ເນື່ອງໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອ 4 ຂອງສະພາແຫ່ງຊາດ ຊຸດທີ IX, ວັນທີ 12 ທັນວາ 2022, ທ່ານ ນາງ ຄໍາພອນ ພິມມະຈັນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ແຂວງອຸດົມໄຊ, ຮອງປະທານສະພາປະຊາຊົນແຂວງ ໄດ້ຕາງໜ້າຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 04 ແຂວງອຸດົມໄຊ ໃຫ້ສຳພາດຕໍ່ກົມສື່ມ່ວນຊົນສະພາແຫ່ງຊາດ ວ່າ: ນັບແຕ່ກອງປະຊຸມສະໄໝສາມັນເທື່ອທີ 3 ມາເຖີງປັດຈຸບັນ ເຫັນວ່າຄະນະສະມາຊິກສະພາແຫ່ງຊາດ ໄດ້ຕັ້ງໜ້າປະຕິບັດຕາມພາລະບົດບາດ, ສິດ ແລະ ໜ້າທີ່ ທີ່ໄດ້ກໍານົດໄວ້ໃນກົດໝາຍ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງພໍ່ແມ່ປະຊາຊົນບັນດາເຜົ່າ ເຊິ່ງສະ ແດງອອກໃຫ້ເຫັນໄດ້ຫຼາຍດ້ານຄື:
ດ້ານນິຕິບັນຍັດ: ເປັນເຈົ້າການປະສານສົມທົບກັບສະພາປະຊາຊົນແຂວງ ໃນການຈັດກອງປະຊຸມປະເມີນຜົນ ການປະຕິບັດກົດໝາຍ 02 ຄັ້ງ, ລວມມີ 8 ສະບັບ, ນອກນີ້, ຍັງໄດ້ຈັດກອງປະຊຸມທາບທາມບັນດາຮ່າງກົດໝາຍ ເພື່ອແລກປ່ຽນຄໍາຄິດຄໍາເຫັນ ຈາກຂະແໜງການທີ່ກ່ຽວຂ້ອງທີ່ສະພາແຫ່ງຊາດສົ່ງໃຫ້ກ່ອນຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 3-4 ຂອງສະພາແຫ່ງຊາດ ຊຸດທີ IX ໄດ້ທັງໝົດ 24 ສະບັບ; ຕິດພັນກັບບັນຫາຂ້າງເທີ່ງ ສະມາຊິກສະພາແຫ່ງຊາດປະຈໍາເຂດເລືອກຕັ້ງ ຍັງເອົາໃຈໃສ່ເຂົ້າໃນການຄົ້ນຄວ້າ ພິຈາລະນາ ແລະ ຮັບຮອງເອົາການສ້າງ ແລະ ປັບປຸງນິຕິກໍາຂັ້ນແຂວງ ຈໍານວນ 6 ສະບັບ ໃນນີ້: ສ້າງໃໝ່ 4 ສະບັບ; ປັບປຸງ 2 ສະບັບ.
ດ້ານຕົກລົງບັນຫາສໍາຄັນ: ໄດ້ປະກອບສ່ວນຢ່າງຕັ້ງໜ້າເຂົ້າໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນໄດ້ຫຼາຍບັນຫາເຊັ່ນ: ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ພິຈາລະນາ ຮັບຮອງເອົາການສະເໜີແຕ່ງຕັ້ງບຸກຄະລາກອນຂອງລັດຖະບານຈໍານວນໜຶ່ງ. ນອກນີ້ ຍັງໄດ້ຈັດກອງປະຊຸມຮຽກໂຮມເອົາບັນດາພະແນກການທີ່ກ່ຽວຂ້ອງ ເຂົ້າມາລາຍງານສະພາບພົ້ນເດັ່ນ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຂອງຕົນໃນ 3 ຂົງເຂດໄລຍະ 6 ເດືອນ ແລະ ປະຈໍາ 1 ປີ ເພື່ອເປັນຂໍ້ມູນໃຫ້ ສະມາຊິກສະພາແຫ່ງຊາດ ກ່ອນເຂົ້າຮ່ວມກອງປະຊຸມສະໄໝສາມັນທຸກໆເທື່ອຂອງສະພາແຫ່ງຊາດ ຊຸດທີ IX.
ດ້ານຕິດຕາມກວດກາ: ໂດຍປະຕິບັດຕາມກົດໝາຍ ວ່າດ້ວຍ ການຕິດຕາມກວດກາຂອງສະພາແຫ່ງຊາດ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກໍ່ໄດ້ສົມທົບກັບສະພາປະຊາຊົນແຂວງ ລົງເຄື່ອນໄຫວຕິດ ຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2022 ແລະ ການຈັດຕັ້ງປະຕິບັດ 2 ວາລະແຫ່ງຊາດ ໃນ 3 ເມືອງ: ເມືອງງາ, ເມືອງນາໝໍ້ ແລະ ເມືອງແບງ: ລົງຕິດຕາມກວດກາ ຊຸກຍູ້ ຜົນກະທົບຂອງໂຄງການກໍ່ສ້າງເສັ້ນທາງລົດໄຟລາວ-ຈີນ ຊ່ວງຜ່ານແຂວງອຸ ດົມໄຊ, ເມືອງ ໄຊ, ເມືອງ ງາ, ເມືອງ ນາໝໍ້ ເປັນຕົ້ນແມ່ນ ການຊົດເຊີຍໃຫ້ແກ່ປະຊາຊົນທີ່ຖືກຜົນກະທົບ ໃນປັດຈຸ ບັນເຫັນວ່າໄດ້ຊົດເຊີຍຜົນກະທົບໃຫ້ແກ່ປະຊາຊົນໄປແລ້ວໃນ 3 ເມືອງ ລວມມູນຄ່າ 198.643.709.635 ກີບ ໃນມູນຄ່າທັງໝົດ 253.063.454.748 ກີບ ປັດຈຸບັນຍັງຄ້າງ 54.419.745.113 ກີບ; ລົງຕິດຕາມກວດກາໂຄງການຂຸດຄົ້ນແຮ່ຄໍາ ເມືອງ ປາກແບງ ເປັນຕົ້ນແມ່ນ ການປ່ອຍນໍ້າເສຍລົງສູ່ແຫຼ່ງ ນໍ້າທໍາມະຊາດ ເຮັດໃຫ້ສັດຂອງປະຊາຊົນທີ່ໄປດື່ມນໍ້າແລ້ວຕາຍ ຕາມຄໍາຮ້ອງຂອງປະຊາຊົນ; ລົງເຄື່ອນໄຫວຊຸກຍູ້, ຕິດຕາມກວດກາ ການຈັດຕັ້ງປະຕິບັດບັນດາຄາຍໝາຍ ຂົງເຂດການສຶກສາທິການ ແລະ ກິລາເປັນຕົ້ນ: ການປັບຄຸນນະພາບການຮຽນ-ການສອນໃນທຸກຊັ້ນສາຍໃນໄລຍະໃໝ່ ແລະ ການຈັດຕັ້ງປະຕິ ບັດວຽກງານກາຍະກໍາ.
ຜ່ານການລົງເຄື່ອນໄຫວພົບປະ ພໍ່-ແມ່ປະຊາຊົນ ໄດ້ນໍາເອົາເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 2-3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ລົງເຜີຍແຜ່ ໄດ້ທັງໝົດ 177 ຈຸດ, ມີຜູ້ເຂົ້າຮ່ວມຮັບຟັງ 15.947 ຄົນ, ຍິງ 5.811 ຄົນ; ຕິດພັນກັບການລົງເຜີຍແຜ່ຍັງເປັນການຕິດຕາມກວດກາ, ຮັບຟັງຄໍາຄິດເຫັນ, ຄໍາສະເໜີ ຂອງປະຊາຊົນໄດ້ທັງໝົດ 848 ຄໍາສະເໜີ ຂົງເຂດເສດຖະກິດມີ 327 ຂໍ້, ຂົງເຂດວັດທະນະທຳ-ສັງຄົມ ມີ 143 ຂໍ້ ແລະ ຂົງເຂດຍຸຕິທໍາ ແລະ ປກຊ-ປກສ ມີ 19 ຂໍ້, ພົວພັນເຖິງຂັ້ນສູນກາງ ມີ 20 ຂໍ້, ຂັ້ນແຂວງ 113 ຂໍ້ ແລະ ຂັ້ນເມືອງ 715 ຂໍ້; ຄໍາສະເໜີຂອງປະຊາຊົນສ່ວນຫຼາຍ ແມ່ນຕິດພັນກັບການກໍ່ສ້າງພື້ນຖານໂຄ່ງລ່າງ ແລະ ການພັດທະນາອາຊີບເຊັ່ນ: ການສ້ອມແປງ ແລະ ການຍົກລະດັບເສັ້ນທາງ, ຊົນລະປະທານ, ນໍ້າລິນສະອາດ, ການສົ່ງເສີມການປູກ-ການລ້ຽງ, ການແກ້ໄຂ ແລະ ຄ່າຊົດເຊີຍຜູ້ທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ, ການແກ້ໄຂຄວາມທຸກຍາກໃຫ້ແກ່ປະຊາຊົນໃນຂອບເຂດຂອງໂຄງການຂຸດຄົ້ນແຮ່ທາດຕ່າງໆ.
ພາບ/ຂ່າວ: ແສງພອນ ອິນນະລົງ.