; ຮຽກຮ້ອງໃຫ້ບັນດາທ່ານລົງເລິກບັນດາວຽກງານໃນຂົງເຂດຄວາມຮັບຜິດຊອບຂອງຕົນ ແລະ ຂົງເຂດຂອງກໍາມາທິການວັດທະນະທໍາ-ສັງຄົມ ເພື່ອລົງເລິກ, ກໍາແໜ້ນບັນຫາ, ພ້ອມນັ້ນ ກໍໃຫ້ເອົາໃຈໃສ່ໃນລະບົບການສ່ອງແສງລາຍງານ ໃຫ້ກໍາມາທິການ ເດືອນລະເທື່ອ ຕາມໜ້າວຽກຕົວຈິງ; ກໍາມາທິການ ສືບຕໍ່ເອົາໃຈໃສ່ເພີ່ມທະວີວຽກງານການສ້າງຄວາມເຂັ້ມແຂງ ເປັນຕົ້ນແມ່ນການເຝິກອົບຮົມໃຫ້ ສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການ ຕະຫຼອດຮອດພະນັກງານທີ່ເປັນເສນາທິການຂົງເຂດວັດທະນະທໍາ-ສັງຄົມ; ເພື່ອຍົກລະດັບຄວາມຮູ້-ຄວາມສາມາດ ໃຫ້ມີຄວາມເລິກເຊິ່ງ, ເຂັ້ມແຂງ ຂຶ້ນເປັນກ້າວໆ.
(ພາບ ແລະ ຂ່າວ: ກົງທະນູຄໍາ ພິພັດເສລີ)