ຕອນເຊົ້າຂອງວັນຈັນ, ວັນທີ 5 ກັນຍາ 2023, ຢູ່ທີ່ຫ້ອງປະຊຸມພະແນກຍຸຕິທໍາແຂວງ ກໍາມະບານຮາກຖານສະພາປະຊາຊົນແຂວງ ແລະ ກໍາມະບານຮາກຖານພະແນກຍຸຕິທໍາແຂວງ, ໄດ້ຈັດພິທີປາຖະກະຖາ ເລົ່າມູນເຊື້ອວັນສ້າງຕັ້ງ ສະຫະພັນກໍາມະບານແຂວງອຸດົມໄຊ ຄົບຮອບ 44 ປີ(11 ກັນຍາ 1979-11 ກັນຍາ 2023), ໂດຍການເປັນປະທານຂອງສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກຳມະບານແຂວງ, ຮອງປະທານສະພາປະຊາຊົນແຂວງ, ມີສະຫາຍ ລຽງ ພິມຍົງຄໍາ ປະທານກໍາມະບານຮາກຖານພະແນກຍຸຕິທໍາແຂວງ, ມີຄະນະກຳມະບານ ແລະ ສະມາຊິກກໍາມະບານພາຍໃນຮາກຖານສະພາປະຊາຊົນແຂວງ ແລະ ກໍາມະບານຮາກຖານພະແນກຍຸຕິທໍາແຂວງ ເຂົ້າຮ່ວມຢ່າງພ້ອມພຽງ.
ຈຸດປະສົງ, ກໍເພື່ອເປັນການທົບທວນຄືນປະຫວັດການເຄື່ອນໄຫວຂອງສະຫະພັນກຳມະບານແຂວງອຸດົມໄຊ ເລີ່ມແຕ່ວັນທີ 11 ກັນຍາ 1979 ມາຮອດປະຈຸບັນນີ້ເປັນໄລຍະເວລາຄົບຮອບ 44 ປີ, ໂດຍພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ການຊີ້ນຳຢ່າງໃກ້ຊິດຂອງສູນກາງສະຫະພັນກໍາມະບານລາວເວົ້າລວມ, ເວົ້າສະເພາະກໍແມ່ນຄະນະພັກແຂວງອຸດົມໄຊໃນແຕ່ລະສະໄໝ, ໄດ້ນໍາພາສະຫະພັນກຳມະບານແຂວງຈັດຕັ້ງປະຕິບັດແນວທາງປ່ຽນແປງໃໝ່ທີ່ມີຫຼັກການຂອງພັກ, ໂດຍສະເພາະບັນດາຄາດໝາຍທີ່ກອງປະຊຸມໃຫຍ່ຂອງແຂວງວາງອອກ, ເຖິງແມ່ນວ່າຈະມີຄວາມຫຍຸ້ງຍາກ, ສິ່ງທ້າທາຍທົດສອບຫຼາຍປະການກໍຕາມ, ແຕ່ສະຫະພັນກຳມະບານແຂວງອຸດົມໄຊກໍ່ມີຄວາມຕັດສິນໃຈສູງເສຍສະຫຼະທຸກຢ່າງເພື່ອຜົນປະໂຫຍດອັນລວມຂອງຊາດ.
ສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກຳມະບານແຂວງ, ຮອງປະທານສະພາປະຊາຊົນແຂວງ, ໄດ້ປາຖະກະຖາເລົ່າມູນເຊື້ອວັນສ້າງຕັ້ງສະຫະພັນກໍາມະບານແຂວງອຸດົມໄຊ ຄົບຮອບ 44 ປີວ່າ: ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນໃນທົ່ວປະເທດ ແລະ ສະຖາປະນາເປັນປະເທດສາທາລະນະລັດປະຊາທິປະໄຕປະຊາຊົນລາວ ໃນວັນທີ 2 ທັນວາ 1975 ຊົນຊັ້ນກໍາມະກອນ ແລະ ຊາວຜູ້ອອກແຮງງານບັນດາເຜົ່າທົ່ວປະເທດເວົ້າລວມ, ເວົ້າສະເພາະແມ່ນຊາວແຂວງອຸດົມໄຊກໍໄດ້ກາຍເປັນເຈົ້າຂອງປະເທດຊາດ ແລະ ໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໃນເວລານັ້ນບັນດາໜໍ່ແໜງຂອງຂະແໜງອຸດສາຫະກຳ-ຫັດຖະກຳກໍ່ຄ່ອຍໆກໍາເນີດເກີດຂຶ້ນເປັນຕົ້ນແມ່ນໂຮງງານຕໍ່າແຜ່ນ, ໂຮງເລື່ອຍໄມ້, ໂຮງງານສ້ອມແປງລົດ, ໂຮງຮຽນວິຊາຊີບ, ໂຮງໝໍ, ບໍລິສັດກໍ່ສ້າງຂົວທາງ, ບໍລິສັດຂົນສົ່ງ, ສຳນັກງານອົງການຕ່າງໆກໍໄດ້ກຳເນີດຂຶ້ນຫຼາຍແຫ່ງ, ຊຶ່ງຈໍານວນພະນັກງານ-ລັດຖະກອນ, ກຳມະກອນກໍໄດ້ເຕີບໃຫຍ່ຂະຫຍາຍຕົວຂຶ້ນເປັນກ້າວໆ ເພື່ອສ້າງໃຫ້ມີຕົວແທນໃນການໂຄສະນາສຶກສາອົບຮົມດ້ານການເມືອງ-ແນວຄິດ ແລະ ເຄື່ອນໄຫວປົກປ້ອງສິດຜົນປະໂຫຍດອັນຊອບທຳຂອງເຂົ້າເຈົ້ານັ້ນວັນທີ 11 ກັນຍາ 1979 ຈຶ່ງໄດ້ສ້າງຕັ້ງສະຫະພັນ ກໍາມະບານແຂວງອຸດົມໄຊ ຂຶ້ນຢ່າງເປັນທາງການ.
ໂອກາດດັ່ງກ່າວ, ສະຫາຍໄດ້ມີຄໍາເຫັນເນັ້ນໜັກໃຫ້ສະມາຊິກກໍາມະບານພາຍໃນຮາກຖານສະພາປະຊາຊົນແຂວງ ແລະ ກໍາມະບານຮາກຖານພະແນກຍຸຕິທໍາແຂວງ ສືບຕໍ່ສຶກສາອົບຮົມການເມືອງ-ແນວຄິດ, ເຊື່ອມຊຶມແນວທາງນະໂຍບາຍຂອງພັກ, ກົດໝາຍ, ມະຕິ, ຄໍາສັ່ງ, ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ, ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານວິຊາສະເພາະທີ່ຕົນຮັບຜິດຊອບໃຫ້ດີຂຶ້ນກວ່າເກົ່າ, ເປັນເຈົ້າການໃນການຈັດຕັ້ງປະຕິບັດກົດໝາຍ ແລະ ລະບຽບການຕ່າງໆ.
ພາບ/ຂ່າວ: ສະພາປະຊາຊົນແຂວງ.