(ສພຊ) ວັນທີ 18 ກຸມພາ 2022 ສະຫະພັນກໍາມະບານສະພາແຫ່ງຊາດ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງສະຫະພັນກໍາມະບານລາວ ຄົບຮອບ 66 ປີ (1 ກຸມພາ 1956-1 ກຸມພາ 2022) ທີ່ສະພາແຫ່ງຊາດ ໂດຍການເປັນປະທານຂອງສະຫາຍ ອຳໄພ ຈິດມານົນ ຮອງປະທານກໍາມາທິການກົດໝາຍ ທັງເປັນປະທານຄະນະບໍລິຫານງານສະຫະພັນກຳມະບານສະພາແຫ່ງຊາດ; ເຂົ້າຮ່ວມມີສະຫາຍ ທັນຕາ ກອງຜາລີ ກໍາມະການຄະນະພັກສະພາແຫ່ງຊາດ, ຮອງປະທານກໍາມາທິການແຜນການ, ການເງິນ ແລະ ການກວດສອບ, ສະຫາຍ ວິໄລ ວົງຂະເສີມ ຮອງປະທານຄະນະບໍລິຫານງານສູນກາງສະຫະພັນກໍາມະບານລາວ, ບັນດາຮອງປະທານກໍາມາທິການ, ຄະນະເລຂາທິການສະພາແຫ່ງຊາດ, ອົງການ ຈັດຕັ້ງຊາວໜຸ່ມ, ແມ່ຍິງ ແລະກຳມະບານຮາກຖານ ພ້ອມດ້ວຍສະມາຊິກກຳມະການພາຍໃນສະພາແຫ່ງຊາດ.

ການປາຖະກະຖາໃນຄັ້ງນີ້ ແມ່ນເພື່ອເລົ່າຄືນມູນເຊື້ອວັນສ້າງຕັ້ງສະຫະພັນກໍາມະບານລາວ ຄົບຮອບ 66 ປີ ແນໃສ່ປຸກລະດົມ ແລະ ສ້າງຈິດສຳນຶກໃຫ້ແກ່ສະມາຊິກໍາມະບານພາຍໃນສະພາແຫ່ງຊາດ ເຫັນໄດ້ມູນເຊື້ອທາດແທ້ອັນອົງອາດກ້າຫານຂອງສະມາຊິກກຳມະບານ, ກໍາມະກອນ ແລະ ຊາວຜູ້ອອກແຮງງານໃນຮຸ່ນກ່ອນຈົນເຖິງປະຈຸບັນ ທີ່ໄດ້ຕັ້ງໜ້າປະກອບສ່ວນເຂົ້າໃນການເຄື່ອນໄຫວວຽກງານກໍາມະບານ ແລະ ເປັນການປຸກລະດົມສ້າງຂະບວນການໃນການ ຈັດຕັ້ງປະຕິບັດໜ້າທີ່ວິຊາສະເພາະ, ມີລະບຽບວິໄນ ໃນການອອກແຮງງານ ແລະ ການປະຕິບັດຂໍ້ແຂ່ງຂັນ 5 ເປັນເຈົ້າ ໂດຍຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ”.

ໃນພິທີ, ສະຫາຍ ວິໄລ ວົງຂະເສີມ ໄດ້ເລົ່າມູນເຊື້ອວັນສ້າງຕັ້ງກໍາມະບານລາວ ເຊິ່ງໄດ້ຍົກໃຫ້ເຫັນເຖິງປະຫວັດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງກຳມະບານລາວ; ພ້ອມນັ້ນ, ກໍໃຫ້ຮູ້ເຖິງຜົນງານທີ່ພົ້ນເດັ່ນ, ຂໍ້ຄົງຄ້າງ ແລະ ບົດຮຽນທີ່ຖອນຖອດໄດ້ໃນໄລຍະ 66 ປີຜ່ານມາ; ສະຫາຍຍັງໄດ້ເນັ້ນໜັກບາງບັນຫາທີ່ສະຫະພັນກໍາມະບານທົ່ວປະເທດຕ້ອງເອົາໃຈໃສ່ ເປັນຕົ້ນເອົາໃຈໃສ່ປັບປຸງການຈັດຕັ້ງສະຫະພັນກໍາມະບານຂັ້ນຂອງຕົນໃຫ້ມີຄວາມເຂັ້ມແຂງ, ເສີມຂະຫຍາຍຫົວຄິດປະດິດສ້າງໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ແລະ ຕັ້ງໜ້າຫັນລົງຮາກຖານເພື່ອປັບປຸງການຈັດຕັ້ງກໍາມະບານໃຫ້ໜັກແໜ້ນເຂັ້ມແຂງໂດຍຕິດພັນກັບ 4 ເນື້ອໃນ 4 ຄາດໝາຍທີ່ພັກໄດ້ກຳນົດໄວ້.

(ພາບ ແລະ ຂ່າວ: ສົມນຶກ ແກ້ວໄຊຍະຈັກ)