(ສພຊ) – ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນທີ 19 ພະຈິກຜ່ານມາ, ທ່ານ ສີວິໄລ ແກ້ວປະເສີດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈໍາປາສັກ ໄດ້ມີຄໍາເຫັນຕໍ່ບົດລາຍງານຂອງລັດຖະບານ ໂດຍລົງເລິກຂົງເຂດວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໂດຍສະເພາະແມ່ນແຫຼ່ງທ່ອງທ່ຽວທີ່ຕິດພັນກັບການອະນຸຍາດການລົງທຶນ, ການສໍາປະທານ, ການສ້າງຕັ້ງເປັນເຂດເສດຖະກິດພິເສດ. ຕໍ່ກັບບັນຫານີ້ ຢູ່ໃນບົດວິພາກມີບາງດ້ານ ການພັດທະນາຕ້ອງໄປຄວບຄູ່ກັນ ເຮັດໃຫ້ພໍ່ແມ່ປະຊາຊົນທີ່ຢູ່ໃກ້ຄຽງມີສ່ວນຮ່ວມ ແລະ ມີວຽກເຮັດງານທໍາ, ແຕ່ໃນຕົວຈິງຍັງເຮັດບໍ່ທັນໄດ້ດີເທົ່າທີ່ຄວນ ຍົກຕົວຢ່າງຢູ່ຈໍາປາສັກ ຜ່ານການຕິດຕາມກວດກາເຫັນໄດ້ດັ່ງນີ້: ຢູ່ເຂດເສດຖະກິດພິເສດ ມະຫານະທີສີພັນດອນ ທີ່ຕິດພັນກັບແຫຼ່ງທ່ອງທ່ຽວນໍ້າຕົກຕາດຄອນພະເພັງ ທີ່ເປັນໄຂ່ມຸກຂອງແມ່ນໍ້າຂອງ ໃນເມື່ອກ່ອນແມ່ນມີຫຼາກຫຼາຍ ເມື່ອແຂກເຂົ້າມາທ່ອງທ່ຽວແມ່ນເລືອກຊົມໃຊ້ຈັບຈ່າຍ, ເລືອກບໍລິໂພກຕາມໃຈມັກ; ພາຍຫຼັງມີເຂດເສດຖະກິດພິເສດ ແມ່ນມີພຽງ 1-2 ຮ້ານ ໃນນັ້ນກໍໄດ້ເສຍພັນທະໃຫ້ແກ່ບໍລິສັດ ເດືອນໜຶ່ງ 14 ລ້ານກີບ, ສະເພາະທີ່ເປັນຮ້ານອາຫານ, ຮ້ານບໍລິການຢູ່ໃນແຫຼ່ງທ່ອງທ່ຽວນັ້ນ ກໍໄດ້ເສຍພັນທະໃຫ້ພາກລັດປີ 3 ລ້ານກີບ. ມາຮອດເດືອນ 5 ປີ 2024 ເຖິງປັດຈຸບັນ ຜູ້ເຊົ່າສໍາປະທານເຮັດຮ້ານອາຫານ ແລະ ບໍລິສັດ ບໍ່ລົງລອຍກັນ, ປັດຈຸບັນບໍ່ມີຮ້ານອາຫານ ບໍ່ມີການບໍລິການຢູ່ໃນແຫຼ່ງທ່ອງທ່ຽວ, ທາງບໍລິສັດໃຫ້ເຫດຜົນວ່າຈະມີການບູລະນະ ມີການປັບປຸງ, ແຕ່ມາຮອດປັດຈຸບັນ ກໍຍັງບໍ່ທັນໄດ້ເຮັດຫຍັງ; ສະນັ້ນ, ເມື່ອນັກທ່ອງທ່ຽວເຂົ້າມາທ່ອງທ່ຽວ ກໍມີແຕ່ແວ່ຜ່ານແລ້ວອອກໄປ ເຮັດໃຫ້ທັງພາກລັດ ແລະ ພໍ່ແມ່ປະຊາຊົນຂາດລາຍຮັບ ເຮັດໃຫ້ເສຍພາບລັກຂອງແຫຼ່ງທ່ອງທ່ຽວ. ຢາກສະເໜີໃຫ້ລັດຖະບານຄົ້ນຄວ້າ, ຊຸກຍູ້ພາກສ່ວນທີ່ກ່ຽວຂ້ອງ ຕ້ອງໄດ້ປັບປຸງໃຫ້ໄວເພື່ອເປັນການສົ່ງເສີມພໍ່ແມ່ປະຊາຊົນເຂດໃກ້ຄຽງ ໃຫ້ໄດ້ມີສ່ວນຮ່ວມໃນການສ້າງວຽກເຮັດງານທໍາໃຫ້ແກ່ເຂົາເຈົ້າ ແລະ ເພື່ອເປັນການຮອງຮັບໃຫ້ແກ່ນັກທ່ອງທ່ຽວໃຫ້ທັນກັບລະດູການ ເພາະປັດຈຸບັນນີ້ນັກທ່ອງທ່ຽວພວມເຂົ້າມາຫຼາຍ ແລະ ພວກເຮົາກໍຢັ້ງຢືນນໍາກັນແລ້ວວ່າ ວຽກງານທ່ອງທ່ຽວແມ່ນລາຍຮັບມະຫາສານ.

ສະເໜີລັດຖະບານ ແລະ ພາກສ່ວນກ່ຽວຂ້ອງ ກວດກາປະເມີນຄືນການຄຸ້ມຄອງເກັບລາຍຮັບຈາກການອະນຸຍາດການລົງທຶນສໍາປະທານທີ່ຕິດພັນກັບແຫຼ່ງທ່ອງທ່ຽວ ໂດຍສະເພາະແຫຼ່ງທ່ອງທ່ຽວຄອນພະເພັງ, ພາຍຫຼັງທີ່ອະນຸຍາດໃຫ້ມີການລົງທຶນ ເຮົາໄດ້ຮັບຫຍັງ ແລະ ມີຜົນເສຍຫຍັງ ໂດຍສະເພາະຢູ່ຈຸດແຫຼ່ງທ່ອງທ່ຽວ (ປັດຈຸບັນແມ່ນເສຍພາບລັກ, ສະຖານທີ່ຮົກເຮື້ອ, ບໍ່ມີບ່ອນບໍລິໂພກ ເປັນຕົ້ນ: ຮັບປະທານອາຫານທ່ຽງ ຈຸດຊົມວິວທີ່ຈົບງາມ).

ອີກບັນຫາໜຶ່ງ, ຢາກໃຫ້ເຂັ້ມງວດຕື່ມ, ເອົາໃຈໃສ່ຊຸກຍູ້ບໍລິສັດປະຕິບັດຕາມສັນຍາໃຫ້ໄດ້; ຜ່ານມາຖືວ່າບໍລິສັດສັນຍາກັບພາກສ່ວນກ່ຽວຂ້ອງ ໂດຍສະເພາະສັນຍາເຊົ່າພາຫະນະກົນຈັກ ຫຼື ແຮງງານ ແມ່ນບໍ່ປະຕິບັດຕາມສັນຍາ, ບໍ່ຈ່າຍຄ່າຈ້າງຄ່າເຊົ່າໃຫ້ເຂົາເຈົ້າ ເຮັດໃຫ້ມີຄວາມຫຍຸ້ງຍາກສັບສົນ, ເຮັດໃຫ້ຜູ້ທີ່ມາຮັບຈ້າງບໍ່ໄດ້ເງິນຄ່າຈ້າງ ເກີດມີປາກົດການຫຍໍ້ທໍ້ລັກເຄື່ອງອຸປະກອນຂອງບໍລິສັດ ຫຼື ຢຸດເຊົາບໍ່ເຮັດວຽກ, ຮື້ຖອນວຽກງານທີ່ຕົນເອງເຮັດຜ່ານມາ ອັນນີ້ກໍສ້າງຄວາມສັບສົນໃຫ້ແກ່ທ້ອງຖິ່ນພວກເຮົາ, ສະເໜີໃຫ້ພາກສ່ວນກ່ຽວຂ້ອງເອົາໃຈໃສ່ຄຸ້ມຄອງຕິດຕາມຕື່ມ.