ຕອນບ່າຍຂອງວັນຈັນ, ວັນທີ 28 ພະຈິກ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດກອງປະ ຊຸມກອງປະຊຸມປຶກສາຫາລືວຽກງານພົ້ນເດັ່ນ ຂອງຄະນະປະຈໍາສະພາປະຊາຊົນແຂວງ, ໂດຍການເປັນປະທານຂອງທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ມີບັນດາທ່ານໃນຄະນະປະຈຳສະພາປະຊາຊົນແຂວງ ເຂົ້າຮ່ວມ.

ກອງປະຊຸມ, ໄດ້ຮັບຟັງການຜ່ານຮ່າງບົດສະຫຼຸບການເຄື່ອນໄຫວວຽກງານປະຈໍາເດືອນ ພະຈິກ ແລະ ວາງທິດທາງແຜນການ ປະຈໍາເດືອນ 12 ປີ 2022 ຂອງຄະນະປະຈໍາສະພາປະຊາຊົນແຂວງ ຫຼັງຈາກນັ້ນບັນດາທ່ານໄດ້ປະກອບຄໍາຄິດຄໍາເຫັນໃສ່ຮ່າງບົດສະຫຼຸບດັ່ງກ່າວ, ພ້ອມດຽວກັນນັ້ນກອງປະຊຸມຍັງໄດ້ປຶກສາຫາລືບັນຫາທີ່ພົ້ນເດັ່ນເປັນຕົ້ນ: ເອກະພາບແຜນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 4 ສະພາປະຊາຊົນແຂວງອຸດົມໄຊ ຊຸດທີ II, ປຶກສາຫາລືຄົ້ນຄວ້າພະນັກງານນໍາພາຄຸ້ມຄອງ ໄປຝຶກອົບຮົມຫັດແອບວຽກງານປ້ອງກັນຊາດ-ປ້ອງກັນຄວາມສະຫງົບ ຊຸດທີ 1 ປະຈໍາປີ 2022, ປຶກສາຫາລືຄົ້ນຄວ້າບຸກຄະລາກອນສືບທອດປ່ຽນແທນຮອງເລຂາທິການ ທີ່ເຂົ້າຮັບບໍານານ ແລະ ປຶກສາຫາລືວຽກງານພົ້ນເດັ່ນອີກຈໍານວນໜຶ່ງ.

ຈຸດປະສົງຂອງກອງປະຊຸມຄັ້ງນີ້, ແມ່ນເພື່ອປະຕິບັດສິດ ແລະໜ້າທີຂອງຄະນະປະຈໍາສະພາປະຊາຊົນແຂວງ ຕາມກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ປະຕິບັດຕາມແຜນຂອງສະພາປະຊາຊົນແຂວງ, ເພື່ອເຮັດໃຫ້ການກະກຽມເນື້ອໃນ ແລະ ດໍາເນີນກອງປະຊຸມສະໄໝສາມັນເທື່ອທີ 4 ສະພາປະຊາຊົນແຂວງອຸດົມໄຊ ຊຸດທີ II ມີຜົນສໍາເລັດຕາມລະດັບຄາດໝາຍ.

(ພາບ/ຂ່າວ: ແສງພອນ ອິນນະລົງ).