ຕອນບ່າຍຂອງວັນທີ 7 ມິຖຸນາ 2023 ຜ່ານມານີ້, ຢູ່ທີ່ຫ້ອງປະຊຸມສະພາປະຊາຊົນແຂວງສາລະວັນ ຈັດກອງປະຊຸມ ຄົ້ນຄວ້າປຶກສາຫາລື ແກ້ໄຂຄຳສະເໜີຂອງສັງຄົມ ຕິດພັນກັບການຕິດຕາມ-ກວດກາ ແລະ ບັນຫາທີ່ພົ້ນເດັ່ນການນໍາເຂົ້າຜະລິດຕະພັນເບຍ; ໂດຍການເປັນປະທານກອງປະຊຸມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 14, ປະທານສະພາປະຊາຊົນແຂວງສາລະວັນ; ເຂົ້າຮ່ວມມີຮອງປະທານສະພາປະຊາຊົນແຂວງ, ບັນດາທ່ານຄະນະປະຈໍາ, ຄະນະກຳມະການ, ມີຕາງໜ້າຈາກພະແນກການພະແນກອຸດສາຫະກຳ ແລະ ການຄ້າແຂວງ, ພະແນກການເງິນແຂວງ, ຮອງຫົວໜ້າຄະນະຄຸ້ມຄອງດ່ານສາກົນລະໄລ, ຫົວໜ້າພາສີປະຈໍາດ່ານສາກົນລະໄລ ແລະ ທ່ານຫົວໜ້າຜູ້ອຳນວຍການຝ່າຍຂາຍ ຈາກບໍລິສັດ ເບຍລາວ ຈຳກັດ ພ້ອມດ້ວຍຄະນະ ເຂົ້າຮ່ວມໃນຄັ້ງນີ້.

ໃນວາລະຂອງກອງປະຊຸມ ທ່ານ ດຳຫມີ ສິງດວງຈັນ ຜູ້ອຳນວຍການຝ່າຍຂາຍ ປະຈຳ 4 ແຂວງພາກໃຕ້ ບໍລິສັດ ເບຍລາວ ຈຳກັດ ໄດ້ສະເໜີໃຫ້ພາກສ່ວນທີ່ກ່ຽວຂ້ອງ ລົງກວດກາສິນຄ້າ ປະເພດເຄື່ອງດື່ມເອວກາຮໍ ທີ່ມີການລັກລອບນຳເຂົ້າມາຈຳໜ່າຍພາຍໃນແຂວງໂດຍບໍ່ຖືກຕ້ອງຕາມກົດໝາຍ ເປັນຕົ້ນປະເພດເບຍໄຊງ່ອນ ແລະ ເບຍປະເພດອື່ນໆ ເຮັດໃຫ້ສົ່ງຜົນກະທົບຕໍ່ຜູ້ປະກອບການ ບໍລິສັດ ເບຍລາວ ຈຳກັດ ໂດຍສະເພາະດ້ານໂຄງສ້າງລາຄາ ແລະ ການຈັດຈຳໜ່າຍໃນທ້ອງຕະຫຼາດ; ການຄຸ້ມຄອງເກັບພາສີອາກອນນຳເຂົ້າຕາມໂກຕ້າທີ່ແຂວງອະນຸມັດຫຼືບໍ; ຫາວິທີລົງຕິດຕາມກວດກາຮ້ານຄ້າຂາຍຍົກ-ຂາຍຍ່ອຍ ຢູ່ພາຍໃນແຂວງ ກ່ອນຈະຈໍາໜ່າຍຜະລິດຕະພັນເບຍ ທີ່ນໍາເຂົ້າຈາກຕ່າງປະເທດຕ້ອງໄດ້ຮັບການອະນຸມັດ ແລະ ຢັ້ງຢືນຈາກຂະແໜງການທີ່ກ່ຽວຂ້ອງ ຈື່ງຈະສາມາດຈໍາໜ່າຍໄດ້; ຈາກນັ້ນ, ຜູ້ແທນທີ່ເຂົ້າຮ່ວມກອງປະຊຸມ ໄດ້ລາຍງານ ກ່ຽວກັບການຈັດຕັ້ງປະຕິບັດການຄຸ້ມຄອງການນຳເຂົ້າສິນຄ້າ ປະເພດເຄື່ອງດື່ມເອວກາຮໍ ທີ່ຜ່ານດ່ານສາກົນລະໄລ ຂອງແຂວງສາລະວັນ, ພ້ອມທັງປະກອບຄຳຄິດເຫັນແລກປ່ຽນບາງບັນຫາ ແນ່ໃສ່ເອກະພາບຮ່ວມກັນໃນການຈັດຕັ້ງປະຕິບັດວຽກງານການຄຸ້ມຄອງການນຳເຂົ້າສິນຄ້າ, ການເສຍພາສີອາກອນສິນຄ້າໃຫ້ຖືກຕ້ອງຕາມກົດໝາຍ, ພ້ອມທັງຊີ້ນຳໃຫ້ພາກສ່ວນທີ່ກ່ຽວຂ້ອງເປັນເຈົ້າການ ປະຕິບັດມາດຕະການຕາມກົດໝາຍຢ່າງເຂັ້ມງວດ, ເພື່ອເປັນການຊຸກຍູ້ ແລະ ສົ່ງເສີມຜະລິດຕະພັນພາຍໃນປະເທດ ເພື່ອສ້າງລາຍຮັບງົບປະມານໃຫ້ສູງຂຶ້ນ ແລະ ສູ້ຊົນໃຫ້ເກີນແຜນທີ່ກຳນົດໄວ້ຂອງລັດຖະບານວາງອອກ, ທັງເປັນການປະກອບສ່ວນເຂົ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ ໃຫ້ດີຂຶ້ນເປັນກ້າວໆ;

ພາບ-ຂ່າວ: ດີລຳພົນ ພົມມະຈັນ