(ສພຊ) ເນື່ອງໃນໂອກາດຢ້ຽມຢາມ ແລະ ເຮັດວຽກຢູ່ ສປປລາວ ຂອງຄະນະຜູ້ແທນສະພາແຫ່ງຊາດ ສ.ຮົງກາລີ ໃນລະຫວ່າງວັນທີ 20-23 ມັງກອນ 2019, ຕອນເຊົ້າວັນອັງຄານ 22 ມັງກອນ 2019 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ທ່ານ ອິສທວານ ຈໍກອບ (Istvan Jakab) ຮອງປະທານສະພາແຫ່ງຊາດ ແຫ່ງ ສ.ຮົງກາລີ ໄດ້ປາຖະກະຖາໃນຫົວຂໍ້ “ນະໂຍບາຍທີ່ດິນ ແລະ ນະໂຍບາຍການສົ່ງເສີມວິສາຫະກິດຂະໜາດນ້ອຍ ແລະ ກາງ ໃນຂົງເຂດກະສິກໍາ, ເຂົ້າຮ່ວມມີທ່ານ ບຸນປອນ ບຸດຕະນະວົງ ກໍາມະການສູນກາງພັກ ຮອງປະທານສະພາແຫ່ງຊາດ, ມີບັນດາການນຳຂອງສະພາແຫ່ງຊາດ, ບັນດາທ່ານຜູ້ແທນຂັ້ນສູງ ຈາກ ສະພາແຫ່ງຊາດ ສາທາລະນະລັດ ຮົງກາລີ, ບັນດາທ່ານລັດຖະມົນຕີ, ຮອງລັດຖະມົນຕີ ຈາກບັນດາກະຊວງກ່ຽວຂ້ອງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫລວງວຽງຈັນ, ຫົວໜ້າກົມ, ຮອງຫົວໜ້າກົມ, ນັກທຸລະກິດ, ຕະຫລອດຮອດພະນັກງານວິຊາການທົ່ວສະພາແຫ່ງຊາດ ລວມ 140 ກວ່າທ່ານ.
ກອງປະຊຸມປາຖະກະຖາຄັ້ງນີ້ ໄດ້ຈັດຂຶ້ນ ພາຍໃຕ້ການຊີ້ນຳໂດຍກົງ ຂອງ ຄະນະປະຈຳສະພາແຫ່ງຊາດ ຊຶ່ງມີຈຸດປະສົງຕົ້ນຕໍ ແມ່ນ ເພື່ອຮັບຟັງ ການສະເໜີບົດຮຽນ ແລະ ປະສົບການຈັດຕັ້ງປະຕິບັດຕົວຈິງ ກ່ຽວກັບ ນະໂຍບາຍທີ່ດິນ ແລະ ນະໂຍບາຍການສົ່ງເສີມວິສາຫະກິດຂະໜາດນ້ອຍ ແລະ ກາງ ໃນຂົງເຂດກະສິກຳ ຂອງ ສາທາລະນະລັດ ຮົງກາລີ, ທັງນີ້ ກໍເພື່ອໃຫ້ບັນດາທ່ານຜູ້ແທນເຂົ້າຮວ່ມກອງປະຊຸມ ໄດ້ຮັບຮູ້, ເຂົ້າໃຈຢ່າງເລິກເຊິ່ງ, ສາມາດນຳໃຊ້ເປັນບ່ອນອີງ ແລະ ເປັນຂໍ້ມູນພື້ນຖານສຳຄັນ ເຂົ້າໃນການປະກອບຄຳຄິດຄຳເຫັນໃສ່ ການປັບປຸງຮ່າງກົດໝາຍ, ນະໂຍບາຍ ແລະ ນິຕິກຳ ຂອງ ສປປ ລາວ ກ່ຽວກັບ ວຽກງານທີ່ດິນ ແລະ ວຽກງານສົ່ງເສີມ ວິສາຫະກິດຂະໜາດນ້ອຍແລະກາງ (SME) ເພື່ອຮັບປະກັນໃຫ້ ນິຕິກຳດັ່ງກ່າວ ມີເນື້ອໃນຄົບຖ້ວນ ແລະ ຮັດກຸມ ສອດຄ່ອງກັບສະພາບຄວາມເປັນຈິງ ຂອງ ປະເທດເຮົາ ແລະ ສາມາດນຳໄປຈັດຕັ້ງປະຕິບັດ ໃຫ້ປະກົດຜົນເປັນຈິງ.
ໃນການປາຖະກະຖາຂອງທ່ານ ອິສທວານ ຈໍກອບ ມີບາງຕອນວ່າ: ໃນປະເທດຮົງກາລີ, ບັນດາບໍລິສັດ ແລະ ນິຕິບຸກຄົນ ບໍ່ສາມາດຊື້ທີ່ດິນເປັນກໍາມະສິດໄດ້, ດິນກະສິກໍາບໍ່ສາມາດຂາຍໄດ້, ນອກຈາກໃນທ້ອງຖິ່ນ. ໄດ້ມີຂະບວນການຈົດທະບຽນທີ່ດິນ ໃນກອງທຶນການຄຸ້ມຄອງທີ່ດິນ ເຊິ່ງມີການປະກອບເອກະສານຕ່າງໆ ທີ່ສາມາດຄຸ້ມຄອງທີ່ດິນ. ຢ່າງໜ້ອຍຊາວກະສິກອນຕ້ອງໄດ້ນໍາໃຊ້ທີ່ດິນເຂົ້າໃນການຜະລິດກະສິກໍາປູກຝັງ ຫລື ລ້ຽງສັດ ແລະ ເສຍອາກອນຢ່າງໜ້ອຍ 3 ປີ ຈຶ່ງສາມາດຊື້ທີ່ດິນໄດ້ ເຊິ່ງການຊື້ດິນຕ້ອງຜ່ານທະນາຍຄວາມ ຫລື ຂະບວນການຂອງກົດໝາຍ. ການຊື້-ຂາຍທີ່ດິນຢູ່ປະເທດຮົງກາລີ, ບັນດາກະຊິກອນແບບອິນຊີ ຈະໄດ້ບຸລິມະສິດ ເພາະວ່າເຂົາເຈົ້າໄດ້ເຂົ້າຮ່ວມໃນການຜະລິດອາຫານທີ່ປອດໄພ ເຊິ່ງໄດ້ມີການຄຸ້ມຄອງ ຕິດຕາມ ກ່ຽວກັບການນໍຳໃຊ້ຜະລິດຕະພັນອິນຊີ ຢ່າງຈິງຈັງ. ພວກເຮົາສ້າງກົດໝາຍເພື່ອປົກປ້ອງທີ່ດິນ ເພື່ອສະຫງວນໄວ້ໃຫ້ແກ່ວຽກງານກະສິກໍາ. ປະເທດຮົງກາລີ ໃນນາມສະມາຊິກສະຫະພາບເອລົບ ໄດ້ມີການສົ່ງອອກດ້ານຜະລິດຕະພັນສະບຽງອາຫານ ມູນຄ່າ 9 ຕື້ ແລະ ນໍາເຂົ້າ 5 ຕື້ໂລດາສະຫະລັດ ຕໍ່ປີ.
ສໍາລັບນະໂຍບາຍສົ່ງເສີມວິສາຫະກິດຂະໜາດນ້ອຍ ແລະ ກາງ ໃນ ສ.ຮົງກາລີ, ທ່ານຮອງປະທານ ສະພາແຫ່ງຊາດ ແຫ່ງ ສ.ຮົງກາລີ ໄດ້ແຈ້ງໃຫ້ຊາບວ່າ: ເນື່ອງຈາກ ສ.ຮົງກາລີ ເປັນສະມາຊິກ ສະຫະພາບເອລົບ, ສະນັ້ນ ການກໍຳນົດປະເພດວິສະຫະກິດຂະໜາດນ້ອຍ ແລະ ກາງ ຂອງຮົງກາລີ ແມ່ນອີງໃສ່ລະບຽບກົດໝາຍຂອງ ສະຫະພາບເອລົບ; 99% ຂອງທຸລະກິດທັງໝົດແມ່ນຢູ່ໃນວິສາຫະກິດຂະໜາດນ້ອຍ ແລະ ກາງ, ເຊິ່ງສ່ວນໃຫຍ່ແມ່ນເປັນ ຈຸລະວິສາຫະກິດ ໃນຂະແໜງກະສິກໍາ, ການຄົ້ນຄວ້າ, ການສຶກສາ ແລະ ອື່ນໆ ເຊິ່ງມີລາຍຮັບ 33% ຂອງລາຍຮັບທັງໝົດຂອງປະເທດ; ທະນາຄານ ໄດ້ມີໂຄງການພິເສດໃນການສົ່ງເສີມ ວິສາຫະກິດຂະໜາດນ້ອຍ ແລະ ກາງ ເຊິ່ງຜູ້ປະກອບການສາມາດກູ້ຢືມເງິນໄດ້ໃນອັດຕາດອກເບ້ຍບໍ່ເກີນ 2% ໃນການເຮັດທຸລະກິດຂອງເຂົາເຈົ້າ; 98% ຂອງດິນກະສິກໍາແມ່ນຢູ່ໃນວິສາຫະກິດຂະໜາດນ້ອຍ ແລະ ກາງ, 68% ແມ່ນປະຊາຊົນທີ່ເຮັດວຽກກະສິກໍາ.
ບັນດາສະມາຊິກສະພາແຫ່ງຊາດ ກໍຄືຜູ້ເຂົ້າຮ່ວມກອງປະຊຸມສ່ວນໃຫຍ່ ໄດ້ມີຄວາມສົນໃຈ ແລະ ໄດ້ມີຄໍາຖາມເຈາະຈີ້ມ ກ່ຽວກັບການບໍ່ມີສິດ ໃນການຊື້ທີ່ດິນຂອງນິຕິບຸກຄົນ ແລະ ບໍລິສັດ, ການມີສິດຊື້ທີ່ດິນ ຂອງປະຊາຊົນ ຈາກບັນດາປະເທດສະມາຊິກສະຫະພາບເອລົບ ແລະ ການສະຫງວນທີ່ດິນໄວ້ ໃຫ້ແກ່ວຽກງານກະສິກໍາ, ການສົ່ງເສີມການຜະລິດກະສິກໍາອິນຊີ, ການບໍ່ຍອມຮັບເອົາຜະລິດຕະພັນພັນທຸກໍາ ແລະ ບັນຫາອື່ນໆ.
(ບຸນເກີດ ວົງໄຊຍາ)