ສະພາປະຊາຊົນແຂວງ ອັດຕະປື ໄດ້ຈັດພິທີປາຖະກະຖາວັນລັດຖະທຳມະນູນ ແຫ່ງ ສປປ ລາວ ຄົບຮອບ 32 ປີ (15 ສິງຫາ 1991-15 ສິງຫາ 2023) ແລະ ວັນສ້າງຕັ້ງສະພາປະຊາຊົນຂັ້ນແຂວງ ຄົບຮອບ 45 ປີ (04 ສິງຫາ 1978-04 ສິງຫາ 2023). ທີ່ຫໍປະຊຸມໃຫ່ຍຂອງແຂວງ. ໂດຍການປາຖະກະຖາຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານສະພາປະຊາຊົນແຂວງ. ມີບັນດາທ່ານຄະນະພັກຈໍາພັກແຂວງ, ກໍາມະການພັກແຂວງ, ເຈົ້າເມືອງ 5 ເມືອງ, ກອງບັນຊາການ ປກຊ-ປກສ, ພະແນກການອອກຂ້າງແຂວງ, ອົງການລັດທຽບເທົ່າ,ອາດີດການນໍາພັກ-ລັດ, ລັດວິສາຫະກິດ ແລະ ທະນາຄານ ເຂົ້າຮ່ວມຮັບຟັງທັງໝົດ 400 ກວ່າທ່ານ.

ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ,  ປະທານສະພາປະຊາຊົນແຂວງ ອັດຕະປື ໄດ້ຍົກໃຫ້ເຫັນວ່າ: ພາຍຫຼັງສະຖາປະນາ ສປປ ລາວ ໃນປີ 1975, ພັກປະຊາຊົນ ປະຕິວັດລາວ ໄດ້ຊີ້ນໍາ – ນໍາພາ ແລະ ຈັດຕັ້ງປະຕິບັດ 2 ໜ້າທີ່ຍຸດທະສາດຂອງພັກ ແລະ ໃນ ວັນທີ 15 ສິງຫາ 1991 ສປປ ລາວ ຈຶ່ງໄດ້ມີລັດຖະທໍາມະນູນ ສະບັບທຳອິດ ຊຶ່ງມີຄວາມສຳຄັນຫຼາຍ ຕໍ່ປະເທດຊາດ, ປະຊາຊົນ, ພັກ ແລະ ລັດຖະບານເຮົາ ເປັນການຈັດຕັ້ງ, ການເຄື່ອນໄຫວຕະຫຼອດຮອດກົດໝາຍຕ່າງໆ ທີ່ທາງສະພາແຫ່ງຊາດ ໄດ້ຮັບຮອງເອົາໃນນີ້ ກໍ່ມີລັດຖະບັນຍັດ, ດຳລັດຂອງນາຍົກລັດຖະມົນຕີ, ຂອງລັດຖະບານ, ຄຳສັ່ງ, ຄໍາແນະນຳ, ຂໍ້ຕົກລົງຂອງຂະແໜງການ ແລະ ທ້ອງຖິ່ນ ໂດຍອີງໃສ່ລັດຖະທໍາມະນູນໃນການຄຸ້ມ ຄອງສັງຄົມ ບໍ່ວ່າລັດຖະທຳມະນູນ ຫຼື ກົດໝາຍ ທີ່ເປັນລູກຂອງລັດຖະທຳມະນູນ ລ້ວນແຕ່ໄດ້ສະແດງເຖິງເຈດຈຳນົງຂອງປະຊາຊົນລາວບັນດາເຜົ່າ ແລະ ການປະຕິບັດລັດຖະທຳມະນູນກໍ່ຄືກັນກັບປະຕິບັດກົດໝາຍ ເປັນການປະຕິບັດຈິດໃຈຂອງປະຊາຊົນລາວ ໂດຍມີສະພາແຫ່ງຊາດ ແລະ ສະພາປະຊາຊົນຂັ້ນແຂວງເປັນຜູ້ຕາງໜ້າໂດຍກົງ. ວັນລັດຖະທໍາມະນູນແຫ່ງຊາດ ແມ່ນເຫດການປະຫວັດສາດ ທີ່ມີຄວາມໝາຍສໍາຄັນຍິ່ງ, ເປັນການຢັ້ງຢືນຜົນງານອັນຍິ່ງໃຫຍ່ ໃນພາລະກິດຕໍ່ ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ, ເປັນການຢືນຢັນເຖິງເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຕໍ່ສາກົນ, ທັງເປັນຂີດໝາຍໃນການຫັນແນວທາງປ່ຽນແປງໃໝ່ອັນມີຫລັກການຂອງພັກ ເປັນກົດໝາຍພື້ນຖານຂອງລັດເຮົາ ແລະ ຫັນໄປສູ່ການຄຸ້ມຄອງລັດ-ຄຸ້ມຄອງ ສັງຄົມດ້ວຍກົດໝາຍ, ສືບຕໍ່ສ້າງ ແລະ ປັບປຸງ ລະບອບປະຊາທິປະໄຕປະຊາຊົນ ຕາມທິດກ້າວຂຶ້ນສັງຄົມນິຍົມບົນພື້ນຖານ ລັດຖະທໍາມະນູນ ແລະ ກົດໝາຍ. ພາຍຫລັງປະເທດຊາດ ໄດ້ຮັບການປົດປ່ອຍມານີ້, ປະຊາຊົນລາວບັນດາເຜົ່າ ໄດ້ພ້ອມກັນປະຕິ ບັດສອງໜ້າທີ່ຍຸດທະສາດ, ດຳເນີນພາລະກິດປ່ຽນແປງໃໝ່ ເພື່ອຂຸດຄົ້ນ ແລະ ເສີມຂະຫຍາຍກໍາລັງແຮງ ສັງລວມຂອງຊາດ ເຂົ້າໃນການສ້າງ ແລະ ບູລະນະລະບອບປະຊາທິປະໄຕປະຊາຊົນ, ສ້າງປະຖົມປັດໄຈກ້າວຂຶ້ນສູ່ລະ ບອບສັງຄົມນິຍົມ ແລະ ມາ ເຊິ່ງໃນໄລຍະໃໝ່ນີ້ ຊີວິດຂອງສັງຄົມໄດ້ຮຽກຮ້ອງໃຫ້ລັດເຮົາຕ້ອງມີລັດຖະທໍາມະນູນ.

ຈາກນັ້ນ ທ່ານ ນາງ ມີນາພອນ ໄຊສົມພູ ຍັງໄດ້ກ່າວໃຫ້ເຫັນເຖິງວັນສ້າງຕັ້ງສະພາປະຊາຊົນຂັ້ນແຂວງ ຄົບຮອບ 45 ປີ (4 ສິງຫາ 1977-4 ສິງຫາ 2023) ໃນຕະຫຼອດໄລຍະຜ່ານມາຈົນເຖິງປັດຈຸບັນ ກໍ່ມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ຜ່ານຂະບວນການເລືອກຕັ້ງ ບົນພື້ນຖານປະຊາທິປະໄຕ ແລະ ປັບປຸງຊື່ເອີ້ນຈາກສະພາປະຊາຊົນສູງສຸດ ຊຸດທີ I 1975 ມາເປັນ ສະພາແຫ່ງຊາດ ຊຸດທີ III 1992 ແລະ ຈັດຕັ້ງປະກາດໃຫ້ມີສະພາຂັ້ນທ້ອງຖິ່ນ ຄື ສະພາປະຊາຊົນຂັ້ນແຂວງ ຊຸດທີ I ໃນປີ 2016 ເປັນຊຸດທີ່ບຸກເບີກໃຫມ່ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນຢ່າງແທ້ຈິງ, ໄດ້ເຄື່ອນໄຫວວຽກງານຕາມ 3 ພາລະບົດບາດສິດ ແລະ ໜ້າທີ່ ທີ່ກຳນົດໄວ້ໃນກົດໝາຍວ່າດ້ວຍສະພາປະຊາຊົນຂັ້ນແຂວງ ບໍ່ວ່າຈະເປັນໃນດ້ານນິຕິກຳ, ດ້ານການຕິດຕາມ-ກວດກາ ແລະ ການຕົກລົງບັນຫາສຳຄັນພື້ນຖານຂອງທ້ອງຖິ່ນ ພ້ອມທັງເຄື່ອນໄຫວພົບປະຢ້ຽມຢາມຖາມຂ່າວຜູ້ມີສິດເລືອກຕັ້ງຂອງຕົນ; ມາເຖິງປັດຈຸບັນ ສະພາປະຊາຊົນຂັ້ນແຂວງ ອັດຕະປື ກໍ່ໄດ້ສືບຕໍ່ພາລະກິດເຄື່ອນໄຫວວຽກງານຕ່າງໆມີຜົນສຳເລັດຕະຫຼອດມາ, ແກ້ໄຂຄຳຮ້ອງຂໍຄວາມເປັນທຳ ແລະ ຄຳສະເໜີຂອງປະຊາຊົນທີ່ຢື່ນເຖິງສະພາປະຊາຊົນຂັ້ນແຂວງ ເພື່ອສະເໜີ ແລະ ປະສານສົມທົບໃຫ້ພາກສ່ວນຂັ້ນຕ່າງໆຊ່ວຍຫາທາງແກ້ໄຂ ເເລະ ເຮັດສໍາເລັດສອງໜ້າທີ່ຍຸດທະສາດການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນກ້າວໜ້າ; ເຊີນຊວນພໍ່ແມ່ປະຊາຊົນຜູ້ມີສິດເລືອກຕັ້ງຈົ່ງເຊີດຊູ ແລະ ຍົກສູງສະຕິເປັນເຈົ້າຕົນເອງໃຫ້ດີຂຶ້ນເທື່ອລະກ້າວ.

ທັງນີ້, ກໍເພື່ອໃຫ້ອົງການຈັດຕັ້ງພັກ-ລັດ, ພະນັກງານນໍາພາຫລັກແຫລ່ງ, ທະຫານ-ຕໍາຫຼວດ ແລະ  ພະນັກງານ-ລັດຖະກອນ ໄດ້ຮັບຮູ້ເຊື່ອມຊຶມກຳແໜ້ນ ຢ່າງເລິກເຊິ່ງ ກ່ຽວກັບການເພີ່ມທະວີການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໃຫ້ມີຄວາມສັກສິດ, ເຊີດຊູນໍ້າໃຈຮັກຊາດ, ຮັກບ້ານເກີດເມືອງນອນ, ຍົກສູງສະຕິເຄົາລົບກົດໝາຍ, ເພີ່ມທະວີຄວາມສາມັກຄີປະຊາຊົນບັນດາເຜົ່າ ເພື່ອພ້ອມກັນພັດທະນາປະເທດຊາດໃຫ້ຫລຸດພົ້ນອອກຈາກຄວາມທຸກຍາກ ແລະ ກ້າວຂຶ້ນສູ່ຈຸດໝາຍສັງຄົມນິຄົມ ຕາມແນວທາງນະໂຍບາຍຂອງພັກ-ລັດຖະບານໄດ້ວາງໄວ້.

(ວິນັດ)