ດັ້ນກີບເມກ

ເມື່ອໃດກໍຕາມ ຖ້າຄົນໃດໜຶ່ງ ເກີດພາວະປາກບໍ່ກົງກັບໃຈແລ້ວ ພຶດຕິກໍາອອກມາ ກໍຍິ່ງຕ່າງຈາກຄໍາເວົ້າທີ່ໄດ້ເວົ້າອອກມາ ປາກບໍ່ກົງກັບໃຈ ຄົນບູຮານວ່າ ປາກພະໃຈມານ, ປາກວ່າຕາຂະຫຍິບ, ປາກຫວານໃຈສົ້ມ ສິ່ງທີ່ເຮັດໃຫ້ໃຈບໍ່ກົງກັບປາກ, ພຶດຕິກໍາບໍ່ກົງກັບຄໍາເວົ້າມີຫຼາຍສາເຫດ ເຊິ່ງສາເຫດຫຼັກແມ່ນຜົນປະໂຫຍດ, ຄວາມໂລບ ການເຫັນແກ່ພັກພວກ ຍາດພີ່ນ້ອງ ຕົກລັກສະນະອະຄະຕິເຂົ້າຄອບງໍາຄວາມຄິດຈິດໃຈ.

ຜູ້ຂຽນເຂົ້າໃຈວ່າ: ທ່ານຜູ້ອ່ານອາດພົບເຫັນຫຼາຍກໍລະນີ ທີ່ຄົນເຮົາປາກບໍ່ກົງກັບໃຈ, ບາງຄົນປະຫວັດຜ່ານມາ ໃຊ້ຊີວິດຊື່ສັດທ່ຽງຕົງ ຍຸດຕິທໍາ ແຕ່ພໍຮອດຄາວມີອໍານາດປາລະມີ ພັດປ່ຽນເປັນຄົນລະຄົນ ນີ້ບໍທີ່ຊາວໂລກເຂົາວ່າ ອໍານາດປາລະມີ ເຮັດໃຫ້ຄົນດີໆ ກາຍເປັນຜີກໍໄດ້, ຜົນປະໂຫຍດເຮັດໃຫ້ຄົນ ກາຍເປັນຍັກເປັນມານ ບັນຫາແກ້ຍາກ ຫຼື ຫຼາຍຄັ້ງແກ້ບໍ່ຕົກ ຍ້ອນຖືກອະຄະຕິ 4 ຄອບງໍາເຮົາ ຈຶ່ງຕ້ອງໄດ້ຮູ້ວ່າ ອະຄະຕິຄື ທາງທີ່ບໍ່ຄວນເຮັດ, ບໍ່ຄວນປະພຶດ ຫຼື ແບບຢ່າງທີ່ບໍ່ຄວນປະພຶດ ເພາະມັນລໍາອຽງ ເຂົ້າຂ້າງຄົນຜິດມີ 4 ປະການ: (1) ສັນທາຄະຕິ ລໍາອຽງເພາະຮັກ, ເກີດສະໜິດສະໜົມ ເຂົ້າຂ້າງລໍາອຽງ ຈົນເຮັດໃຫ້ການຕັດສິນໃຈຜິດພາດ ລະເມີດລະບຽບວິໄນເຫັນແກ່ພວກ (2) ໂທສະຄະຕິ ລໍາອຽງເພາະຊັງ ເຖິງວ່າເຂົາຖືກ ເຂົາເກັ່ງກວ່າ ກໍຊ່າງ ເພາະຂ້ອຍຊັງເຈົ້າຈຶ່ງບໍ່ໃຫ້ຜ່ານ, ບໍ່ເລື່ອນບໍ່ສົ່ງເສີມ ນີ້ກໍຜິດລະບຽບໜ້າວຽກ (3) ພະຍາຄະຕິ ລໍາອຽງ ເພາະຢ້ານ ຍົກຕົວຢ່າງ ພີ່ນ້ອງເຂົາ, ພໍ່ແມ່ເຂົາມີອໍານາດສູງກວ່າ ມີອິດທິພົນກວ່າ ຢ້ານກົວຈຶ່ງຍອມໃຫ້ເຂົາຜ່ານ… (4) ໂມຫາຄະຕິ ລໍາອຽງ ເພາະຫຼົງຂາດປັນຍາ, ເວົ້າໃຫ້ສັ້ນຄືໂງ່ບໍ່ຮູ້ຈັກຕັດສິນອັນໃດຖືກ-ຜິດ.

ສັງລວມເລື່ອງອະຄະຕິ: ນີ້ເວົ້າເນັ້ນສະເພາະ ຜູ້ເປັນຫົວໜ້າທຸກຄົນ ຕ້ອງມີຄຸນສົມບັດຖືຫຼັກການປະຕິບັດເວັ້ນ ບໍ່ໃຫ້ອະຄະຕິຄອບງໍາ, ຫົວໜ້າກໍຕ້ອງເປັນແບບຢ່າງ, ປາກກົງກັບໃຈ ການປະພຶດຈຶ່ງອອກມາສອດຄ່ອງກັບຄໍາເວົ້າ…

ສະເໜີແລກປ່ຽນ