ເພື່ອເປັນການເສີມຂະຫຍາຍທາດແທ້ມູນເຊື້ອ ອັ່ນສະຫງ່າລາສີ ແລະ ວິລະກໍາອັນລໍາເລີດຂອງພັກ ແນ່ໃສສຶກສາອົບຮົມການເມືອງນໍາພາ-ແນວຄິດ ໃຫ້ພະນັກງານ, ສະມາຊິກພັກ ເຝິກຝົນຫຼໍ່ຫຼອມຕົນເອງ ຫັນເອົາມູນເຊື້ອການນໍາພາຂອງພັກ ເຂົ້າໃນວຽກງານຕົວຈິງ ປັບປຸງໃຫ້ມີແນວຄິດ ແລະ ແບບແຜນດໍາລົງຊີວິດທີ່ດີ;
ໃນວັນທີ 9 ທັນວາ 2024 ນີ້, ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດພິທີປາຖະກະຖາ ວັນຊາດທີ 2 ທັນວາ ຄົບຮອບ 49 ປີ (2 ທັນວາ 1975-2 ທັນວາ 2024) ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920-13 ທັນວາ 2024); ຕິດພັນກັບການເຜີຍແຜ່ມະຕິ ກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກວ້າງຄັ້ງທີ 16 ສະໄໝທີ IX; ໂດຍໃຫ້ກຽດເຂົ້າຮ່ວມປາຖະກະຖາໃນຄັ້ງນີ້ຂອງ ທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງສາລະວັນ; ທ່ານ ນາງ ອາລຸນນີ ອາດວິໄລ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ; ທ່ານ ຈັນທະຄາດ ສີສຸພັນ ຮອງປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ມີພະນັກງານ-ລັດຖະກອນ ຫຼັກແຫຼ່ງ ພາຍໃນສະພາປະຊາຊົນແຂວງ ເຂົ້າຮ່ວມຮັບຟັງ;
ຜູ້ເຂົ້າຮ່ວມໄດ້ຮັບຟັງ ປະຫວັດຄວາມເປັນມາ ການກໍາເນີດເຕີບໃຫຍ່ຂະຫຍາຍຕົວ ຄວາມໝາຍ-ຄວາມສໍາຄັນຂອງວັນຊາດ ທີ 2 ທັນວາ ໂດຍແມ່ນພັກປະຊາຊົນປະຕິວັດລາວ ເປັນຜູ້ຈັດຕັ້ງນຳພາຜົນສໍາເລັດແຫ່ງການຊີ້ນໍາ-ນໍາພາ ຂອງພັກປະຊາຊົນປະຕິວັດລາວ ໃນໄລຍະຕໍ່ສູ້ປົດປ່ອຍຊາດ ສາມາດຍາດໄດ້ໄຊຊະນະອັນໃຫຍ່ຫຼວງມາສູ່ປະຊາຊົນລາວບັນດາເຜົ່າ ໂດຍຜ່ານການຕໍ່ສູ້ກັບຈັກກະພັດຜູ້ຮຸກຮານຢ່າງດຸເດືອດຂ້ຽວຂາດ ແລະ ຫຍຸ້ງຍາກສັບສົນ ຈົນສາມາດຍາດໄດ້ໄຊຊະນະເປັນກ້າວໆມາ ແລະ ໄດ້ຮັບໄຊຊະນະຢ່າງສົມບູນ ປົດປ່ອຍປະເທດຊາດໄດ້ຢ່າງມີໄຊ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ນັບແຕ່ນັ້ນມາ ປະເທດຊາດຂອງພວກເຮົາໄດ້ມີຄວາມເປັນເອກະລາດຢ່າງສົມບູນ ປະຊາຊົນບັນດາເຜົ່າ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ພາຍໃຕ້ການຊີ້ນໍາ-ນໍາພາ ອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ເຮັດໃຫ້ປະເທດຊາດມີຄວາມໝັ້ນຄົງສີວິໄລ, ຈາກນັ້ນພັກໄດ້ນຳພາປະຕິບັດ 2 ໜ້າທີ່ຍຸດທະສາດ ກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ປະເທດຊາດມີຄວາມສະຫງົບສຸກ ມີສະຖຽນລະພາບ ທາງດ້ານການເມືອງໜັກແໜ້ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງດີຂຶ້ນເປັນກ້າວໆ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 104 ປີ, ສະແດງເຖິງການເຄື່ອນໄຫວປະຕິວັດ ຜົນງານ ຄຸນງາມຄວາມດີ ຂອງປະທານ ໄກສອນ ພົມວິຫານ ແມ່ນນັກປະຕິວັດ ຜູ້ທີ່ມີຄວາມປີຊາສາມາດສະຫຼາດຫຼັກແຫຼມມີໄຫວພິບ, ມີນໍ້າໃຈ ຕໍ່ສູ້ເດັດດ່ຽວໜຽວແໜ້ນ ເປັນຜູ້ນໍາທີ່ແສນເຄົາລົບຮັກຂອງພັກ-ລັດ ທົ່ວກອງທັບ ແລະ ທົ່ວປົວງຊົນລາວທັງຊາດ ແລະ ເປັນວິລະບຸລຸດຂອງຊາດລາວເຮົາ ຈົ່ງພ້ອມກັນເສີມຂະຫຍາຍ ແລະ ສືບທອດມໍລະດົກອັນລໍ້າຄ່າ ຂອງປະທານ ໄກສອນ ພົມວິຫານ ທີ່ໄດ້ສ້າງໄວ້. ພ້ອມທັງຜັນຂະຫຍາຍ ມະຕິ ກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກວ້າງຄັ້ງທີ 16 ສະໄໝທີ IX ໃຫ້ປາກົດຜົນເປັນຈິງ;

ພາບ-ຂ່າວ: ດີລໍາພົນ ພົມມະຈັນ