(ສພຊ) ໃນວັນທີ 20 ຕຸລາ 2023 ກອງປະຊຸມຍົກສູງຄຸນນະພາບທາງດ້ານເນື້ອໃນໃຫ້ແກ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໄດ້ສຳເລັດລົງຢ່າງເປັນທາງການ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ພາຍຫຼັງດຳເນີນມາເປັນເວລາ 5 ວັນເຕັມ ທີ່ສູນຮ່ວມມືສາກົນ ແລະ ເຝິກອົບຮົມ (ICTC) ນະຄອນຫຼວງວຽງຈັນ ໂດຍການເປັນປະທານປິດກອງປະຊຸມຂອງທ່ານ ພົນໂທ ສຸວອນ ເລືອງບຸນມີ ຮອງປະທານຄະນະປະຈໍາສະພາແຫ່ງຊາດ; ມີບັນດາທ່ານຮອງປະທານຄະນະປະຈໍາສະພາແຫ່ງຊາດ, ກໍາມະການຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ, ສະມາຊິກລັດຖະບານ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ເລຂາທິການສະພາແຫ່ງຊາດ, ຮອງລັດຖະມົນຕີ, ຮອງປະທານກໍາມາທິການ ແລະ ຄະນະເລຂາທິການສະພາປະຊາຊົນຂັ້ນແຂວງ ພ້ອມດ້ວຍແຂກຖືກເຊີນ ແລະ ພາກສ່ວນກ່ຽວຂ້ອງ.
ຕະຫຼອດໄລຍະດຳເນີນກອງປະຊຸມຄັ້ງນີ້ ໄດ້ດໍາເນີນໄປດ້ວຍບັນຍາກາດທີ່ສ້າງສັນ, ບັນດາສະມາຊິກສະພາແຫ່ງຊາດ ໄດ້ຄົ້ນຄວ້າປະກອບຄໍາເຫັນຢ່າງກົງໄປກົງມາ, ມີຄວາມເປັນເອກະພາບສູງ ແລະ ໄດ້ສຸມທຸກເຫື່ອແຮງ, ສະຕິປັນຍາ ແລະ ນໍາເອົາແນວທາງນະໂຍບາຍ, ລັດຖະທໍາມະນູນ, ກົດໝາຍ ແລະ ສະພາບຄວາມເປັນຈິງ ຢູ່ແຕ່ລະທ້ອງຖິ່ນມາປະກອບຄໍາເຫັນ ແລະ ສະເໜີ ເພື່ອເປັນຂໍ້ມູນໃຫ້ກະຊວງ, ອົງການກ່ຽວຂ້ອງນໍາໄປຄົ້ນຄວ້າ, ປັບປຸງເຂົ້າໃສ່ເນື້ອໃນບົດລາຍງານ, ບັນດາຮ່າງກົດໝາຍໃນຂົງເຂດວຽກງານຕ່າງໆ ໃຫ້ສົມບູນຄົບຖ້ວນ ກ່ອນຈະນໍາເຂົ້າພິຈາລະນາຢູ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.
ໂອກາດດັ່ງກ່າວ, ທ່ານ ພົນໂທ ສຸວອນ ເລືອງບຸນມີ ໄດ້ມີຄຳເຫັນ ແລະ ໃຫ້ທິດຊີ້ນຳຕໍ່ກອງປະຊຸມ ເຊິ່ງມີເນື້ອໃນບາງຕອນສໍາຄັນວ່າ: ການດໍາເນີນກອງປະຊຸມຍົກສູງຄຸນນະພາບເນື້ອໃນຄັ້ງນີ້ ແມ່ນເພື່ອສ້າງເງື່ອນໄຂໃຫ້ບັນດາທ່ານ ສະມາຊິກສະພາແຫ່ງຊາດ ເຂົ້າໃຈເນື້ອໃນຂອງບັນດາເອກະສານ ທີ່ຈະພິຈາລະນາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃຫ້ຈະແຈ້ງ. ສະນັ້ນ, ບັນຫາໃດທີ່ີມີຄວາມເຂົ້າໃຈ ແລະ ເອກະພາບສູງໃນກອງປະຊຸມສໍາມະນາແລ້ວ ກໍຫຼຸດຜ່ອນການປະກອບຄໍາເຫັນຕໍ່ບົດດັ່ງກ່າວ ສ່ວນບັນຫາທີ່ຍັງບໍ່ທັນເຂົ້າໃຈເປັນເອກະພາບກັນ ໃຫ້ຄົ້ນຄວ້າ, ພິຈາລະນາ ແລະ ສະເໜີວິທີແກ້ໄຂຍົກຂຶ້ນຢູ່ກອງປະຊຸມສະພາແຫ່ງຊາດຢ່າງສ້າງສັນ, ມີເຫດຜົນ ແລະ ແທດຕົວຈິງ.
ບັນດາເນື້ອໃນທີ່ນໍາມາຄົ້ນຄວ້າ, ປະກອບຄໍາເຫັນຄັ້ງນີ້ ເຫັນວ່າບັນດາທ່ານທີ່ເຂົ້າຮ່ວມໄດ້ມີຄວາມເຂົ້າໃຈ, ເອກະພາບຫຼາຍບັນຫາ ພ້ອມທັງໄດ້ຮັບການຊີ້ແຈງຢ່າງລະອຽດດີສົມຄວນ, ບັນດາທ່ານສະມາຊິກສະພາແຫ່ງຊາດ ປະກອບຄໍາເຫັນລົງເລິກຕໍ່ເນື້ອໃນຕ່າງໆຢ່າງກົງໄປກົງມາ ເພື່ອເປັນຂໍ້ມູນໃຫ້ແກ່ພາກສ່ວນຕ່າງໆນໍາໄປປັບປຸງເພີ່ມຕື່ມ ແລະ ສ້າງຄວາມເປັນເອກະພາບ, ຮັບປະກັນໃຫ້ເນື້ອໃນສາມາດນໍາເຂົ້າພິຈາລະນາໃນກອງປະຊຸມສະພາແຫ່ງຊາດ ມີຄຸນນະພາບ ແລະ ໄດ້ຮັບຜົນສໍາເລັດຕາມແຜນການທີ່ວາງໄວ້.
ຜົນສໍາເລັດດັ່ງກ່າວ ແມ່ນໝາກຜົນຂອງການເສີມຂະຫຍາຍສະຕິປັນຍາ, ການປະສານສົມທົບ ລະຫວ່າງຄະນະປະຈໍາສະພາແຫ່ງຊາດ ກັບລັດຖະບານ, ຄະນະປະຈໍາສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທົ່ວປະເທດ, ຄະນະເລຂາທິການສະພາແຫ່ງຊາດ ກັບບັນດາກໍາມາທິການ, ກະຊວງ, ອົງການ, ຄະນະເລຂາທິການສະພາປະຊາຊົນຂັ້ນແຂວງ ແລະ ສະເໜີໃຫ້ຜູ້ຕາງໜ້າລັດຖະບານ ເຂົ້າຮ່ວມຮັບຟັງຄຳສະເໜີຂອງ ສະມາຊິກສະພາແຫ່ງຊາດ ໃນກອງປະຊຸມລັກສະນະນີ້ ຫຼື ໂອກາດຕ່າງໆຫຼາຍຂຶ້ນ.