​(ສພຊ) ພິທີປິດຊຸດເຝິກອົບຮົມພາສາຫວຽດນາມໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ໄດ້ຈັດຂຶ້ນໃນຕອນເຊົ້າວັນຈັນທີ​ 08 ເມສາຜ່ານມາ ໂດຍການເປັນປະທານຮ່ວມຂອງສະຫາຍ ຮສຈ. ປອ. ລິນຄຳ ດວງສະຫວັນ ເລຂາທິການສະພາແຫ່ງຊາດ ແລະ ສະຫາຍ ຫງວຽນ ບາ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ.ຫວຽດນາມ ປະຈຳ ສປປລາວ; ມີສະຫາຍ ນາງ ວັນດີ ບຸດທະສະວົງ ຮອງປະທານກຳມາທິການການຕ່າງປະ ເທດ ທັງເປັນຮອງຫົວໜ້າຄະນະຮັບຜິດຊອບຊຸດເຝິກອົບຮົມພາສາຫວຽດນາມ ຊຸດທີ II ໄລຍະ 2 ເດືອນ, ຄະນະຄູ-ອາຈານຈາກສະຖານທູດຫວຽດນາມ ພ້ອມດ້ວຍບັນດາສະຫາຍຄະນະກົມ, ຫົວໜ້າສູນ, ຫົວໜ້າຫ້ອງການ, ຄະນະພະແນກ ແລະ ນັກສຶກສາຊຸດເຝິກອົບຮົມດັ່ງກ່າວ ເຂົ້າຮ່ວມຢ່າງພ້ອມພຽງ.
​ໃນພິທີ, ໄດ້ຮັບຟັງການຜ່ານບົດສະຫຼຸບການຮຽນ-ການສອນພາສາຫວຽດນາມ ຊຸດທີ II ໄລຍະ 2 ເດືອນ, ຜ່ານຂໍ້ຕົກລົງຂອງຄະນະເລຂາທິການສະພາແຫ່ງຊາດ ວ່າດ້ວຍການເຫັນດີມອບໃບຂອບໃຈ ແລະ ຂໍ້ຕົກລົງວ່າດ້ວຍການເຫັນດີມອບໃບຢັ້ງຢືນ; ຈາກນັ້ນ, ໄດ້ມີພິທີມອບ-ຮັບໃບຢັ້ງຢືນການເຝິກອົບຮົມໃຫ້ແກ່ນັກສຶກສາ ຈຳນວນ 17 ສະຫາຍ ຍິງ 7 ສະຫາຍ ແລະ ມອບໃບຂອບໃຈໃຫ້ແກ່ຄູ-ອາຈານ ຈຳນວນ 3 ສະຫາຍ (ຍິງ).
​ ສະຫາຍ ຮສຈ. ປອ. ລິນຄຳ ດວງສະຫວັນ ໄດ້ມີຄຳເຫັນຕໍ່ພິທີໃນຄັ້ງນີ້ວ່າ: ຕະຫຼອດໄລຍະການເຝິກອົບຮົມ ແມ່ນສຸດທີ່ມີຄວາມໝາຍ ແລະ ຄວາມສຳຄັນຍິ່ງ ເຊິ່ງບໍ່ພຽງແຕ່ເປັນການຮຽນຮູ້ທາງດ້ານພາສາທີ່ເປັນພື້ນຖານເທົ່ານັ້ນ, ແຕ່ຍັງເປັນການເຝິກຝົນຫຼໍ່ຫຼອມໃນການສ້າງພະນັກງານ-ລັດຖະກອນ ໃຫ້ມີແນວຄິດບຸກບືນຫ້າວຫັນໃນການຄົ້ນຄ້ວາຮໍ່າຮຽນ, ການປະຕິບັດໜ້າທີ່ວຽກງານໃຫ້ມີຄຸນນະພາບ ທັງເປັນການເສີມສ້າງໃຫ້ມີການຫັນປ່ຽນຢ່າງຕັ້ງໜ້າ ທັງເປັນການປະກອບສ່ວນຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ເວົ້າລວມ, ເວົ້າສະເພາະ ລະຫວ່າງສອງສະພາແຫ່ງຊາດ ລາວ-ຫວຽດນາມ ໃຫ້ກ້າວສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ. ສະຫາຍເນັ້ນຕື່ມອີກວ່າ: ການເຝິກອົບຮົມພາສາຫວຽດນາມຂັ້ນພື້ນຖານຊຸດນີ້ ໄດ້ສິ້ນສຸດລົງພຽງຂັ້ນຕົ້ນ, ນັກເຝິກອົບຮົມຍັງຕ້ອງໄດ້ສືບຕໍ່ຄົ້ນຄວ້າທົບທວນຄືນເລື້ອຍໆ ເພື່ອກຳແໜ້ນຕື່ມບັນດາບົດຮຽນທີ່ຄູ-ອາຈານຖ່າຍທອດໃຫ້ ໂດຍສະເພາະແມ່ນການເຝິກຂຽນ, ອ່ານ, ຟັງ ແລະ ເວົ້າໃຫ້ມີຄວາມຄ່ອງແຄ້ວ ແລ້ວນຳໄປໝູນໃຊ້ເຂົ້າໃນວຽກງານຕົວຈິງຂອງຕົນໃຫ້ເກີດຜົນ.
ສະຫາຍເລຂາທິການສະພາແຫ່ງຊາດ ໄດ້ສະແດງຄວາມຂອບໃຈມາຍັງສະຫາຍເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ.ຫວຽດນາມ ປະຈຳ ສປປລາວ ແລະ ຄູ-ອາຈານ ທີ່ມາຈາກສະຖານທູດ ທີ່ຍາມໃດກໍເອື້ອອໍານວຍຄວາມສະດວກ ແລະ ໃຫ້ການຮ່ວມມືເປັນຢ່າງດີຕໍ່ສະພາແຫ່ງຊາດລາວ ໃນການຍົກລະດັບທາງດ້ານພາສາຫວຽດ ນາມຂັ້ນພື້ນຖານໃຫ້ແກ່ພະນັກງານ-ລັດຖະກອນ ຈົນສໍາເລັດ.
​ (ພາບ ແລະ ຂ່າວ: ນາງ ສຸພາວັນ ຫອມສະນິດ)